ប្រទេសថៃ ៖ ក្រសួងពាណិជ្ជកម្មថៃបានផ្តល់ថវិកា២០០លានបាតដើម្បីអភិវឌ្ឍន៍ទីផ្សារក្នុងស្រុកចំនួន១០០នៅទូទាំងប្រទេស ដែលជាគោលដៅទេសចរណ៍សម្រាប់ឆ្នាំនេះ ។
« សកម្មភាពនេះដើម្បីបង្កើនប្រាក់ចំណូលដល់អ្នកមានអាជីវកម្មខ្នាតតូច » ។ នេះបើតាមអនុរដ្ឋមន្ត្រីក្រសួងពាណិជ្ជកម្ម លោក Sontirat Sontijirawong បានមានប្រសាសន៍នាពេលកន្លងមក ។ កម្មវិធីនេះនឹងផ្តោតលើគោលដៅទេសចរណ៍នៅតាមខេត្តជាច្រើនដូចជា ខេត្តឈៀងម៉ៃ ឈៀងរ៉ៃ ប៉ាតាយ៉ា ភូកេត ហាតយ៉ៃ និងនគររាជសីមា ។ វានឹងអភិវឌ្ឍន៍ទីផ្សារលក់ផលិតផលផលិតក្នុងស្រុកដើម្បីទាក់ទាញភ្ញៀវទេសចរផងដែរ ។
លោក Sontirat ឱ្យដឹងថា ៖ « មានភ្ញៀវទេសចរច្រើនជាង២៥លាននាក់ក្នុង១ឆ្នាំបានមកកម្សាន្តនៅប្រទេសថៃ ។ ពួកគេមើលពីវប្បធម៌ របៀបរបបរស់នៅ និងផលិតផលក្នុងស្រុករបស់ថៃ » ។
លោកបន្តថា ៖ « ការមកទស្សនកិច្ចទីផ្សារក្នុងស្រុក ជាវិធីរៀនអំពីរបៀបរស់នៅរបស់ជនជាតិថៃ ហើយជាលទ្ធផល ក្រសួងមានគោលនយោបាយលើកទឹកចិត្តទីផ្សារក្នុងស្រុកឱ្យមានស្តង់ដាសមរម្យសម្រាប់បម្រើភ្ញៀវទេសចរទាំងនោះ » ។ លោកបន្ថែមថា ក្រសួងពាណិជ្ជកម្មក៏មានផែនការអភិវឌ្ឍន៍ហាងតូចៗក្នុងស្រុកផងដែរ ក្រោមគម្រោង Pracha Rat ជាការសហការរវាងវិស័យសាធារណៈ និងឯកជន ។ គោលបំណង គឺដើម្បីឱ្យមានហាងប្រភេទនេះចំនួន៥ពាន់កន្លែងក្នុងរយៈពេល៣ឆ្នាំ ៕
ចែករំលែកព័តមាននេះ