ប្រទេសម៉ិកស៊ិក ៖ ម៉ិកស៊ិកបានផ្ញើសារមួយក្នុងសប្តាហ៍មុនថា ពួកយើងមានមិត្តភក្តិជាច្រើនទៀតនៅក្រៅអាមេរិកខាងជើង ។ មន្ត្រីមកពីក្រសួងកសិកម្ម បាននាំក្រុមហ៊ុន ម៉ិកស៊ិកចំនួន១៧ ទៅកាន់ប្រទេសប្រេស៊ីលកាលពីសប្តាហ៍មុន ដើម្បីពិភាក្សាពីការទិញគ្រាប់ធញ្ញជាតិ សណ្តែកសៀង និងពោតបន្ថែមពីអាមេរិកខាងត្បូង ។ គួរបញ្ជាក់ថា ប្រទេស ម៉ិកស៊ិក គឺជាអ្នកទិញពោតសហរដ្ឋអាមេរិកធំជាងគេ ។
លេខាធិការសេដ្ឋកិច្ច ម៉ិកស៊ិក លោក Ildefonso Guajardo បានប្រកាសកាលពីថ្ងៃព្រហស្បតិ៍ថា លោកនឹងធ្វើទស្សនកិច្ចទៅកាន់ប្រទេសចិន នាខែកញ្ញាខាងមុខផងដែរ ។
ការសម្រេចចិត្តនេះកើតមានឡើង ខណៈលោកត្រាំ ផ្ញើការគំរាមកំហែងដល់ម៉ិកស៊ិក។ លោកគំរាមថា នឹងបញ្ចប់កិច្ចព្រមព្រៀងពាណិជ្ជកម្ម NAFTA រវាងកាណាដា និងម៉ិកស៊ិក។ លោកត្រាំ ក៏បានគំរាមថា នឹងដាក់ពន្ធលើផលិតផលនាំចូលពីម៉ិកស៊ិក និងក្រុមហ៊ុនដែលនាំការងារទៅកាន់ម៉ិកស៊ិកផងដែរ ។ ផែនការធ្វើទស្សនកិច្ចរបស់ម៉ិកស៊ិកកើតមានឡើង ស្របពេលការបញ្ជាក់ពីព្រឹទ្ធសភាអាមេរិកថា ការចរចាលើ NAFTA គួរតែចាប់ផ្តើមក្នុងខែសីហា ឬកញ្ញានេះ ។
លោក Guajardo បាននិយាយកាលពីថ្ងៃព្រហស្បតិ៍ថា ៖ « វាបង្ហាញថា ពួកយើងមានវិធីផ្សេងទៀតជាច្រើន » ។ មិនត្រឹមតែប្រទេសប្រេស៊ីល និងចិនទេ មន្ត្រីម៉ិកស៊ិកកំពុងតែពន្លឿនការចរចាពាណិជ្ជកម្មជាមួយភាគីខាងសហភាពអឺរ៉ុបលើកិច្ចព្រមព្រៀងពាណិជ្ជកម្មផងដែរ ។ ពួកគេក៏នឹងជួបជាមួយមន្ត្រីរបស់ប្រទេសអាហ្សង់ទីនទៀតផង ។
លោក Raul Urteaga អ្នកសម្របសម្រួលផ្នែកកិច្ចការអន្តរជាតិសម្រាប់ក្រសួងកសិកម្មម៉ិកស៊ិក ប្រាប់ថា ៖ « ពួកយើងបានរៀបចំរួចហើយ និងគ្មានការព្រួយបារម្ភទេ ។ ពួកយើងពិតជាមានចំណាប់អារម្មណ៍ណាស់ក្នុងការបើកទីផ្សារថ្មីៗសម្រាប់នាំចេញ និងមានដៃគូពាណិជ្ជកម្មដែលអាចជឿជាក់បាន » ៕
ចែករំលែកព័តមាននេះ