ខេត្តកំពង់ចាម ៖ ក្នុងពិធីសម្ពោធសមិទ្ធផលនានាក្នុងស្រុកជើងព្រៃខេត្តកំពង់ចាម កាលពីថ្ងៃទី១២ ឧសភា ដែលអញ្ជើញជាតំណាងដ៏ខ្ពង់ខ្ពស់របស់សម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន លោកហ៊ុន ម៉ាណែត បានមានប្រសាសន៍ថា ប្រទេសកម្ពុជា មិនមែនជាប្រទេសអ្នកមានទេ ប៉ុន្តែយើងមានធនធានមនុស្ស ដែលមានទឹកចិត្តរួមគ្នា ក្នុងការកសាងសមិទ្ធផល និងលើកស្ទួយប្រទេសជាតិ ឱ្យមានភាពរីកចំរើន ។
លោកបន្តថា ការរួមចិត្តគ្នាកសាងសមិទ្ធផល គឺជាការរួមចំណែកបន្ថែម ជាមួយរាជរដ្ឋាភិបាលកម្ពុជា ឲ្យមានភាពរីកចំរើនទៅមុខជានិច្ច ។ បើទោះបីប្ររយៈពេលយូក្តី ជាក់ស្តែងជាង៣០ឆ្នាំកន្លងមកនេះ ប្រទេសជាមានការអភិវឌ្ឍន៏ និងរីកចំរើនគួយឲ្យកត់សំគាល់ ជាពិសេសនៅតាមមូលដ្ឋានតែម្តង ។
លោកហ៊ុន ម៉ាណែត មានប្រសាសនទៀតថា កម្ពុជាយើងមានសុខសន្តិភាព តាមរយៈការខិតខំរបស់រាជរដ្ឋាភិបាល ប៉ុន្តែវាមិនទាន់គ្រប់គ្រាន់នោះទេ គឺរដ្ឋាភិបាល បានខិតខំដោះស្រាយ បំពេញតម្រូវការរបស់ ប្រជាពលរដ្ឋ និងខិតខំ ស្វែងរកឱកាសវិនិយោគ ពីបរទេស បង្កើតឱកាសការងារ ទាំងក្នុងប្រទេសនិងក្រៅប្រទេស សម្រាប់កូនចៅប្រជាពលរដ្ឋ ដើម្បីលើកស្ទួយកម្រិតជីវភាពរបស់ប្រជាពលរដ្ឋ ។
ចំណែកលោក ម៉ឹង មករា ប្រធានយុវជនបង្គោលចុះជួយស្រុកជើងព្រៃ បានឲ្យដឹងថា ក្រុមការងារយុវជនបានយកចិត្តទុកដាក់ក្នុងការស្តារនូវហេដ្ឋារចនាសម្ព័ន្ធដូចជា ជួសជុលឈូសឆាយធ្វើផ្លូវ ក្រាលគ្រួសក្រហម ធ្វើប្រព័ន្ធលូ បានចំនួន៤ខ្សែ ព្រមទាំងមានការចាក់បំពេញដីនៅកន្លែងផ្សេងៗទៀត ការស្តារប្រឡាយ ស្រះទឹក ដែលជាអាងស្តុកទឹកបម្រើឲ្យការរស់នៅរបស់ប្រជាពលរដ្ឋពិសេសការ ប្រើប្រាស់សម្រាប់វិស័យ ដែលជាប្រភពចំណូលចម្បងរបស់ប្រជាពលរដ្ឋ ក្នុងការប្រកបរបចិញ្ចឹមជីវិត ព្រមទាំងបានរួមចំណែកលើកកំពស់សោភ័ណភាព និងសុខភាព អនាម័យជូនប្រជាពលរដ្ឋផងដែរ ។
ចែករំលែកព័តមាននេះ