រាជធានីភ្នំពេញ ៖ នៅរសៀលថ្ងៃសៅរ៍ ទី១៣ ឧសភា ខានស្អែកនេះ ការប្រកួតប្រដាល់ដណ្ដើមខ្សែក្រវាត់អន្តរជាតិវគ្គ៣បានឈានដល់ដំណាក់កាលត្រូវបើកឱ្យកីឡាករជើងខ្លាំង៤រូបប៉ះគ្នានៅលើសង្វៀន
រាជធានីភ្នំពេញ ៖ នៅរសៀលថ្ងៃសៅរ៍ ទី១៣ ឧសភា ខានស្អែកនេះ ការប្រកួតប្រដាល់ដណ្ដើមខ្សែក្រវាត់អន្តរជាតិវគ្គ៣បានឈានដល់ដំណាក់កាលត្រូវបើកឱ្យកីឡាករជើងខ្លាំង៤រូបប៉ះគ្នានៅលើសង្វៀនទូរទស្សន៍អាស៊ីអាគ្នេយ៍ទៀតហើយ បន្ទាប់ពីការប្រកួតដណ្ដើមពិន្ទុរវាងកីឡាករកម្ពុជា និងថៃបានបញ្ចប់អស់៤រូបក្នុងសប្ដាហ៍ទី១ ។ ការប្រកួតនៅថ្ងៃស្អែកនោះ កីឡាករកម្ពុជា២រូបដែលសុទ្ធតែជាជើងខ្លាំងគឺរឿម វណ្ណៈ និងមាស ច័ន្ទមាន ត្រូវប្រកួតជាមួយកីឡាករជើងខ្លាំងថៃដើម្បីដណ្ដើមយក៣ពិន្ទុឆ្ពោះទៅវគ្គបន្តនៅក្នុងព្រឹត្តិការណ៍ប្រជែងយកខ្សែក្រវាត់អន្តរជាតិខារ៉ាបាវវគ្គថ្មី ។
ការប្រកួតនៅសប្ដាហ៍នេះត្រូវគេអះអាងថា ខ្លាំងប៉ះខ្លាំង ដោយសារតែភាគីខាងកម្ពុជា និងថៃសុទ្ធតែមានឈ្មោះបោះសំឡេងមិនខុសគ្នាសម្រាប់វិស័យប្រដាល់តំណាងឱ្យប្រទេសទាំងពីរ។
ក្រោយពីដំណើរការបានមួយសប្ដាហ៍ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់ខារ៉ាបាវវគ្គថ្មីមួយនេះឈានដល់ការប្រកួតសម្រាប់សប្ដាហ៍ទី២របស់ខ្លួនហើយ ដោយការប្រកួតលើកនេះនឹងផ្ដល់ឱកាសឱ្យកីឡាករកម្ពុជា២រូបថ្មីក្នុងចំណោម៤រូបប្រកួតជាមួយកីឡាករថៃ២រូបថ្មីក្នុងចំណោម៤រូបដែលបានជ្រើសរើស ។ កាលពីសប្ដាហ៍មុន កីឡាករកម្ពុជា២រូបរួមមានជើងខ្លាំងង៉ែត រដ្ឋា និងរឿង សារ័ត្ន បានបង្ហាញសភាពស៊ីសាច់ហុតឈាមជាមួយគូប្រកួតជាជនបរទេសម្ដងហើយ ដោយលទ្ធផលចុងក្រោយគឺមានអ្នកខកចិត្តហើយក៏មានអ្នកសប្បាយចិត្ត ជាពិសេសអ្នកគាំទ្រកីឡាករម្ខាងៗដែលមិនចង់ឃើញកីឡាកររបស់ខ្លួនបរាជ័យ។ អ្នកគាំទ្រកីឡាករកម្ពុជាទាំង២រូបសប្បាយចិត្ត ដោយសារតែកីឡាកររបស់ខ្លួនឈ្នះនៅសប្ដាហ៍បើកឆាកនោះ។ សម្រាប់ការប្រកួតនៅសប្ដាហ៍ទី២នេះវិញរឹតតែមានការចាប់អារម្មណ៍លើសពីការប្រកួត២គូមុនទៅទៀត ដោយសារតែសមាសភាពអ្នកឡើងប្រកួតដណ្ដើម៣ពិន្ទុជាមួយជើងខ្លាំងថៃនៅសប្ដាហ៍នេះ សុទ្ធតែជាកីឡាករជើងខ្លាំងល្បីឈ្មោះនៅក្នុងប្រទេសកម្ពុជាតែម្ដង។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានអះអាងថា កីឡាករម្នាក់ៗមិនថាកម្ពុជា និងបរទេសទេ សុទ្ធតែបានរួមគ្នាធ្វើឱ្យព្រឹត្តិការណ៍ទាំងមូលកន្ត្រាក់ការគាំទ្រតាំងពីព្រឹត្តិការណ៍នេះលេចឡើងនៅវគ្គ១ ។ ការប្រកួតនៅសប្ដាហ៍ទី២នេះ លោក ញាណ សុធី បញ្ជាក់ថា កីឡាករ រឿម វណ្ណៈ មកពីក្លិបរាជសីហ៍ខេត្តបន្ទាយមានជ័យ ត្រូវជួបប្រកួតជាមួយកីឡាករថៃឈ្មោះ Phat Chhayakphum ។ លោកថា កីឡាករកម្ពុជានឹងមិនភ្លាត់ឱ្យចាញ់សម្រាប់ការប្រកួតនេះទេ ដោយសារតែការប្រកួតរបស់ពួកគេគឺជាការដណ្ដើមឱកាសទៅយកខ្សែក្រវាត់អន្តរជាតិ។ កីឡាករថៃលោកថា ធ្លាប់ប្រកួត៦៨លើក ឈ្នះ៥៦លើក ចាញ់១១លើក និងស្មើ១លើក ក្នុងពេលកីឡាករកម្ពុជាឆ្លងកាត់ការប្រកួត៧១លើក ឈ្នះ៥៤លើក ចាញ់១៦លើក និងស្មើ១លើក។
សម្រាប់កីឡាករ មាស ច័ន្ទមាន មកពីសមាគមកីឡាប្រដាល់ក្រសួងការពារជាតិលោក ញាណ សុធី ថា ត្រូវជួបប្រកួតជាមួយកីឡាករថៃឈ្មោះLoom Leng ក្នុងលក្ខណៈដណ្ដើមពិន្ទុដូចគូអន្តរជាតិទី១ដែរ។ លោកថា កីឡាករថៃធ្លាប់ប្រកួត៦៨លើក ឈ្នះ៥៦លើក ចាញ់១១លើក និងស្មើ១លើក ក្នុងពេលកីឡាករកម្ពុជាធ្លាប់ប្រកួតផ្លូវការ៦៦លើក ឈ្នះ៥៣លើក ចាញ់១០លើក និងស្មើ៣លើកដោយមិនទាន់រាប់បញ្ចូលការប្រកួតក្រៅផ្លូវការនៅឡើយ៕
ចែករំលែកព័តមាននេះ