រាជធានីភ្នំពេញ ៖ កាលពីថ្ងៃអាទិត្យទី២៦ មីនា ម្ចាស់ខ្សែក្រវាត់ល្បីឈ្មោះលោកសែន រ៉ាឌី បានបើកសម្ពោធហាងយីហោ«សែនរ៉ាឌី បុកល្ហុង» យ៉ាងអធិកអធមនៅទល់មុខផ្សារស៊ីឡិប ។ លោកបានប្រកាសថា ខ្លួនឈប់ប្រដាល់ទៀតហើយដោយសារតែការប្រដាល់របស់លោក គឺតាំងពីមានរបួសក៏ប្រកួតលែងកើត ។
សែន រ៉ាឌី បានថ្លែងប្រាប់ថា ក្នុងពេលលោកមានឱកាសឡើងទៅប្រដាល់នៅក្នុងប្រទេសថៃ លោកតែងសម្លឹងមើលពីរបៀបបើកជំនួញនៅក្នុងប្រទេសនោះជារឿយៗ ហើយក្នុងចំណោមមុខរបរទាំងអស់ គឺមានតែមុខរបរពាក់ព័ន្ធនឹងការហូបចុកប៉ុណ្ណោះ ដែលលោកពេញចិត្ត ទើបលោកសម្រេចចិត្តទៅហាត់រៀនធ្វើបុកល្ហុង និងធ្វើសាច់អាំងជាច្រើនមុខទៀត ដើម្បីរកលទ្ធភាពបើកហាង ។ លោកថា រយៈពេលច្រើនឆ្នាំ លោកដើររស់នៅជាមួយគេឆ្អែតឆ្អន់ ហើយក៏ដឹងពីរបៀបធ្វើជំនួញច្រើនដែរ ទើបលោកសម្រេចចិត្តបើកហាងបុកល្ហុង ដែលសម្រេចចិត្តជួលផ្ទះមួយជាន់នៅទល់មុខផ្សារស៊ីឡិបដើម្បីរកស៊ី ។ ផ្ទះនេះលោកបានជួលក្នុងតម្លៃមួយខ្ពស់ក្នុងរយៈពេល៣ឆ្នាំ ដោយការបើកហាងគឺចំណាយអស់ជាង១ម៉ឺនដុល្លារហើយមកទល់នឹងពេលនេះ ។ យ៉ាងណាក៏ដោយ លោកថា អាជីពថ្មីនេះ មិនមែនជាកម្មសិទ្ធិរបស់លោកតែមួយមុខនោះទេ គឺមានការចូលហ៊ុនពីមិត្តភក្តិម្នាក់ទៀត ដែលលោកស្រឡាញ់រាប់អានដូចបងប្អូនយូរមកហើយ ។ លោកថា ទាំងលោក និងដៃគូភាគហ៊ុន សុទ្ធតែជាអ្នកជំនាញខាងបុកល្ហុងបែបថៃ និងធ្វើអាហារសមុទ្រដូចគ្នា ទើបចាប់ដៃគ្នាបើករកស៊ីមានការចាប់អារម្មណ៍តាំងពីថ្ងៃដំណើរការដំបូង ប៉ុន្តែនៅខ្វះខាតច្រើនណាស់ជាពិសេសគឺបញ្ហាត្រូវថែមសម្ភារប្រចាំហាង និងបុគ្គលិកតែម្ដង ។ លោកថា នៅក្នុងហាងលោក គឺលោកជាថៅកែផង ជាបុគ្គលិកផង ហើយលោកនិងដៃគូអត់ទាន់ហ៊ានជួលបុគ្គលិកឱ្យមកបម្រើហាងនោះទេ គឺសម្រេចយកបងប្អូន និងមិត្តភក្តិមកជួយទាំងអស់ ។ លោកនិយាយថា៖ «ហាងខ្ញុំដំណើរការល្អ ប៉ុន្តែអត់ទាន់មានគ្រប់នៅឡើយទេ នៅខ្វះច្រើនទៀត តែអត់អីទេខ្ញុំនឹងប្រឹង!»។
លោកថា ខ្លួនបើកហាងពឹងលើជំនាញបុកល្ហុងរបស់ខ្លួន ទើបហ៊ានដំណើរការ បើជួលអ្នកជំនាញឱ្យមកធ្វើមុខម្ហូបទៀតគឺប្រាកដជាឡុងចុងមិនខានទេ ។ លោកថា សប្បាយចិត្តដែលមានឱកាសបានបើកអាជីវកម្មផ្ទាល់ខ្លួន ខណៈដែលមុខរបរនេះក៏ទទួលបានជោគជ័យជាបណ្ដើរៗខ្លះហើយ ដោយសារតែមានការគាំទ្រពីបងប្អូន ។
លោក សែន រ៉ាឌី ប្រកាសថា ខ្លួនចេញពីវត្តដែលធ្លាប់រស់នៅរយៈពេលជាងមួយខែហើយ ដោយបានសម្រេចចិត្តមកជួលបន្ទប់មួយរស់នៅ ស្របគ្នានឹងការបោះទុនបើកហាង។ លោកថា ខ្លួនប្រដាល់លែងកើតហើយ ហើយក៏គ្មានគម្រោងនឹងបន្តអាជីពប្រដាល់ដូចមុនទៀតទេ ទើបសម្រេចបើកហាងធ្វើជាអាជីវកម្មមួយនេះ ។ លោកនិយាយថា ខ្លួនឈប់ចង់ប្រដាល់ហើយ ដោយសារតែប្រដាល់លែងកើត ហើយក៏ស្របនឹងមានមិត្តភក្តិសម្រេចចិត្តដាក់ហ៊ុនចូលជាមួយឱ្យបើកហាងបុកល្ហុងនៅផ្សារស៊ីឡិប ដែលលោកបញ្ជាក់ថា ជាទីតាំងល្អក្នុងការបើកជំនួញ ។ លោករំពឹងយ៉ាងខ្លាំងថា កេរ្តិ៍ឈ្មោះនៅក្នុងពិភពប្រដាល់នឹងជួយឱ្យលោកបើកហាងជោគជ័យ ដោយសារតែមុនឈប់ប្រដាល់លោកបានទទួលការគាំទ្រគួរឱ្យកត់សម្គាល់រួចទៅហើយ ។ លោកនិយាយថា៖«ខ្ញុំប្រហែលជាឈប់ហើយ(ប្រដាល់) មិនមែនថាដោយសារបើកហាងក៏ចង់ឈប់ទេ សំខាន់ខ្ញុំឥឡូវប្រកួតលែងកើតតែម្តង ទើបគិតថាឈប់ហើយ!» ។
លោកថា ខ្លួនស្ដាយដែលបានសម្រេចចិត្តបោះបង់ការប្រដាល់ទាំងវ័យក្មេង ប៉ុន្តែមកពីលោកមានជីវភាពក្នុងពេលនៅប្រដាល់ហូបគ្រប់ខ្លះមិនគ្រប់ខ្លះទើបលោកបាក់កម្លាំង ហើយមានរបួសលើកចុងក្រោយបណ្ដាលឱ្យប៉ះពាល់ផង ទើបលោកសម្រេចចិត្តទោះបន្តក៏ទៅមិនរួច ។ លោកថា ការប្រដាល់ក្រៅពីបន្សល់ឱ្យលោកនូវកេរ្តិ៍ឈ្មោះ និងរបួស តែក៏ជួយឱ្យលោកមានលទ្ធភាពបើកហាងដូចដែលបានឃើញនេះដែរ ។ លោកថា សប្បាយចិត្តដែលបានធ្វើថៅកែ ប៉ុន្តែបើនិយាយពីរឿងហត់ និងនឿយក៏ច្រើនណាស់ដែរ គឺមិនមែនស្រួលទេ ។ លោកទទូចឱ្យអ្នកគាំទ្រជួយគាំទ្របុកល្ហុងរបស់លោក ដោយអះអាងថានៅក្នុងហាងលោកក្រៅពីលក់បុកល្ហុង ក៏មានលក់សាច់អាំង និងអាហារសមុទ្រផងដែរ ។ ជាមួយនឹងការឈប់ប្រដាល់ លោកក៏ប្រកាសថាមិនមានគម្រោងចង់ក្លាយជាគ្រូបង្វឹកផ្នែកប្រដាល់នាពេលអនាគត និងមិនចង់បង្កើតជាក្លិបអ្វីនោះដែរ ដែលមានន័យថាលោកនឹងលាចេញពីប្រភពប្រដាល់ដោយលែងនឹកស្រណោះ ។ លោកថា មហាជនដែលចង់ជួបមុខលោកដោយផ្ទាល់ គឺទៅហាងរបស់លោកនឹងជួបភ្លាម ដោយសារតែលោកត្រូវប្រចាំការនៅទីនោះ ៕
ចែករំលែកព័តមាននេះ