រាជធានីភ្នំពេញ ៖ ប្រមាណជា៥ថ្ងៃមកហើយដែលអតីតអាជ្ញាកណ្ដាលល្បីឈ្មោះលោកជ័យ ប៊ុនឈឿ បានធ្លាក់ក្នុងសភាពដាច់បាយដាច់ទឹក ដោយរស់មួយថ្ងៃៗដោយសារតែការបន្តោងស៊ីរ៉ូម ។ ស្ថិតក្នុង
រាជធានីភ្នំពេញ ៖ ប្រមាណជា៥ថ្ងៃមកហើយដែលអតីតអាជ្ញាកណ្ដាលល្បីឈ្មោះលោកជ័យ ប៊ុនឈឿ បានធ្លាក់ក្នុងសភាពដាច់បាយដាច់ទឹក ដោយរស់មួយថ្ងៃៗដោយសារតែការបន្តោងស៊ីរ៉ូម ។ ស្ថិតក្នុងវ័យ៧៩ឆ្នាំពេលនេះ មានការបញ្ជាក់ថា លោកកាន់តែធ្ងន់ធ្ងរនិងចុះខ្សោយជាងមុន ។ ស្ថានភាពធ្វើទុក្ខនេះ គឺបានកើតឡើងជាថ្មីដោយសារតែដុំសាច់ដុះដែលធ្លាប់កើតឡើងបានដុះជាថ្មី ហើយឡើងធំជាងមុនបណ្ដាលឱ្យលោកបាយក៏លែងបានសម្រាន្តក៏លែងលក់ហើយពឹងស្ទើរទាំងស្រុងដោយការដាក់ស៊ីរ៉ូម។
លោក រ៉ូន រិទ្ធី ជាអ្នកឈឺឆ្អាលនឹងស្ថានភាពរបស់លោក ជ័យ ប៊ុនឈឿ បានអះអាងថា លោក ជ័យ ប៊ុនឈឿ បានធ្លាក់ក្នុងសភាពធ្ងន់ធ្ងរប្រមាណជា៥ខែមកហើយ ប៉ុន្តែលោក និងគ្រួសារមិនហ៊ានអំពាវនាវរកជំនួយជាថ្មីព្រោះទើបតែបានអំពាវនាវហើយ ក៏សុខចិត្តទ្រាំលំបាកបណ្ដាលឱ្យសាច់ដុះឡើងជាថ្មីរីកធំទៅៗព្រោះតែគ្មានប្រាក់ព្យាបាល ។ លោកថាលោកជាអ្នកជិតខាងហើយទំនាក់ទំនងរវាងលោក និងលោក ជ័យ ប៊ុនឈឿ មិនខុសពីកូនក្មួយនោះទេទើបលោកបានដឹងពីសុខទុក្ខចុងក្រោយរបស់គាត់ហើយក៏ប្រកូកប្រកាសនៅលើហ្វេសប៊ុកដើម្បីឱ្យមានការសង្គ្រោះដល់អតីតអាជ្ញាកណ្ដាលរូបនេះជាថ្មី ។ លោកថា លោកជ័យ ប៊ុនឈឿ បានធ្លាក់ក្នុងសភាពសម្រាន្តនៅកន្ទេល និងនិយាយលែងឮក្នុងប៉ុន្មានថ្ងៃចុងក្រោយនេះដោយសារតែការដាច់បាយដាច់ទឹក។
លោកថា ជើងខាងស្ដាំរបស់លោកតាជ័យ ប៊ុនឈឿ ហើមឡើងរលោង ហើយដុំសាច់ដែលបានដុះម្ដងទៀតនោះ ក៏មានសភាពរឹងនិងឈឺធ្វើឱ្យលោកតាដើរមិនបានសម្រាន្តក៏មិនលក់ ។ ដុំសាច់នោះធ្លាប់បានកើតឡើងម្ដងរួចមកហើយប៉ុន្តែក្រោយពីមានជំនួយវះកាត់លោកតាក៏មានសភាពធូរស្រាល និងដើរបានដូចមនុស្សរឹងមាំធម្មតា។ យ៉ាងណាមិញ ដុំសាច់នោះបានដុះជាថ្មីប្រមាណប៉ុន្មានខែចុងក្រោយនេះនិងមានសភាពរីកធំលឿនហើយរឹងដូចដុំថ្មទៀតផងធ្វើឱ្យលោកតាស្ថិតក្នុងសភាពធ្ងន់ធ្ងរតែម្ដង ។ ជាក់ស្ដែងដោយសារតែកូនចៅមិនមានលទ្ធភាពនាំលោកតាទៅវះចេញផង ទើបបណ្ដាលឱ្យដុំសាច់នោះរីកធំលឿនស្លេវធ្វើឱ្យលោកតាធ្លាក់ដល់សភាពដាច់បាយដាច់ទឹក។ លោកថា លោកតាជ័យ ប៊ុនឈឿ បើគ្មានជំងឺដុំសាច់នៅត្រង់សរសៃពួភ្លៅទេនោះប្រហែលជាសុខភាពមិនទ្រុឌទ្រោមដល់ថ្នាក់នេះទេ ដោយសារតែលោកតាជាអតីតកីឡាករ និងមានទម្លាប់មិនសូវទម្រន់ចូលចិត្តធ្វើនេះធ្វើនោះបណ្ដាលឱ្យរាងកាយនៅរឹងមាំបានយូរ ។ កូនចៅលោកតាមិនមានលទ្ធភាពទាល់តែសោះតែម្ដង គឺបានត្រឹមរៃអង្គាសគ្នាដាក់ស៊ីរ៉ូមឱ្យលោកតាក្នុងមួយថ្ងៃមួយប្លោកដើម្បីឱ្យលោកតានៅមានសភាពថេរក្នុងពេលធ្លាក់ដល់សភាពដាច់បាយដាច់ទឹកនាពេលនេះប៉ុណ្ណោះ។
លោកថា កូនទាំង៦របស់លោកតាសុទ្ធតែរស់យោងអាត្មាស្ទើរមិនរួចដោយកូនប្រុស២នាក់គឺជាកម្មករសំណង់ក្នុងចំណោម៣នាក់ ហើយកូនស្រី៣នាក់ខ្លះកូនខ្ចីរកអីមិនបាន និងខ្លះរស់នៅទាំងវេទនាបានត្រឹមម៉ាគ្រប់ខ្លួនឯងទាំងលំបាក ។ បើលោកអ្នកបានឃើញស្ថានភាពលោកជ័យ ប៊ុនឈឿ ផ្ទាល់ភ្នែកពិតជាមានការសង្វេគណាស់ ជាពិសេសនៅពេលកូនចៅពេលខ្លះរកលុយប្រមូលគ្នាមិនចង់គ្រប់ដើម្បីដាក់ស៊ីរ៉ូមឱ្យឪពុកដើម្បីកុំឱ្យលោកធ្លាក់ដល់សភាពធ្ងន់ធ្ងរខ្លាំងជាងនេះ ។ បើមិនដូច្នេះទេប្រហែលជាអស់សង្ឃឹម ដោយសារតែលោកតាគ្រាន់តែពិសាបបរក៏ក្អួត គឺមិនខុសពីអ្នកជំងឺដែលលែងទទួលអាហារបាន ។ លោកសម្ដែងការបារម្ភដោយសារតែលោកតាគឺជាអតីតកីឡាករ និងអាជ្ញាកណ្ដាលល្បីឈ្មោះ ប៉ុន្តែជីវិតចុងក្រោយរបស់លោកហាក់ដូចជាតែលតោលហួសពីការស្មាន ជាពិសេសក្នុងពេលឈឺធ្ងន់ទៅហើយក៏នៅតែគ្មានលទ្ធភាពបញ្ជូនមកពេទ្យទៀត ។ លោកថា បើមានសប្បុរសជនជួយជ្រោមជ្រែងដូចមុន គ្រួសារលោកតានឹងបញ្ជូនលោកតាទៅកាន់មន្ទីរពេទ្យ ដ្បិតសភាពជំងឺដែលបានធ្វើទុក្ខគឺបណ្ដាលមកពីដុំសាច់ដែលដុះសុទ្ធសាធ ។ នេះបើតាមលោកយល់ឃើញ ។
លោក រ៉ូន រិទ្ធី បន្តថា លោកតា ជ័យ ប៊ុនឈឿ មានផ្ទះផ្ទាល់ខ្លួន តែមិនមែនជាផ្ទះធំដុំនោះទេ ដោយផ្ទះមួយនោះក៏ទទួលបានពីអំណោយសប្បុរសធម៌ផងដែរ គឺមិនមានកូនចៅ ឬលោកខ្លួនឯងមានលុយសាងសង់នោះទេ ។ លោកថា លោកតាជ័យ ប៊ុនឈឿ ពេលនេះកំពុងដួលដេកនឹងកន្ទេលឯផ្ទះស្ថិតនៅភូមិវត្តលាភ សង្កាត់ចម្ការសំរោង ក្រុងបាត់ដំបង ខេត្តបាត់ដំបង ។ ជីវិតលោកតាកំពុងស្ថិតក្នុងការគំរាមកំហែងពីមច្ចុរាជជារៀងរាល់ថ្ងៃប្រសិនបើគ្មានលទ្ធភាពបញ្ជូនទៅកាន់មន្ទីរពេទ្យឱ្យបានឆាប់ទេ ។
លោកហ៊ានលើកឡើងបែបនេះគឺដោយសារតែលោកតាលែងទទួលបាយទឹក ហើយសូម្បីតែនិយាយក៏បានត្រឹមតែមិនឮសំឡេងមិនខុសពីអ្នកជំងឺស្ថិតក្នុងដំណាក់កាលចុងក្រោយទេ ។ លោកតាមានកម្លាំងដោយសារតែស៊ីរ៉ូមសុទ្ធសាធ ខណៈដែលលទ្ធភាពដាក់ស៊ីរ៉ូមនោះនៅពេលខានដាក់មួយថ្ងៃ គឺធ្វើឱ្យលោកតាទន់បាក់លោងគ្មានកម្លាំងកំហែងតែម្ដង ។ លោកស្នើឱ្យមានការជួយសង្គ្រោះដល់លោកតាជ័យ ប៊ុនឈឿ ជាថ្មី ដើម្បីឱ្យលោកតាមានឱកាសមើលឃើញជីវិតចុងក្រោយរបស់លោកតាដោយមិនសម្រាកនឹងកន្ទេលហើយអស់សង្ឃឹមបែបនេះ ។ លោកថា លោកតា និងកូនចៅរមែងបដិសេធមិនចេញមុខសុំជំនួយព្រោះតែខ្លាចរងការរិះគន់ថាសុំច្រើនលើកពេកហើយ ទើបបណ្ដាលឱ្យជំងឺរបស់លោកតាជ័យ ប៊ុនឈឿកាន់តែដុនដាបទៅៗរហូតឈានដល់ដំណាក់កាលដួលដេកនឹងកន្ទេលក្នុងប៉ុន្មានថ្ងៃចុងក្រោយនេះ៕
ចែករំលែកព័តមាននេះ