រាជធានីភ្នំពេញ ៖ កាលពីថ្ងៃទី៦ ឧសភា កន្លងមក លោកហេង សារ៉ា រួមជាមួយក្រុមការងារ បាននាំយកអំណោយមនុស្សធម៌ក្នុងនោះ មានរទេះជនពិការចំនួន៣គ្រឿង គ្រឿងឧបភោគបរិភោគ៣ឈុត និងថវិកាមួយចំនួន ដែលជាអំណោយដ៏ថ្លៃថ្លារបស់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មកចែកជូនប្រជាពលរដ្ឋចាស់ជរា ពិការគ្មានទីពឹង នៅខេត្តបាត់ដំបង និងខេត្តបន្ទាយមានជ័យ ។
អំណោយដែលត្រូវផ្តល់ជូនមាន ១-ឈ្មោះសេង សុង អាយុ២៥ឆ្នាំ ពិការស្វិតដៃជើង កំព្រាឪពុកម្តាយ បងប្អូនបោះបង់ចោល ស្នាក់អាស្រ័យនៅក្នុងបន្ទប់តូចមួយខាងក្រោយចេតិយ៍មួយ ក្នុងវត្តកំផែង ស្ថិតក្នុងក្រុងបាត់ដំបង ខេត្តបាត់ដំបង។ ២-ឈ្មោះលោកយាយ រិន អាយុ៧៤ឆ្នាំ ពិការភ្នែកទាំងសងខាង ពិការស្វិតដៃជើង រស់នៅក្នុងភូមិភ្នំកន្តួត សង្កាត់កំពង់ស្វាយ ក្រុងសិរីសោភណ៌ ខេត្តបន្ទាយមានជ័យ និង៣-លោកតា ប៉ាន់ ជា អាយុ៦៨ឆ្នាំ ពិការស្វិតជើងទាំងពីរ រស់នៅក្នុង ភូមិកំពង់ស្វាយ សង្កាត់កំពង់ស្វាយ ក្រុងសិរីសោភណ៌ ខេត្តបន្ទាយមានជ័យ។
លោកហេង សារ៉ា ក៏បានបញ្ចាក់ថា អំណោយសំរាប់គ្រួសារនីមួយៗមាន អង្ករ១០០គីឡូ មី៥កេស ទឹកស៊ីអ៊ីវ៣យួរ ទឹកដោះគោខាប់១កេស ត្រីខកំប៉ុង១កេស តែ ស្ករស ពូក ខ្នើយ មុង ភួយ សារុង ក្រម៉ា កន្ទេល ស្បែកជើង១ឈុត វិទ្យុប្រើថ្មពិល១ឈុត សម្ភារផ្ទះបាយ១ឈុត និងថវិកាចំនួន៥០ម៉ឺនរៀលផងដែរ ។
ចែករំលែកព័តមាននេះ