ផលនេសាទជាលក្ខណៈគ្រួសារ រយៈពេល៣ខែប្រមាណជា៣៨០តោន
ខេត្តស្ទឹងត្រែង ៖ យោងតាមរបាយការណ៍ស្ថិតិប៉ាន់ប្រមាណរបស់ខណ្ឌរដ្ឋបាលជលផលខេត្តស្ទឹងត្រែងបានឲ្យដឹងថា ផលនេសាទជាលក្ខណៈគ្រួសារស្ថិតនៅទន្លេទាំង៤
ខេត្តស្ទឹងត្រែង ៖ យោងតាមរបាយការណ៍ស្ថិតិប៉ាន់ប្រមាណរបស់ខណ្ឌរដ្ឋបាលជលផលខេត្តស្ទឹងត្រែងបានឲ្យដឹងថា ផលនេសាទជាលក្ខណៈគ្រួសារស្ថិតនៅទន្លេទាំង៤
ខេត្តស្ទឹងត្រែង ៖ យោងតាមរបាយការណ៍ស្ថិតិប៉ាន់ប្រមាណរបស់ខណ្ឌរដ្ឋបាលជលផលខេត្តស្ទឹងត្រែងបានឲ្យដឹងថា ផលនេសាទជាលក្ខណៈគ្រួសារស្ថិតនៅទន្លេទាំង៤ ក្នុងខេត្តស្ទឹងត្រែងក្នុងមួយត្រីមាស ចាប់ពីខែមករា ដល់មីនា២០១៧ ប្រជានេសាទទទួលផលនេសាទប្រមាណ ៣៨០តោន។ ស្របពេលរដូវត្រីមេពូជពងកូនជារៀងរាល់ឆ្នាំ នៅថ្ងៃទី១ ខែឧសភា ក្រសួងកសិកម្មរុក្ខប្រមាញ់ និងនេសាទតែងប្រកាសឲ្យបិទនេសាទលុះត្រាឧបករណ៍នេសាទលក្ខណៈគ្រួសារដែលច្បាប់បានអនុញ្ញាតហើយនឹងត្រូវបើកឲ្យនេសាទជាធម្មតានៅថ្ងៃទី៣០ ខែកញ្ញាបន្ទាប់។ ទន្ទឹមនឹងនេះរដ្ឋបាលសាលាខេត្តស្ទឹងត្រែងក៏បានចេញសេចក្តីជូនដំណឹងស្តីពីរដូវបិទនេសាទឆ្នាំ២០១៧ ដោយអនុលោមតាមព្រះរាជក្រមលេខនស/រកម/០៥០៦/០១១ ចុះថ្ងៃទី២១ ខែឧសភា ឆ្នាំ២០០៦ ដែលប្រកាសឲ្យប្រើច្បាប់ស្តីពីជលផល និងប្រកាសលេខ៤៤០ប្រក.កសក ចុះថ្ងៃទី០៥ ខែវិច្ឆិកា ឆ្នាំ២០១៣ ស្តីពីវិធានការការពារត្រីមេពូជនៅរដូវពងកូនសម្រាប់តំបន់ទន្លេមេគង្គក្នុងភូមិសាស្ត្រខេត្តស្ទឹងត្រែង។
សេចក្តីជូនដំណឹងរបស់រដ្ឋសាលាខេត្តស្ទឹងត្រែងបានជម្រាបជូនសាធារណជន និងអ្នកនេសាទទាំងអស់ជ្រាបថា រដូវបិទនេសាទក្នុងដែននេសាទខេត្តស្ទឹងត្រែងនឹងចាប់ផ្តើមអនុវត្តពីថ្ងៃទី១ ខែឧសភា ដល់ថ្ងៃទី៣០ ខែកញ្ញា រៀងរាល់ឆ្នាំ។ អំឡុងពេលបិទនេសាទនេះគឺមិនអនុញ្ញាតឲ្យធ្វើការនេសាទដោយឧបករណ៍មងគ្រប់ប្រភេទ សំដៅដើម្បីការពារត្រីមេពូជដែលផ្ទុកទៅដោយពងក្នុងពោះក្នុងអំឡុងពេលបង្កកំណើតនារដូវនេះ។ តែទោះបីជាក្នុងរដូវបិទនេសាទក្តី អ្នកនេសាទនៅតែអាចធ្វើការនេសាទបានដោយប្រើនូវឧបករណ៍ជាលក្ខណៈគ្រួសារដូចជា សៃយឺន សំណាញ់ សន្ទូចផ្លែមួយ លប អង្រុត សាង ចាន់ ឡើ ជិត សម លាយ កញ្ច្រែងដងត្រី និងឧបករណ៍មួយចំនួនទៀតដែលច្បាប់អនុញ្ញាត។ ស្ថិតក្នុងរយៈពេល៣ខែ ចាប់ពីខែមករាដល់ខែមីនាមកនេះ សង្កេតឃើញបទល្មើសមានការថយចុះគួរឲ្យកត់សម្គាល់នៅតាមតំបន់ដាច់ស្រយាលមួយចំនួនក្នុងទន្លេដងទន្លេប៉ែកខាងជើងនៃទន្លេមេគង្គ និងនៅតាមដងទន្លេដងទន្លេទាំង៤ ទន្លេមេគង្គ ទន្លេសេកុង ទន្លេសេសាន និងទន្លេស្រែពកនេះបើការអះអាងពីខណ្ឌជលផលខេត្តស្ទឹងត្រែង។ លោក ទុំ នីរ៉ូ នាយខណ្ឌជលផលខេត្តស្ទឹងត្រែងបញ្ជាក់ឲ្យដឹងថា យោងតាមស្ថិតិប៉ាន់ប្រមាណផលនេសាទចាប់បានក្នុងត្រីមាសទីមួយមានចំនួនប្រមាណ ៣៨០តោន ដែលជាផលចាប់ជាលក្ខណៈគ្រួសារប៉ុណ្ណោះ។
ទន្ទឹមនេះលោកបានលើកឡើងដែរថា ការនេសាទដោយខុសច្បាប់នាយរងខណ្ឌនាយសង្កាត់រដ្ឋបាលជលផលសៀមបូក និងមន្ត្រីខណ្ឌសហការជាមួយស្ថាប័នពាក់ព័ន្ធមកពីមន្ទីរឧតុនិយម និងធនធានទឹក មន្ទីរទំនាក់ទំនងរដ្ឋសភា និងព្រឹទ្ធសភា អធិការកិច្ច សាលាស្រុកសេសាន អធិការដ្ឋាននគរបាលស្រុកសេសាន សហគមន៍នេសាទ ចុះបង្ក្រាបបទល្មើសជលផលដោយប្រើឧបករណ៍ដាយនៅភូមិស្រែគរ១ ឃុំស្រែគរ ស្រុកសេសាន ដោយរឹបអូសវត្ថុតាងដូចជា ដាយចំនួន៥មាត់ មានមុខកាត់ប្រវែង១០ម៉ែត្រ និងបណ្តោយ២០ម៉ែត្រ (សរុប៥០គុណ១០០ម៉ែត្រ) ទូកអេវក្បាលស្រួចមួយគ្រឿងប្រវែង៩ម៉ែត្រ និងម៉ាស៊ីនម៉ាកហុងដាកម្លាំង៩សេស មួយគ្រឿង។
ក្រៅពីនោះប្រមូលមងដែលអ្នកនេសាទលួចនេសាទក្នុងតំបន់អភិរក្សផ្សោត និងត្រីមេពូជ ៤៤១២ម៉ែត្រ សន្ទូច២១៧៥ផ្លែ និងអប់រំអ្នកនេសាទបានចំនួន៣៥ទូក។ រឹបអូសទូកមួយគ្រឿងម៉ាស៊ីនមួយគ្រឿង ទទួលក្បាលឆក់១គ្រឿង និងអាគុយ១គ្រឿងពីយោធាវរៈសេនាតូចលេខ៤២៣ ឃាត់ខ្លួនជនសង្ស័យម្នាក់និងវត្ថុតាងមានទូកម៉ាស៊ីន ពីបទនេសាទដោយប្រើគ្រឿងផ្ទុះ និងបញ្ជូនជនសង្ស័យ និងវត្ថុតាងទៅមន្ត្រីបរិស្ថាន។ អប់រំណែនាំ និងធ្វើកិច្ចសន្យាអ្នករកស៊ីប្រមូលទិញ និងលក់ត្រីដែលបានពីការនេសាទខុសច្បាប់ចំនួន៦នាក់ ព្រមទាំងបានអប់រំណែនាំដល់ប្រជានេសាទ១គ្រួសារ ដែលនេសាទបានប្រភេទធនធានជលផលកំពុងរងគ្រោះថ្នាក់ និងប្រលែងចូលទន្លេវិញ។ លោកនាយខណ្ឌបានបន្ថែមថា ជាមួយការបង្ក្រាប និងទប់ស្កាត់បទល្មើសនេសាទខាងលើជំនាញក៏បានជួបផលលំបាកផងដែរ ដោយសារអ្នកនេសាទប្រព្រឹត្តបទល្មើសភាគច្រើននៅតំបន់ដាច់ស្រយាល និងពេលយប់ដែលធ្វើឲ្យមន្ត្រីខណ្ឌ និងកម្លាំងសហការណ៍ពិបាកក្នុងការបង្ក្រាប តែទោះបីយ៉ាងណាខណ្ឌជលផលនឹងបន្តរឹតបន្តឹងដើម្បីកាត់បន្ថយឲ្យធ្លាក់ក្នុងកម្រិតទាបបំផុត៕
ចែករំលែកព័តមាននេះ