បើមិនបានកម្ទេចចោលទេ មិនដឹងថាបងប្អូនណាទទួលទានខ្លះឡើយ !
ខេត្តបាត់ដំបង ៖ ឆ្អឹងមាន់ ជង្គង់មាន់ និងទំនិញខូចគុណភាពដទៃទៀតប្រមាណ១៥០គីឡូក្រាម ត្រូវមន្ត្រីកុងត្រូលប្រចាំច្រកទ្វារតំបន់«អូររំដួល»ស្រុកភ្នំព្រឹកដុតកម្ទេចចោល
ខេត្តបាត់ដំបង ៖ ឆ្អឹងមាន់ ជង្គង់មាន់ និងទំនិញខូចគុណភាពដទៃទៀតប្រមាណ១៥០គីឡូក្រាម ត្រូវមន្ត្រីកុងត្រូលប្រចាំច្រកទ្វារតំបន់«អូររំដួល»ស្រុកភ្នំព្រឹកដុតកម្ទេចចោល
ខេត្តបាត់ដំបង ៖ ឆ្អឹងមាន់ ជង្គង់មាន់ និងទំនិញខូចគុណភាពដទៃទៀតប្រមាណ១៥០គីឡូក្រាម ត្រូវមន្ត្រីកុងត្រូលប្រចាំច្រកទ្វារតំបន់«អូររំដួល»ស្រុកភ្នំព្រឹកដុតកម្ទេចចោល កាលពីថ្ងៃទី០២ ឧសភា បន្ទាប់ពីរឹបអូសបានពីឈ្មួញទុច្ចរិតដែលលួចនាំចូលពីប្រទេសថៃ។ ប្រធានប៉ុស្ដិ៍កាំកុងត្រូលប្រចាំច្រកទ្វារតំបន់«អូររំដួល»ស្រុកភ្នំព្រឹក លោកតូ ផា បានឲ្យដឹងថា ទំនិញខូចគុណភាពទាំងនោះរួមមាន ឆ្អឹងមាន់ ជង្គង់មាន់ នំកញ្ចប់និងមីកញ្ចប់សម្រាប់ក្មេងសរុបជាង១៥០គីឡីក្រាម ដែលរឹបអូសបានពីឈ្មួញទុច្ចរិតលួចនាំចូលពីប្រទេសថៃ។ លោកបានប្រាប់ថា ទំនិញទាំងនេះក្រុមឈ្មួញបានលួចបង្កប់ក្រោមទំនិញនានា អូសតាមរទេះចូលពីប្រទេសថៃ តាមច្រកទ្វារតំបន់«អូររំដួល»។
លោក តូ ផា បានបញ្ជាក់ថា ពិធីដុតកម្ទេចទំនិញខូចគុណភាពទាំងនេះក៏មានការចូលរួមពីមន្ត្រីគយ និងមន្ត្រីនគរបាលព្រំដែនផងដែរ។ បើតាមប្រភពពីមន្ត្រីព្រំដែនបានឲ្យដឹងថា ទំនិញទាំងនេះឈ្មួញតែងលួចបង្កប់ក្រោមបន្លែផ្លែឈើ ឬបង្កប់ក្រោមទំនិញផ្សេងៗទៀតដែលអូសតាមរទេះ។ ប្រភពបានឲ្យដឹងទៀតថា ជាធម្មតាតាមបណ្ដាច្រកទ្វារព្រំដែនមួយចំនួន ត្រូវឆ្នាំទ្វារបើកឲ្យឈ្មួញនាំទំនិញចូលមួយលើក ចាប់ពីម៉ោង៤ទាបភ្លឺដល់ម៉ោង៦ព្រឹក ជាពិសេសម្ហូបអាហារ បន្លែ ត្រីសាច់ ហើយបិទវិញ លុះម៉ោង៧ព្រឹកទើបបើកច្រកជាផ្លូវការលើកទី២។ ដូច្នេះហើយទើបឈ្មួញឆក់ឳកាសលួចបន្លំដឹកទំនិញ ឬម្ហូបអាហារខូចគុណភាពចូលបាន។ មន្ត្រីដដែលបានបញ្ជាក់ថា សកម្មភាពដឹកជញ្ជូនឆ្អឹងមាន់ ឬជង្គង់មាន់ ដែលជាទំនិញខូចគុណភាពទាំងនេះ គឺមានលក្ខណៈដូចសត្វកណ្ដៀរ។ ពួកឈ្មួញបានលួចបង្កប់ទំនិញខូចគុណភាពទាំងនេះក្រោមបន្លែ ឬទំនិញផ្សេងៗតាមរទេះអូស ដើម្បីបំភ័ន្តភ្នែកមន្ត្រីជំនាញ ហើយសកម្មភាពនេះមានរាល់ថ្ងៃ។
លោក តូ ផា ប្រធានប៉ុស្ដិ៍កាំកុងត្រូលច្រកតំបន់«អូររំដួល»បាននិយាយថា ទំនិញទាំងនេះពួកឈ្មួញតែងបំបែករូបភាពតូចៗបង្កប់តាមរទេះអូស។ ភាគច្រើនពួកគេបានលួចដឹកចូលនៅម៉ោង៤ ឬ៥ទាបភ្លឺ ប៉ុន្តែត្រូវមន្ត្រីជំនាញរបស់លោកងើបចាំស្ទាក់ត្រួតពិនិត្យ និងចាប់រឹបអូសបានជាបន្តបន្ទាប់។ លោក តូ ផា បានព្រមានដល់ឈ្មួញដែលរកស៊ីបំពានច្បាប់ទាំងអស់ឲ្យបញ្ឈប់នូវសកម្មភាពរបស់ខ្លួន បើមិនដូច្នេះទេ ពួកគេអាចប្រឈមនឹងផ្លូវច្បាប់ជាមិនខាន។ លោកក៏បានអំពាវនាវផងដែរ ដល់ប្រជាពលរដ្ឋដែលតែងទិញចំណីអាហារដែលឈ្មួញដឹកលក់តាមម៉ូតូ ត្រូវមានការប្រុងប្រយ័ត្នមុននឹងទិញ និងត្រូវចេះពិនិត្យចំពោះទំនិញ ឬម្ហូបអាហារទាំងឡាយណាដែលខូចគុណភាព ព្រោះការបរិភោគចំណីអាហារដែលខូចគុណភាព អាចប៉ះពាល់ធ្ងន់ធ្ងរដល់សុខភាព៕
ចែករំលែកព័តមាននេះ