រាជធានីភ្នំពេញ ៖ ខុសពីកីឡាករបាល់ទាត់ល្បីឈ្មោះភាគច្រើនដែលមានមហិច្ឆតាចង់បន្តស្ថិតក្នុងក្រុមជម្រើសជាតិ សម្រាប់គួច សុកុម្ភៈ ដែលជាកីឡាករលេចធ្លោក្នុងវិស័យបាល់ទាត់បានអះអាងថា លោកនឹងដើរចេញពីការងារនេះដើម្បីទុកឱកាសឱ្យក្មេងជំនាន់ក្រោយ ដោយបន្តអាជីពជាគ្រូបង្វឹកដើម្បីចែករំលែកបទពិសោធន៍ និងចំណេះដឹងពីកីឡាបាល់ទាត់ឱ្យកូនខ្មែរដែលស្រឡាញ់វិស័យមួយនេះ ។
អតីតប្រធានក្រុមជម្រើសជាតិកម្ពុជារូបនេះ បានទម្លាយថា លោកពិតជាមានគម្រោងចង់លាឈប់ពីក្រុមជម្រើសជាតិកម្ពុជាមែន ដោយសារតែលោកយល់ថា ខ្លួនឯងមានវ័យសមល្មមដែលគួរទុកលទ្ធភាពឱ្យកីឡាករស្រករក្រោយមានមុខជំនួស ។ លោកត្រូវគេដឹងថា មានរបួសសរសៃកែងជើងដែលជាហេតុផលធ្វើឱ្យលោកពន្យារពេលមិនទាន់លាឈប់ ។ ខ្សែបម្រើឆ្នើមរូបនេះបន្តថា លោកពិតជាចង់បន្តការងារជាមួយក្រុមជម្រើសជាតិ ប៉ុន្តែលោកមិនអាចក្រាញនឹងការងារមួយនេះរហូតធ្វើឱ្យកីឡាករផ្សេងទៀតមិនមានឱកាសនោះទេ ។
លោកថា ជម្រើសជាតិមួយរូបបើនៅតែបន្តដោយមិនឈប់ នោះប្រឡោះសម្រាប់អ្នកថ្មីក៏មិនមាននោះដែរ ហើយសម្រាប់លោកគឺចង់លះបង់ដើម្បីឱ្យការងារក្រុមជម្រើសជាតិទាំងមូលល្អប្រសើរ។ លោកថា ខ្លួននៅតែចង់បានការងារមួយដែលល្អ ប៉ុន្តែលោកក៏ត្រូវគិតពីគ្រួសារ និងឱកាសសម្រាប់អ្នកក្រោយផងដែរ ។ លោកធ្លាប់បញ្ជាក់ថា ការងារជម្រើសជាតិធ្វើឱ្យលោកបាត់បង់ពេលវេលាជាមួយគ្រួសារជាមួយប្រពន្ធកូនច្រើនណាស់ដែរ បន្ថែមពីលើសម្ពាធដែលខ្លួនទទួលបានពីការប្រកួតម្ដងៗ ។ ធ្វើជាជម្រើសជាតិមិនមែនស្រួលទេ បើកុំតែស្រលាញ់ឈប់យូរហើយ ព្រោះការហ្វឹកហាត់ក៏ច្រើន ហើយបើការប្រកួតម្ដងៗមិនបានល្អក៏មានសម្ពាធ ។ ទោះបីយ៉ាងណា លោកទទួលបានកិត្តិយស និងមុខមាត់ពីវិស័យកីឡាច្រើនណាស់ ទើបលោកនៅតែបន្តការប្រកួត បើទោះជាមានរបួសមួយដងជា២ដងតាំងពីមានឈ្មោះជាកីឡាករបាល់ទាត់ ។ លោកថា ខ្លួនមានអាយុច្រើនហើយគួរតែមានពេលខ្លះដើម្បីគ្រួសារផងដែរ ដោយចាត់ទុកថា ស្នាដៃដែលលោកបានសាងកន្លងមក គឺគ្រប់គ្រាន់ហើយសម្រាប់អាជីពបាល់ទាត់ ។ របួសសរសៃកែងជើងដែលកើតឡើងកាលពីឆ្នាំមុនធ្វើឲ្យគោលបំណងលេងឲ្យក្រុមជម្រើសជាតិជាលើកចុងក្រោយត្រូវបានរលាយ ទើបជាហេតុធ្វើឱ្យលោកប្ដូរគំនិតចង់លេងឱ្យជម្រើសជាតិបន្តទៀត និងមិនទាន់កំណត់ថាពេលណាទើបចង់ឈប់ទេ ។ ប៉ុន្តែលោកថា ពេលវេលាត្រូវឈប់អាចនឹងកើតឡើងឆាប់ៗប្រសិនបើលោកពេញចិត្ត ឬខកចិត្តសម្រាប់ការងារមួយនេះ ។
គួច សុកុម្ភៈ បច្ចុប្បន្នមានវ័យ៣១ឆ្នាំនៅតែអះអាងពីការសោកស្ដាយដែលខ្លួនមានរបួសកាលពីដើមឆ្នាំ២០១៦ ក្នុងជំនួបណាហ្គាវើលយកឈ្នះស៊ីម៉ាក់ ៣-១ នៅពហុកីឡដ្ឋានជាតិ ។ លោកថា ខ្លួននឹងប្រកាសជាសាធារណៈបើលោកសម្រេចចិត្តឈប់នៅពេលខាងមុខ។
លោកក៏ត្រៀមបម្រើការក្នុងវិស័យផ្សេងពាក់ព័ន្ធនឹងការសិក្សាដែលជាបង្អែកសម្រាប់ជីវិតឱ្យបានរឹងមាំជាងអាជីពបច្ចុប្បន្ន ។ ទោះបីយ៉ាងណាមានការបង្ហើបថា លោកមិនមានគម្រោងលាឈប់ពីក្រុមជម្រើសជាតិឆាប់ៗនោះទេ ដោយលោកគ្រាន់តែប្រកាសដើម្បីឱ្យក្រុមមើលឃើញពីការប្រឹងប្រែងរបស់លោកប៉ុណ្ណោះ ។ អ្នកខ្លះយល់ថា លោកអន់ចិត្តដែលបានជាប់ជាជម្រើសជាតិក្នុងក្រុមបាល់ទាត់តាំងពីណាពីណី តែលោកបែរជាមានឱកាស និងការលើកស្ទួយតិចជាងកីឡាករស្រករក្រោយ ដូចជាចាន់ វឌ្ឍនាកា និងប្រាក់ មុន្នីឧត្តមជាដើម ទើបលោកចេះតែចង់លាឈប់តែភាពជាក់ស្ដែងគឺបានត្រឹមតែប្រកាសឯការបន្តអាជីពហាក់នៅដដែលគ្មានការប្រែប្រួលទេ ៕
ចែករំលែកព័តមាននេះ