រាជធានីភ្នំពេញ ៖ អ្នកនាំពាក្យក្រសួងយុត្តិធម៌លោក គឹម សន្តិភាព ស្នើទៅវិទ្យុអាស៊ីសេរីថា កុំបំភ័ន្តសាធារណៈមតិលើរឿងលោក ជុន ច័ន្ទបុត្រ ដែលបន្លំចូលក្នុងពន្ធនាគាព្រៃសកន្លងមក ខណៈវិទ្យុនេះមិនអនុញ្ញាតឲ្យលោកចូលបំភ្លឺនៅក្នុងតុលាការ។
ថ្ងៃទី២ ខែឧសភា លោក ជុន ច័ន្ទបុត្រ ត្រូវតុលាការសាលាដំបូងរាជធានីភ្នំពេញ កោះអញ្ជើញចូលបំភ្លឺករណីបន្លំខ្លួនចូលក្នុងពន្ធនាគាព្រៃសជាមួយអ្នកតំណាងរាស្ត្រគណបក្សសង្គ្រោះជាតិ ។ ប៉ុន្តែលោក ជុន ច័ន្ទបុត្រមិនបានចូលបំភ្លឺតាមការកោះអញ្ជើញនោះទេ ដោយឲ្យមេធាវីទៅជំនួស ។
ករណីលោក ជុន ច័ន្ទបុត្រ ហៅហួត វុទ្ធី អនុប្រធានវិទ្យុអាស៊ីសេរីនោះត្រូវបានអ្នកនាំពាក្យក្រសួងយុត្តិធម៌ លោក គឹម សន្តិភាព បានសរសេរលើបណ្តាញសង្គមហ្វេសប៊ុកថា បុគ្គលណាប្រព្រឹត្ត បុគ្គលនោះទទួលខុសត្រូវ! តុលាការជាអ្នកស្វែងរកការពិតលើកំហុសនោះ! សូមអាស៊ីសេរីកុំដើរតួជាតុលាការ!។
លោកបញ្ជាក់ថា «បុគ្គលណាប្រព្រឹត្តល្មើសច្បាប់ គឺជាមុខសញ្ញារបស់អ្នកអនុវត្តច្បាប់ក្នុងការស្វែងរក និងផ្តន្ទាទោសតាមច្បាប់! ការអនុវត្តច្បាប់ព្រហ្មទណ្ឌ គឺដើម្បីរក្សាការពារនូវសន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ហើយច្បាប់ព្រហ្មទណ្ឌត្រូវយកមកអនុវត្តក្នុងគ្រប់កាលៈទេសៈរាប់ទាំងកាលៈទេសៈនៃប្រទេសដែលកំពុងរៀបចំការបោះឆ្នោតផងដែរ! ច្បាប់នេះអនុវត្តតែទៅលើអ្នកដែលប្រព្រឹត្តខុសនឹងច្បាប់តែប៉ុណ្ណោះ និងមានតែស្ថាប័នតុលាការទេ ដែលជាអ្នកស្វែងរក និងកំណត់ថា បុគ្គលណាមួយមានទោស ឬគ្មានទោសនោះ! សូមអាស៊ីសេរីកុំដើរតួជាតុលាការ!»។
ចែករំលែកព័តមាននេះ