ខេត្តស្ទឹងត្រែង ៖ បើគេចងចាំមិនភ្លេចនូវទឹកមុខសើចញញឹមរីករាយ និងសំឡេងទះដៃយ៉ាងទ្រហឹងរវាងបងប្អូនអាជីវករចំពោះសម្តេចកាលពីអំឡុងពាក់កណ្តាលឆ្នាំ២០១៦ ក្រោយអគ្គិភ័យឆេះផ្សារថ្មស្ទឹងត្រែងលោកបានសម្រេចសាងសង់ផ្សារថ្មីជូនដល់អាជីវករវិញស្ថិតនៅលើតូបទំហំតូចតាមតូច តូបធំតាមធំទៅ តាមចំនួនវិញ ក្រោមថវិកាផ្ទាល់របស់សម្តេចតេជោ ព្រមទាំងមិនយកពន្ធមួយចំនួនធំថែមទៀត។ ការផ្តួចផ្តើមរបស់សម្តេចបានជះការរំភើបដល់អាជីវករគ្រាយល់ស្របឯកភាពទទួលតាមសម្តេចទាំងស្រុង ហើយការងារសាងសង់ផ្សារបន្តធ្លាក់លើកម្លាំងកងវិស្វកម្ម ចំណែកបន្ទុកបែងចែកលើអាជ្ញាធរខេត្តបង្កើតគណៈកម្មការធ្វើការវាស់វែងដោះស្រាយ។
ប្រសិនគេក្រឡេកមើលរូបភាពថតពីលើអាគារផ្សារថ្មស្ទឹងត្រែងកាលពីមិនទាន់ឆេះគេ និងឃើញពីទំហំផ្ទៃតូបដោយមានតូច និងធំដូចក្នុងរូបភាពខាងលើ។ ក្រោយការដោះស្រាយតាមដំណាក់កាលពីវិធីមួយទៅវិធីមួយបន្តបន្ទាប់ អ្នកខ្លះបាត់ទំហំអ្នកខ្លះបាត់តូបក៏ផ្ទុះការតវ៉ាជារើយៗ ហើយប្រសិនបើមិនទទួលយកត្រូវអត់តូបលក់។ ជាក់ស្តែងតូបលោក ចាន់ ពិសិដ្ឋ និងប្រពន្ធ ឯល ទីរៀម ដែលទទួលបានពីការផ្ទេរកម្មសិទ្ធិពី ចែ ឥណ្ឌា សាខាគោយន្តគូបូតា មានទទឹង៤.៧៥ម៉ែត្រ និងបណ្តោយ៦.៦០ម៉ែត្រ ស្មើនឹង៣១.៣៥ការ៉េ ដែលកាលពីមុននោះតូបទំហំធំនេះគឺជាឃ្លាំងសម្រាប់ដាក់គ្រឿងសម្ភារគោយន្ត និងគ្រឿងដែកព្រមទាំងគ្រឿងអគ្គិសនីរបស់ ចែ ឥណ្ឌា សាខាក្រុមហ៊ុនគូបូតា។ លោក ចាន់ ពិសិដ្ឋ បានបញ្ជាក់ថា ក្រោយភ្លើងឆេះមានការរៀបចំប្រជុំដោយគណៈកម្មការដែលមានលោក ម៉ុម សារឿន ជាប្រធានគ្រានោះគណៈកម្មការបានចុះលេខប្រគល់ឲ្យអាជីវករឈ្មោះ ចាន់ ពិសិដ្ឋនិងប្រពន្ធ ឯល ទីរៀម ចំនួន៤តូបស្មើ១៦ការ៉េ ដោយទទួលយកមិនបាន និងមានការសម្របសម្រួលពិនិត្យផ្ទៀងផ្ទាត់ឡើងវិញ។ លោក សែន វុទ្ធី អ្នកឯកទេសកុំព្យួទ័រ និងជាជំនួយការលោកអភិបាលខេត្តបានបញ្ចូលទិន្នន័យចំនួន២តូបជាប់គ្នាលើទំហំចាស់ស្នើ៦តូប២៤ការ៉េ តែផ្តិតមេដៃទទួលយកបឋមមានលេខតែ៤តូបនៅមិនទាន់ចុះលេខ២តូបបន្ថែមលើការបញ្ចូលទិន្នន័យនៅឡើយដែរ។
គ្រានោះបានឯកភាពប្រគល់ឲ្យដោយលោក ម៉ុម សារឿន អភិបាលខេត្ត និងជាប្រធានគណៈកម្មការ ក្រោយមួយរំពេចលោក ម៉ែន គង់ នាយករងរដ្ឋបាលសាលាខេត្តទៅខ្សឹបដាក់ត្រចៀក លោក អភិបាលខេត្តត្រចៀកស សម្រេចដកយក២តូបវិញភ្លាមៗដោយគ្មានមូលហេតុ។ លោក ចាន់ ពិសិដ្ឋ និងប្រពន្ធ ឯល ទីរៀម មិនសុខចិត្តដោយសារទំហំផ្ទៃតូបចាស់ទទឹង៤.៧៥ម៉ែត្រ និងបណ្តោយ៦.៦០ម៉ែត្រ ស្មើ៣១.៣៥ការ៉េ គិតជាតូបជិត៨តូបបច្ចុប្បន្ន ត្រូវគណៈកម្មការសម្រេចប្រគល់ឲ្យ២៤ការ៉េស្មើ៦តូប ក្រោយមកក្រឡាស់សម្តីដកហូតយកទៅវិញបន្ថែមនៅត្រឹម១៦ការ៉េ ស្មើត្រឹម៤តូបបច្ចុប្បន្ន ដូច្នេះបាត់២តូបដែលបញ្ចូលទៅក្នុងទិន្នន័យ២តូបដែលមិនទាន់ចុះលេខប្រគល់ឲ្យនោះ។ លោកថាការសម្រេចរបស់គណៈកម្មការជ្រុលហួសហេតុពេកហើយ លោកបានសម្បទានអស់ទំហំជាច្រើនការ៉េទៅហើយ មកដកហូតបន្ថែមទៀត តើនេះជាសមជាការដោះស្រាយតាមអនុសាសន៍សម្តេចទេ។
លោក ញ៉ែម សារី អភិបាលរងខេត្តស្ទឹងត្រែងបានប្រាប់ឲ្យដឹងថាតូបពួកគាត់មិនមានទំហំទេ គណៈកម្មការបានចុះសាកសួរជុំវិញតូបពួកគាត់ហើយគេប្រាប់ថាតូបប៉ុនៗគ្នាប៉ុណ្ណោះហើយបើគាត់គិតថាមិនសមស្របគាត់អាចមកជួបខេត្តបានដោយភ្ជាប់មកជាមួយនូវលិខិតប្លង់វាយត្រាទទួលស្គាល់របស់អាជ្ញាធរក្រុងមក។ លោកអភិបាលរងបន្តថា ប្រសិនគាត់មកជួបខេត្តគេហ្នឹងដោះស្រាយជូន ហើយបើគាត់មិនព្រម និងមានកំណត់ហេតុចុងក្រោយ ឬគាត់អាចទៅប្តឹងតុលាការតែម្តងទៅ។ អ្នកស្រី ឯល ទីរៀម បានបញ្ជាក់ថា ពួកគាត់បានទៅជួបគណៈកម្មការដើម្បីជួយដោះស្រាយ ប៉ុន្តែពួកគាត់ឲ្យរង់ចាំ និងហាមមិនឲ្យធ្វើសន្និសីទកាសែតអ្វីមួយជាអ្នកសារព័ត៌មានពីរឿងផ្សារនេះដែរ។ ពួកគាត់បន្តថាការង់ចាំជាច្រើនខែ តែអស់លោកគណៈកម្មការព្រងើយកន្តើយមិនអើរពើទាល់តែសោះ។ អ្នកស្រីឲ្យដឹងថា ចំពោះប្លង់ផ្សារថ្មស្ទឹងត្រែងជាង១ពាន់តូបពុំមានអ្នកណាម្នាក់មានទំហំ និងបោះត្រាដឹងឮដោយអាជ្ញាធរក្រុងនោះទេ ចំណែកលោក សួង ហ៊ី អភិបាលរងក្រុងក៏បានលើកឡើងនៅក្នុងកិច្ចប្រជុំគណៈកម្មការថា អាជ្ញាធរក្រុងមិនដែលចេញប្លង់វាយត្រានោះដែរហើយចង់ដឹងគួរសួរម្ចាស់ដើមទៅដឹងច្បាស់ហើយ។
អ្នកស្រី ឯល ទីរៀម បន្ថែមថា កាលដែលអាជ្ញាធរខេត្តចាត់គណៈកម្មការចម្រុះចុះសាកសួរនោះគឺពួកគាត់មិនបានទៅសួរម្ចាស់ដើមផ្ទាល់នោះទេបែរមកសួរអ្នកក្បែរខាង ហើយលោក ញ៉ែម សារី អភិបាលរងខេត្តក៏បានអះអាងមកអាជីវករវិញដែរ លោកបានលើកឡើងថា ផ្ទះរបស់ខ្លួនមានតែម្ចាស់ទេដែលដឹងពីទំហំផ្ទះរបស់ខ្លួន ចំណែកអ្នកដទៃគ្មានអ្នកណាដឹងឡើយ។ អ្នកស្រីថាម្ចាស់តូមដើមចែ ឥណ្ឌា លក់គោយន្តគូបូតា គាត់រង់ចាំតែគណៈកម្មការសួរប៉ុណ្ណោះ ព្រោះជាឃ្លាំងស្តុកទំនិញរបស់គាត់យ៉ាងប្រាកដ។ លោក ចាន់ ពិសិដ្ឋ និងប្រពន្ធបានស្នើទៅគណៈកម្មការ ជួយដោះស្រាយបន្តដោយគ្រាន់ចង់បានតែមួយតូបទៀតប៉ុណ្ណោះគឺជាប់តូបហ៊ា យូ ចន្លោះជាប់តូបតាធៀមលក់មងដោយគាត់មិនខ្វល់ពីតូបនៅសល់ច្រើននោះទេក្រៅពីនេះពួកគាត់មិនទាមទារអ្វីទៀតឡើយ ចំណែកទំហំសេសសល់ពួកលោកសុខចិត្តសម្បទានឲ្យគណៈកម្មការចុះ។
បន្ទាប់ក្រោយធ្វើបទសម្ភាសន៍រវាងភ្នាក់ងារ កោះសន្តិភាព និងលោក ញ៉ែម សារី អភិបាលរងខេត្ត លោកបានសន្ទនាតាមទូរស័ព្ទជាមួយអ្នកស្រី ឯល ទីរៀមថា លោកបានជម្រាបលោកអភិបាលរួចហើយលោកអភិបាលខេត្តក៏បានឆ្លើយតបមកវិញដែរ បើផ្តល់បទសម្ភាសន៍ទៅអ្នកកាសែតឲ្យអ្នកកាសែតដោះស្រាយតូបឲ្យចុះ។ ទាំងនេះសបញ្ជាក់ថាការទទួលខុសត្រូវរបស់អាជ្ញាធរ និងគណៈកម្មការទំនងមានអ្វីអាថ៌កំបាំងនៅពីក្រោយ។ អ្នកស្រីបន្តថា ប្រសិនគណៈកម្មការមិនដោះស្រាយតាមការស្នើ ឬប្រុងមិនមានវិធីដោះស្រាយទេអ្នកស្រី និងបន្តស្នើរធ្វើបទសម្ភាសន៍គ្រប់ស្ថាប័នអង្គភាពសារព័ត៌មានកាសែត និងទូរទស្សន៍ឲ្យសម្តេចដឹងរឿងទាំងអស់អ្វីដែលគាត់បានដឹង៕
ចែករំលែកព័តមាននេះ