ខេត្តស្វាយរៀង ៖ សេចក្តីរាយការណ៍ឱ្យដឹងថា កំលាំងយោធាប្រចាំច្រកព្រំដែនវៀតណាម បានធ្វើការឆ្មក់ចូលក្នុងផ្ទះសំណាក់ យីហោ «ថៃអាង» កាលពីវេលាម៉ោង០៥ និង៤០នាទីល្ងាចថ្ងៃទី៣០ មេសា ស្ថិតនៅក្នុងបន្ទប់លេខ២ច្រកទ្វារមុកបាយវៀតណាម ក្រោយពីស្រាវជ្រាវ និងកំណត់មុខសញ្ញាថា មានការជួញដូរថ្នាំញៀននៅទីនោះ ។ ប៉ុន្តែការបង្ក្រាបនៅក្នុងផ្ទះសំណាក់ខាងលើ គឺត្រូវជនសង្ស័យរត់គេចបាត់មុន បន្សល់ទុកតែថ្នាំញៀនយ៉ាម៉ា50កញ្ចប់ (ស្មើ16,50kg) និងអត្តសញ្ញាណប័ណ្ណវៀតណាម២សន្លឹក។
ប្រភពបន្តថា ដំបូងឡើយខាងមន្ត្រីយោធាវៀតណាម បានចាប់ជនជាតិវៀតណាម២នាក់នៅចំណុចច្រកទ្វារព្រំប្រទល់មុខបាយ ដកហូតបានថ្នាំញៀន២គីឡូក្រាម ។ ក្រោយពីឃាត់ខ្លួនជនសង្ស័យ២នាក់ មន្ត្រីយោធាវៀតណាមបានជូនដំណឹង មកអធិការក្រុងបាវិតភ្លាមថា មានបក្សពួកជនសង្ស័យជួញដូរគ្រឿងញៀនមួយក្រុម កំពុងស្នាក់នៅក្នុងបន្ទប់លេខ២ ផ្ទះសំណាក់យីហោ «ថៃអាង»។
ពេលទទួលបាននោះភ្លាម កម្លាំងនគរបាលក្រុងបាវិត សហការជាមួយកម្លាំងជំនាញខេត្តស្វាយរៀង និងបានការសម្របសម្រួលពីស្ថាប័នអយ្យការ ក៏ឆ្មក់ចូលទៅឆែកឆេរផ្ទះសំណាក់ខាងលើ ស្រាប់តែរកឃើញថ្នាំញៀនប្រភេទយ៉ាម៉ា ចំនួន៥០កញ្ចប់ ស្មើនិង១៦គីឡូក្រាមកន្លះ និងអត្តសញ្ញណប័ណ្ណវៀតណាម២សន្លឹក ចំណែកម្ចាស់វាបានរត់គេចខ្លួនបាត់ ។ បើតាមសំដីអ្នកមើលការខុសត្រូវផ្ទះសំណាក់នោះប្រាប់ថា ជនសង្ស័យជាម្ចាស់ថ្នាំញៀនបានចេញផុត ប្រហែលជា១ម៉ោងមុននេះ។
ចែករំលែកព័តមាននេះ