តុលាការចាប់ផ្តើមសំណុំរឿងបន្លំចូលពន្ធនាគារ
រាជធានីភ្នំពេញ ៖ លោកស្រី មូរ សុខហួរ តំណាងរាស្ត្រគណបក្សសង្គ្រោះជាតិបានចូលទៅកាន់សាលាដំបូងរាជធានីនៅព្រឹកថ្ងៃទី២៨ មេសា
រាជធានីភ្នំពេញ ៖ លោកស្រី មូរ សុខហួរ តំណាងរាស្ត្រគណបក្សសង្គ្រោះជាតិបានចូលទៅកាន់សាលាដំបូងរាជធានីនៅព្រឹកថ្ងៃទី២៨ មេសា
រាជធានីភ្នំពេញ ៖ លោកស្រី មូរ សុខហួរ តំណាងរាស្ត្រគណបក្សសង្គ្រោះជាតិបានចូលទៅកាន់សាលាដំបូងរាជធានីនៅព្រឹកថ្ងៃទី២៨ មេសា តាមដីកាកោះដើម្បីឆ្លើយតបនឹងសំណួររបស់ព្រះរាជអាជ្ញារងលោក សៀង សុខ ក្នុងនាមជាសាក្សីលើសំណុំរឿងលោក ហួត ឃិនវុទ្ធី ហៅជុន ច័ន្ទបុត្រ នាយករងវិទ្យុអាស៊ីសេរីផ្នែកខេមរភាសាបន្លំចូលពន្ធនាគារព្រៃស កាលពីថ្ងៃទី១៩ មេសា ជាមួយប្រតិភូលោកស្រី ។
ក្រោយពេលចេញពីបន្ទប់សាកសួរ លោកស្រី មូរ សុខហួរ បានថ្លែងថា លោកស្រីបានចូលមកតាមដីកាកោះរបស់តុលាការក្រុងភ្នំពេញ ។ លោកស្រីថ្លែងថា៖ «ចម្លើយរបស់ខ្ញុំទាំងប៉ុន្មានខ្ញុំនិយាយការពិតទាំងអស់»។ នៅពេលអ្នកកាសែតសួរថា តើតុលាការសួរលោកស្រីពីអ្វីខ្លះដែរ? លោកស្រីបានឆ្លើយថា ទុកសំណួរទាំងនេះជូនទៅមេធាវីលោក សំ សុគង់ ឆ្លើយជំនួស ។
លោកមេធាវីបានលើកឡើងថា ព្រះរាជអាជ្ញារងបានសាកសួរសំណួរមួយចំនួនទាក់ទងនឹងការចោទប្រកាន់ទៅលើជនសង្ស័យ(លោក ជុន ច័ន្ទបុត្រ) តែមេធាវីសុំមិនឆ្លើយចំពោះចម្លើយដែលលោកស្រី មូរ សុខហួរ ឆ្លើយទៅកាន់តំណាងអយ្យការទេ ដោយសារតែដំណាក់កាលនេះជាដំណាក់កាលស៊ើបអង្កេតបឋម ។ បើយើងយកចម្លើយ យកអង្គហេតុមកនិយាយនៅពេលនេះវាហាក់បីដូចជាប៉ះពាល់ដល់ការស៊ើបអង្កេតរបស់អយ្យការ ។ លោក សំ សុគង់ បានលើកឡើងថា មេធាវីសុំរក្សាសិទ្ធិមិនឆ្លើយជាមួយអ្នកកាសែតទេ ។
នៅពេលសួរថា តើលោក ជុន ច័ន្ទបុត្រ ជាប់ពាក់ព័ន្ធជាជំនួយការរបស់លោកស្រី មូរ សុខហួរដែរឬទេ ? លោកមេធាវីបានលើកឡើងថា អ្វីដែលលោកស្រី មូរ សុខហួរ បានចូលបំភ្លឺនោះគឺឆ្លើយតែការពិតនូវអ្វីដែលលោកស្រីបានឃើញ បានឮ និងបានជួបដោយផ្ទាល់ប៉ុណ្ណោះ ។
សូមបញ្ជាក់ថា លោក ឡុង រី តំណាងរាស្ត្រគណបក្សសង្គ្រោះជាតិក៏បានចូលបំភ្លឺតុលាការ រួចហើយកាលពីថ្ងៃទី២៧ មេសា តាមដីកាកោះរបស់លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញចុះថ្ងៃទី២១ ខែមេសា ឆ្នាំ២០១៧ ក្នុងដំណើររឿងផ្តល់សេចក្តីប្រកាសភូតកុហក បន្លំចូលពន្ធនាគារព្រៃស កាលពីថ្ងៃទី១៩ មេសា ដើម្បីជួបអ្នកទោស១៦នាក់ ។
នៅឯតុលាការវេលាម៉ោង៩ព្រឹកថ្ងៃទី២៧ មេសា លោក ឡុង រី បានចូលតុលាការតាមទ្វារមុខចេញតាមទ្វារក្រោយ ។ ការដើរចូលតុលាការរបស់លោក ឡុង រី ក៏មានលោកមេធាវី សំ សុគង់ ទៅជាមួយ និងមានអ្នកគាំទ្រឈរនៅម្ខាងផ្លូវមុខតុលាការមួយចំនួនដឹកនាំដោយលោកហូរ វ៉ាន់ អ្នកតំណាងរាស្ត្រគណបក្សសង្គ្រោះផងដែរ ។
សំណុំរឿងនេះស្ថិតនៅលើលោក សៀង សុខ ព្រះរាជអាជ្ញារងនៃសាលាដំបូងរាជធានីភ្នំពេញធ្វើការសាកសួរ និងបានសួរចប់នៅវេលាម៉ោង១១ព្រឹកថ្ងៃដដែល ទើបអនុញ្ញាតឱ្យលោក ឡុងរី វិលត្រឡប់ទៅវិញជាធម្មតា ។
សូមបញ្ជាក់ថា លោក សៀង សុខ កាលពីថ្ងៃទី២១ មេសា បានចេញដីកាកោះហៅមនុស្សចំនួន៣នាក់ គឺលោកស្រី មូរ សុខហួរ លោក ឡុង រី ក្នុងនាមសាក្សី និងលោក ហួត ឃិនវុទ្ធី ហៅជុន ច័ន្ទបុត្រ ក្នុងនាមជនសង្ស័យ ដើម្បីសាកសួរពីដំណើររឿងផ្តល់សេចក្តីប្រកាសភូតកុហក បន្លំចូលក្នុងពន្ធនាគារ កាលពីថ្ងៃទី១៩ មេសា កន្លងមកនេះ ៕
ចែករំលែកព័តមាននេះ