ខេត្តឧត្តរមានជ័យ ៖ មនុស្សម្នាក់បានបាត់បង់ជីវិតចោលប្រពន្ធ និងកូន ផ្ទះ៨៧ខ្នង ត្រូវបានប៉ើងដំបូលនិងដួលរលំ ខណៈមានទឹកភ្លៀងធ្លាក់មួយមេធំលាយឡំដោយខ្យល់កន្ត្រាក់ រន្ទះបាញ់កាលពីវេលាម៉ោង៤ល្ងាច ថ្ងៃទី២៥ មេសា ២០១៧ ហេតុការណ៍នេះកើតឡើងទៅលើ៣ភូមិ ស្ថិតក្នុងសង្កាត់កូនគ្រៀល ក្រុងសំរោង ខេត្តឧត្តរមានជ័យ។ ប្រជាពលរដ្ឋដែលរងគ្រោះដោយធម្មជាតិនេះបានឱ្យដឹងថា មុនពេលកើតហេតុ មេឃមានកម្តៅយ៉ាងខ្លាំងស្ទើរតែអត់ទ្រាំមិនបាន តែក្រោយពីមានកម្តៅស្រាប់តែមេឃឡើងពពកពណ៌ខៅដុំៗងងឹត ស្រាប់តែបន្តិចក្រោយមកមានទឹកភ្លៀងធ្លាក់មួយមេធំ លាយឡំដោយមានខ្យល់កន្ត្រាក់ ហើយមានរន្ទះបាញ់បណ្តាលឱ្យមនុស្សម្នាក់បានស្លាប់ភ្លាមៗ ដោយឡែកផ្ទះជាច្រើនខ្នងរងការខូចខាត។
លោក អ៊ុង សុភ័ក្រ អភិបាលក្រុងសំរោងបានឱ្យដឹងថា គ្រោះធម្មជាតិនេះបានកើតឡើងទៅលើភូមិចំនួន៤ ដែលស្ថិតនៅក្នុងសង្កាត់កូនគ្រៀល ក្រុងសំរោង គឺភូមិខ្ទុម ភូមិថ្នល់បត់ ភូមិតាម៉ាន និងភូមិថ្មី ដែលរងការខូចខាត៨៧ខ្នងផ្ទះ ខណៈនោះដែរប៉ើងដំបូល៨៣ផ្ទះ ដួលរលំដល់ដីខូចខាតទាំងស្រុង២ខ្នង ធ្លាក់ពីលើជើងតាង២ខ្នងផ្ទះ រួមទាំងសម្ភារប្រើប្រាស់មួយចំនួនទៀត ដូចជាគោយន្តកន្ត្រៃ២គ្រឿងរងការខូចខាត ស្រូវចំនួន២០បាវ លើសពីនោះសម្ភារផ្សេងៗទៀត មនុស្សស្លាប់បាត់បង់ជីវិតម្នាក់ឈ្មោះ យ៉ុន មួត ភេទប្រុសអាយុ៦០ឆ្នាំ រស់នៅក្នុងភូមិខ្ទុម សង្កាត់កូនគ្រៀល ក្រុងសំរោង។
លោក អ៊ុង សុភ័ក្រ អភិបាលក្រុងបានមានប្រសាសន៍បន្តថា នៅព្រឹកថ្ងៃទី២៦ មេសា ២០១៧ នេះ ក្រុមការងារថ្នាក់ក្រុង និងខេត្តបាននាំយកជាអំណោយកាកបាទក្រហមកម្ពុជាខេត្តឧត្តរមានជ័យ ចែកជូនដល់គ្រួសារសព និងអ្នកដែលរងការខូចខាតលំនៅឋានធ្ងន់ចំនួន៤គ្រួសារ ដោយក្នុងមួយគ្រួសារទទួលបានអង្កចំនួន៥០គីឡូក្រាម មីមួយកេះ ទឹកត្រីមួយយួរ ទឹកស៊ីអីវមួយយួរ និងថវិកាមួយចំនួនទៀត។
លោកបានបញ្ជាក់ថា ពលរដ្ឋដែលទទួលរងគ្រោះដោយគ្រោះធម្មជាតិទាំង៨៧គ្រួសារនេះ លោកបានធ្វើជារបាយការណ៍ជូនទៅថ្នាក់ខេត្តហើយ ថ្នាក់ខេត្តនឹងបន្តទៅសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានឹងសង្ឃឹមថា នាពេលដ៏ខ្លីខាងមុខនេះ អាចក្រុមការងារសម្តេចពាំនាំមកចែកជូនប្រជាពលរដ្ឋជាក់ជាមិនខានឡើយ៕
ចែករំលែកព័តមាននេះ