អាល្លឺម៉ង់ ៖ តាមប្រភពពី Oddity Central ឱ្យដឹងថា ខោខូវប៊យស៊េរីថ្មីម៉ាក Barracuda Straight Leg ធ្វើឱ្យអ្នកពាក់មើលទៅហាក់បីដូចជាទើបតែទៅចូលទ្រុងជ្រូក ដូចប្រឡាក់ភក់ពេញខ្លួនអ៊ីចឹង ។
មិនដឹងជាម៉ូដអ្វី? ហាងលក់សម្លៀកបំពាក់ Nordstrom ដែលទទួលលក់ខោខូវប៊យនេះ បានសរសេរបង្ហោះក្នុងវ៉េបសាយរបស់ខ្លួនថា «ម៉ូដប្រឡាក់ភក់នេះនឹងធ្វើឲ្យលោកអ្នកមើលទៅដូចជាមនុស្សខិតខំធ្វើការ» ។ គួរបញ្ជាក់ដែរថា ខោម៉ូដមិនធម្មតាខាងលើ ផលិតដោយក្រុមហ៊ុនយីហោ PRPS ដែលជាក្រុមហ៊ុនជំនាញខាងផលិតខោខូវប៊យម៉ូដរហែកធ្លុះធ្លាយ ។
រូបថតបង្ហាញពីម៉ូដរបស់ខោ Barracuda Straight Leg បានធ្វើឲ្យមនុស្សជាច្រើនចូលមក comment បញ្ចើចបញ្ចាល ព្រោះតែវាមើលទៅដូចអាក្រក់មើលពេក ។ ម៉ូដប្រឡាក់ភក់ មិនសូវសំខាន់ទេ តែអ្វីដែលសំខាន់ គឺតម្លៃរបស់វា វាធ្វើឲ្យយើងញាក់សាច់តែម្តង ។
ខោមួយមានតម្លៃដល់ទៅ៤២៥ដុល្លារ ប្រសិនបើមានអ្នកចង់ទិញអាវម៉ូដអញ្ចឹងទៀត គេក៏មានអាវខូវប៊យលក់ដែរ ក្នុងតម្លៃដូចគ្នា។
បើមាននៅប្រទេសយើង តើលោកអ្នកចាប់អារម្មណ៍នឹងទិញទេ?
ចែករំលែកព័តមាននេះ