ខេត្តពោធិ៍សាត់ ៖ ស្ត្រីម្នាក់បានសម្រាលកូនតាមផ្លូវ ខណពេលត្រឡប់មកពីចំការជាមួយប្ដី និងប្អូន កាលពីវេលាម៉ោង១១និង៣០នាទីយប់ ថ្ងៃទី២៥ ខែមេសា ឆ្នាំ២០១៧ នៅលើផ្លូវជាតិលេខ៥៥ ស្ថិតក្នុង
ខេត្តពោធិ៍សាត់ ៖ ស្ត្រីម្នាក់បានសម្រាលកូនតាមផ្លូវ ខណពេលត្រឡប់មកពីចំការជាមួយប្ដី និងប្អូន កាលពីវេលាម៉ោង១១និង៣០នាទីយប់ ថ្ងៃទី២៥ ខែមេសា ឆ្នាំ២០១៧ នៅលើផ្លូវជាតិលេខ៥៥ ស្ថិតក្នុងភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់។
លោក ចាន់ សុខា មេបញ្ជាការមូលដ្ឋានកងរាជអាវុធហត្ថស្រុកភ្នំក្រវាញ បានឲ្យដឹងថា នៅយប់នោះ រូបលោកបានដឹកនាំកម្លាំងដើរល្បាតតាមផ្លូវ ដើម្បីរក្សាសន្តិសុខជូនប្រជាពលរដ្ឋ។ ពេលទៅដល់ភូមិព្រែក១ ឃុំសំរោង ស្រាប់តែឃើញមនុស្ស០៣នាក់កំពុងនៅជុំគ្នាទាំងកណ្ដាលយប់ ក៏នាំគ្នាទៅព័ទ្ធដោយស្មានថា ជាករណីចោរប្លន់ គ្រឿងញៀន គ្រោះថ្នាក់ចរាចរណ៍ ឬក៏ករណីចាប់រំលោភជាដើម ប៉ុន្តែពេលទៅដល់បែរជាស្ត្រីម្នាក់កំពុងឈឺពោះកើតកូនទៅវិញ។ ភ្លាមៗនោះលោកបានជួយអន្តរាគមន៍ដឹកទៅកាន់មន្ទីរពេទ្យ ប៉ុន្តែមិនទាន់បានដឹកផង ស្រាប់តែស្ត្រីរូបនោះសម្រាលកូនបាត់ទៅហើយ។ ពេលនោះលោកបានទំនាក់ទំនងទៅមន្ទីរពេទ្យ ដើម្បីឲ្យគ្រូពេទ្យមកជួយអន្តរាគមន៍តាមបច្ចេកទេសចៀសវាងជួបគ្រោះថ្នាក់ជាយថាហេតុ។
ទោះយ៉ាងណាទារិកាដែលកើតមកនោះមានសុខភាពល្អធម្ម តាហើយស្ត្រីជាម្ដាយក៏ឆ្លងផុតពីគ្រោះថ្នាក់ដែរ ដោយសារគ្រូពេទ្យបានជួយសង្គ្រោះទាន់ពេលវេលា។ ស្ត្រីដែលសម្រាលកូនតាមផ្លូវនេះឈ្មោះ ឯល នឿន អាយុ៣៤ឆ្នាំ មានទីលំនៅភូមិដប់បាត សង្កាត់លលកស ធ្វើការចំការនៅឯជើងភ្នំស្រុកភ្នំក្រវាញ។ ឥឡូវនេះទាំងម្ដាយ និងកូនកំពុងសម្រាកព្យាបាលនៅមន្ទីរពេទ្យបង្អែកស្រុកភ្នំក្រវាញ។
លោកវេជ្ជបណ្ឌិតច័ន្ទ សុខាប្រធានមន្ទីរពេទ្យបង្អែកខេត្តពោធិ៍សាត់អំពាវនាវដល់ស្ត្រីមានផ្ទៃពោះគ្រប់រូបត្រូវនាំគ្នាទៅពិនិត្យផ្ទៃពោះឲ្យបានញឹកញាប់នៅតាមមណ្ឌលសុខភាពឃុំនិងមន្ទីរពេទ្យបង្អែកស្រុកដើម្បីពិគ្រោះយោបល់ជាមួយគ្រូពេទ្យជំនាញហើយនៅពេលជិតគ្រប់ខែសូមកុំទៅណាឆ្ងាយពីផ្ទះនិងមន្ទីរពេទ្យចៀសវាងជួបគ្រោះថ្នាក់តាមផ្លូវដោយការសម្រាលកូនគ្មានគ្រូពេទ្យបែបនេះ៕
ចែករំលែកព័តមាននេះ