កម្ពុជា -វៀតណាម ភាគីទាំង2បានសម្រេចចុះហត្ថលេខាលើពិធីសារចំនួន4
រាជធានីភ្នំពេញ ៖ នៅថ្ងៃទី២៥ ខែមេសា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
រាជធានីភ្នំពេញ ៖ នៅថ្ងៃទី២៥ ខែមេសា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
រាជធានីភ្នំពេញ ៖ នៅថ្ងៃទី២៥ ខែមេសា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានជួបប្រជុំពិភាក្សាការងារជាផ្លូវការជាមួយ លោក ង្វៀន សួនហ្វ៊ុក (Nguyen Xuan Phuc) នាយករដ្ឋមន្ត្រីនៃសាធារណរដ្ឋសង្គមនិយមវៀតណាម នៅវិមានសន្តិភាព ។
លោក ង្វៀន សួនហ្វ៊ុក បានចាត់ទុកទស្សនកិច្ចនេះ ជាការរឹតបន្តឹងបន្ថែមទៀតនូវទំនាក់ទំនងមិត្តភាពដែលមានរយៈពេល៥០ឆ្នាំមកហើយ ហើយដែលត្រូវផ្លាស់ប្តូរទស្សនកិច្ចក្នុងកម្រិតប្រមុខថ្នាក់ដឹកនាំនៃប្រទេសទាំងពីរជាបន្តទៀត ។ លោកនាយករដ្ឋមន្ត្រីវៀតណាមបានអបអរសាទរ និងកោតសរសើរការរីកចម្រើនរបស់កម្ពុជា រួមមានកំណើនសេដ្ឋកិច្ច ស្ថិរភាពសង្គម សន្តិភាព និងវិស័យផ្សេងៗជាច្រើនទៀត ក្រោមការដឹកនាំរបស់សម្តេចតេជោ ហ៊ុន សែន ។
ពាក់ព័ន្ធនឹងការងារព្រំដែន រដ្ឋាភិបាលប្រទេសទាំង២បានឯកភាពគ្នា ដោយអនុញ្ញាតឱ្យគណៈកម្មការព្រំដែនបន្តធ្វើការជាមួយគ្នា ក្នុងនោះរដ្ឋាភិបាលនៃប្រទេសទាំង២នឹងបន្តកសាងស្ពាននៅតំបន់ផ្សេងទៀត ដើម្បីផលប្រយោជន៍ នៃប្រជាជនប្រទេសទាំងសងខាង។ លោកនាយករដ្ឋមន្ត្រីវៀតណាមបានផ្តល់ថវិកា២លានដុល្លារសម្រាប់សាងសង់ផ្សារដានៅខេត្តត្បូងឃ្មុំ ជាផ្សារមួយដ៏សំខាន់សម្រាប់បងប្អូនប្រជាពលរដ្ឋរកស៊ីតាមព្រំដែន ដែលនឹងចាប់កសាងនៅពេលដ៏ខ្លីខាងមុខ ។
សម្តេចតេជោនាយករដ្ឋមន្ត្រី ហ៊ុន សែន បានកោតសរសើរការរីកចម្រើនសេដ្ឋកិច្ចរបស់វៀតណាម និងទំហំពាណិជ្ជកម្មដែលវៀតណាមបាននាំចេញ ។ សេដ្ឋកិច្ចវៀតណាមរីកលូតលាស់ពេលនេះ ក៏បានរួមចំណែកជួយដល់កម្ពុជាផងដែរ តាមរយៈក្រុមហ៊ុនវៀតណាមមួយចំនួនមកបណ្តាក់ទុននៅកម្ពុជា ។ នាយករដ្ឋមន្ត្រីនៃប្រទេសទាំងពីរ បានប្តេជ្ញាបន្តជំរុញឱ្យទំហំសេដ្ឋកិច្ចបានកើនឡើងដល់៥ពាន់លានដុល្លារអាមេរិកនៅពេលខាងមុខ ។
សម្តេចតេជោ បានជំរុញឱ្យនាយករដ្ឋមន្ត្រីវៀតណាម ធ្វើយ៉ាងណាឱ្យពាណិជ្ជកម្មតាមព្រំដែនមានភាពរលូន ដើម្បីឱ្យប្រជាជន ដែលកំពុងរកទទួលទានតាមព្រំដែនកាន់តែងាយស្រួល ។
សម្តេចតេជោ បន្តខិតខំកសាងធ្វើឱ្យតំបន់ព្រំដែននៃប្រទេសទាំងពីរមានសុខសន្តិភាព និងរីកចម្រើនក្នុងនាមជាប្រទេសភូមិផងរបងជាមួយ ។ ចំពោះវិស័យទេសចរណ៍ សម្តេចតេជោក៏បានលើកទឹកចិត្តឱ្យភ្ញៀវទេសចរ និងអ្នកវិនិយោគវៀតណាម បន្តមកទស្សនានិងវិនិយោគនៅប្រទេសកម្ពុជា ខណៈដែលភ្ញៀវទេសចរវៀតណាមមកកម្ពុជាក្នុង១ឆ្នាំជាង១លាននាក់។
ជាមួយគ្នានេះ សម្តេចតេជោក៏បានអរគុណរដ្ឋាភិបាលវៀតណាម ដែលកន្លងមកបានផ្តល់អាហារូបករណ៍មួយចំនួនដល់និស្សិតកម្ពុជាបានទៅសិក្សានៅប្រទេសវៀតណាមផងដែរ ។
ក្រោយពីបញ្ចប់កិច្ចប្រជុំផ្លូវការហើយ ប្រមុខដឹកនាំនៃប្រទេសទាំង២ បានអញ្ជើញជាអធិបតីដ៏ខ្ពង់ខ្ពស់នៅក្នុងពិធីចុះហត្ថលេខាលើអនុស្សរណៈនៃការយោគយល់(MOU)ចំនួន៤រួមមាន ៖
១-អនុស្សរណៈនៃការយោគយល់គ្នា អំពីការសិក្សារួមស្តីពីការសាងសង់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនហូជីមិញ-ម៉ុកបៃ ដែលចុះហត្ថលេខាដោយលោក ទ្រឿង ក្វាងង្វៀង រដ្ឋមន្ត្រីក្រសួងដឹកជញ្ជូនវៀតណាម និងលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូនកម្ពុជា ។
២-អនុស្សរណៈនៃការយោគយល់គ្នាស្តីអំពីគម្រោងសាងសង់មជ្ឈមណ្ឌលផ្តល់សេវាដោយស្ម័គ្រចិត្ត និងផ្អែកលើសហគមន៍ដល់អ្នកញៀនគ្រឿងញៀននៅខេត្តព្រះសីហនុ ដែលចុះហត្ថលេខាដោយលោក ង្វៀន ជុងដាម អនុរដ្ឋមន្ត្រីក្រសួងការងារ យុទ្ធជនពិការ និងកិច្ចការសង្គម វៀតណាម និងលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាកម្ពុជា ។
៣-អនុស្សរណៈបន្តសុពលភាពនៃអនុស្សរណៈស្តីពីកិច្ចសហប្រតិបត្តិការទ្វេភាគីលើវិស័យជលផល ដែលចុះហត្ថលេខាដោយលោក ឡេ គួកហ្ស័ញ អនុរដ្ឋមន្ត្រីក្រសួងកសិកម្ម និងអភិវឌ្ឍន៍ជនបទវៀតណាម និងលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកម្ពុជា ។
៤-អនុស្សរណៈនៃការយោគយល់គ្នាស្តីអំពីការគាំទ្រការសាងសង់មហាវិថីមិត្តភាពភ្នំពេញ -ហាណូយ ដែលចុះហត្ថលេខាដោយលោក ងូ វ៉ាន់ហ្វី អនុប្រធានគណៈកម្មាធិការប្រជាជនក្រុងហាណូយ និងលោក ប៉ា សុជាតិវង្ស អភិបាលរាជធានីភ្នំពេញ ។
បន្ទាប់ពីកិច្ចប្រជុំផ្លូវការ និងពិធីចុះហត្ថលេខានាព្រឹកនេះរួចមក សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត នឹងផ្តល់កិត្តិយសរៀបចំពិធីលៀងសាយភោជន៍ជូនដល់លោកនាយករដ្ឋមន្ត្រីវៀតណាម និងលោកជំទាវ ព្រមទាំងគណៈប្រតិភូវៀតណាមនៅវិមានសន្តិភាពនាល្ងាចថ្ងៃដដែល ៕
ចែករំលែកព័តមាននេះ