រាជធានីភ្នំពេញ ៖ អាជ្ញាធររាជធានីភ្នំពេញអះអាងថា ក្នុងរយៈពេលប៉ុន្មានឆ្នាំកន្លងមកនេះ រដ្ឋបាលរាជធានីភ្នំពេញបានខិតខំរៀបចំប្រព័ន្ធលូសម្រួលផ្លូវទឹក នៅតាមតំបន់មួយចំនួនដែលតែងតែលិចលង់ ដោយជំនន់ទឹកភ្លៀងប្រមាណជិត៣០ទីតាំង ឱ្្យមានភាព
រាជធានីភ្នំពេញ ៖ អាជ្ញាធររាជធានីភ្នំពេញអះអាងថា ក្នុងរយៈពេលប៉ុន្មានឆ្នាំកន្លងមកនេះ រដ្ឋបាលរាជធានីភ្នំពេញបានខិតខំរៀបចំប្រព័ន្ធលូសម្រួលផ្លូវទឹក នៅតាមតំបន់មួយចំនួនដែលតែងតែលិចលង់ ដោយជំនន់ទឹកភ្លៀងប្រមាណជិត៣០ទីតាំង ឱ្្យមានភាពប្រសើរឡើង គឺនៅសល់ប្រមាណជា៥ ឬ៦ទីតាំងទៀតទេកំពុងអនុវត្តបន្ត ហើយសង្ឃឹមថា តំបន់ទាំងនោះ មិនមានការលិចលង់ទៀតទេ បើទោះបីថា លិចក៏មិនលិចយូរដែរ បន្ទាប់ពីស្ថានីយបូមទឹកថ្មីបើកឱ្យដំណើរការនោះ ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា សំណង់ស្ថានីយបូមទឹកថ្មីទួលគោកទី២ត្រឡោកបែក ស្ថិតក្នុងសង្កាត់បឹងកក់២ ខណ្ឌទួលគោក ដែលរដ្ឋបាលរាជធានីភ្នំពេញ បើកការដ្ឋានសាងសង់ កាលពីកន្លងមកនោះ ពេលនេះស្ថាបនារួចរាល់ហើយ នៅសល់តែការតភ្ជាប់ ម៉ូទ័របូមទឹក និងប្រពន្ធ័អគ្គិសនី ដែលក្រុមការងារកំពុងតម្លើង និងគ្រោងដាក់ឲ្យដំណើរការក្នុងខែឧសភាឆាប់ៗនេះ ដើម្បីបូមទឹករំដោះចេញពីតំបន់ទួលគោក ត្រឡោកបែកលើផ្ទៃដីជាង១៨៤ហិកតាដែលធ្លាប់លិច ដោយជំនន់ទឹកភ្លៀងនាពេលកន្លងមក ។
លោកបន្តថា ស្ថានីយថ្មីនេះ មានសមត្ថភាពបូមទឹក៥ម៉ែត្រគូប ក្នុង១វិនាទី គឺកើន៣ដង បើធៀបទៅនឹងស្ថានីយបូមទឹកចាស់ ដែលអាចដោះស្រាយបញ្ហាទឹកលិចនៅតំបន់ផ្សារមាន់អាំង វិទ្យាល័យឥន្ទ្រទេវី ផ្លូវលេខ៥៩២ ផ្លូវលេខ៣១៧ ផ្លូវលេខ៣១៥ ផ្លូវលេខ៣១៣ ផ្លូវលេខ ៦០៨ ផ្លូវលេខ៣៣៧ និងតំបន់មួយចំនួនទៀតក្នុងសង្កាត់បឹងកក់ទី២ ខណ្ឌទួលគោកតែម្តង ។
សូមបញ្ជាក់ថា ស្ថានីយទួលគោកទី២នេះ ជាស្ថានីយមួយ ក្នុងចំណោមស្ថានីយថ្មីទាំង៣ ដែលរដ្ឋបាលរាជធានីភ្នំពេញ ដាក់ឲ្យដំណើរការជាបន្តបន្ទាប់ គឺស្ថានីយទួលគោកទី១ និងស្ថានីយបឹងត្របែក រួមទាំងការស្តារប្រឡាយសំខាន់ៗមួយចំនួនទៀត ដូចជាប្រឡាយបាក់ទូក, ប្រឡាយបឹងត្របែក, ប្រឡាយបឹងទំពន់ រួមទាំងការបើកមុខទឹកជាច្រើនកន្លែងទៀត ដើម្បីនាំទឹកចេញក្រៅ កាត់បន្ថយការលិចលង់ ក្នុងក្រុងឲ្យនៅកំរិតទាបបំផុត ។
ចែករំលែកព័តមាននេះ