រាជធានីភ្នំពេញ ៖ ស្ត្រី២នាក់ចេញពីធ្វើការជិះម៉ូតូបំរុងទៅញាំអាហារនៅម្ដុំមុខព្រះបរមរាជវាំងត្រូវជនសង្ស័យឆក់កាបូបដែលដាក់នៅកន្លែងដាក់ជើងលើម៉ូតូបានសំរេចដោយសុវត្ថិភាព
រាជធានីភ្នំពេញ ៖ ស្ត្រី២នាក់ចេញពីធ្វើការជិះម៉ូតូបំរុងទៅញាំអាហារនៅម្ដុំមុខព្រះបរមរាជវាំងត្រូវជនសង្ស័យឆក់កាបូបដែលដាក់នៅកន្លែងដាក់ជើងលើម៉ូតូបានសំរេចដោយសុវត្ថិភាព បង្កការភ្ញាក់ផ្អើលកាលពីវេលាម៉ោង៩និង៣០នាទីយប់ថ្ងៃទី២៥ ខែមេសា ឆ្នាំ២០១៧ ស្ថិតតាមបណ្ដោយផ្លូវកម្ពុជាក្រោមកែងនឹងផ្លូវ១០៩ ស្ថិតក្នុងសង្កាត់មិត្តភាព ខណ្ឌ៧មករា ។ នារីរងគ្រោះមានឈ្មោះ ផល អាយុ២៥ឆ្នាំ ជាកម្មការិនីរោងចក្រ ស្នាក់នៅម្ដុំទឹកថ្លា សង្កាត់ទឹកថ្លា ខណ្ឌសែនសុខ ។
តាមប្រភពព័ត៌មានពីស្ត្រីរងគ្រោះបានឱ្យដឹងថា មុនពេលកើតហេតុរូបនាង និងមិត្តភក្ដិដែលទើបតែចេញពីធ្វើការដោយជិះម៉ូតូម៉ាកស្កូពី ពណ៌ស ពាក់ស្លាកលេខ ភ្នំពេញ 1BZ-2912 តាមផ្លូវកម្ពុជាក្រោមក្នុងទិសដៅពីលិចទៅកើតគោលបំណងទៅញាំអាហារនៅមុខព្រះបរមរាជវាំង លុះជិះដល់ចំណុចកើតហេតុ ស្រាប់តែមានជនសង្ស័យមួយក្រុមជិត១០នាក់ជិះម៉ូតូ៥គ្រឿងបានធ្វើសកម្មភាពលូកឆក់កាបូបដែលនារីរងគ្រោះបានដាក់នៅកន្លែងជើងជាន់ម៉ូតូរបស់ខ្លួនយកទៅបានសំរេចដោយសុវត្ថិភាព ។
បើតាមការប្រាប់ពីនារីរងគ្រោះបានឱ្យដឹងថា នៅក្នុងកាបូបរបស់ខ្លួនដែលត្រូវចោរឆក់បានសំរេចនោះមានដូចជា អាយផេត១គ្រឿង កាតធនាគារ១ អត្តសញ្ញាណប័ណ្ណ និងលុយមួយចំនួនផងដែរ ។ ក្រោយពេលកើតហេតុមានប្រជាពលរដ្ឋដែលបានឃើញហេតុការណ៍នោះបានធ្វើការប្រដេញម៉ូតូមួយគ្រឿងម៉ាកលែត ពណ៌ខ្មៅ ពាក់ស្លាកលេខ ភ្នំពេញ 1BZ-3648 ដែលជិះដោយយុវជនពីរនាក់ហើយត្រូវបានសង្ស័យថា ជាបក្សពួកជនដៃដល់ដែលបានជិះម៉ូតូបិទគូទពីក្រោយត្រូវបានសមត្ថកិច្ចនាំយកទៅសាកសួរនៅប៉ុស្ដិ៍នគរបាលរដ្ឋបាលមិត្តភាព ។
ក្រោយពីធ្វើការសាកសួររបស់សមត្ថកិច្ចរួចមកដោយពិនិត្យឃើញថា ជនសង្ស័យទាំងពីរនាក់នោះមិនមែនជាជនដៃដល់នោះទេក៏បានឱ្យអ្នកទាំងពីរនោះត្រលប់ទៅផ្ទះវិញ ចំណែកឯនារីរងគ្រោះបានត្រឹមតែដាក់ពាក្យបណ្ថឹងនៅប៉ុស្ដិ៍នគរបាលរដ្ឋបាលដើម្បីកំណត់មុខសញ្ញាតែប៉ុណ្ណោះ ៕
ចែករំលែកព័តមាននេះ