រាជធានីភ្នំពេញ ៖ ក្រសួងវប្បធម៌ និងវិចិត្រសិល្បៈ បានសម្រេចហាមមិនឱ្យតារាសម្តែងនាង ដេនីក្វាន់ ប្រឡូកក្នុងសិល្បៈបន្តទៀត ក្នុងរយៈពេល១ឆ្នាំ ក្នុងពេលដែលតារារូបនេះ បានធ្វើសកម្មភាពផ្គើនទៅនឹងការណែនាំរបស់ក្រសួង «រឿងបញ្ចេញរូបសិចស៊ីហួសប្រមាណ» ។
សេចក្តីសម្រេចនេះ បានធ្វើឡើងក្នុងកិច្ចប្រជុំមួយ ជាមួយក្រុមប្រឹក្សាពិន័យរបស់ក្រសួងវប្បធម៌ និងវិចិត្រសិល្បៈ កាលពីព្រឹកថ្ងៃទី២៥ មេសា នេះ។ ក្នុងកិច្ចប្រជុំ បានធ្វើឡើងដោយមិនមានវត្តមានចូលរួមពីនាង ដេនីក្វាន់ នោះឡើយ ប៉ុន្តែក្រុមប្រឹក្សាដាក់ពិន័យបានពិភាក្សាជាមួយអ្នកប្រឹក្សាផ្នែកច្បាប់បានចូលរួមបានសម្រេចដាក់ពិន័យលើតារារូបនេះចំនួន៣ចំណុច ។
លោកចំរើន វ៉ាន់ថា ទីប្រឹក្សាក្រសួងវប្បធម៌ និងវិចិត្រសិល្បៈបានអះអាងប្រាប់កោះសន្តិភាពតាមទូរស័ព្ទថា យើងបានពិភាក្សាគ្នាយ៉ាងល្អិតល្អន់ ជាមួយក្រុមប្រឹក្សាពិន័យជាមួយអ្នកប្រឹក្សាផ្នែកច្បាប់ ដោយក្នុងនោះយើងបានសម្រេចដាក់ពិន័យលើនាង ដេនីក្វាន់ចំនួន៣ចំណុច មានទី១-គឺហាមមិនឱ្យតារារូបនេះ ដាច់ខាតក្នុងការឈានជើងចូលក្នុងវិស័យសិល្បៈរយៈពេល១ឆ្នាំ។ ទី២-ក្នុងករណីដែលតារារូបនេះ នៅមិនរាងចាល ក្រសួងនឹងស្នើសុំទៅដល់ម្ចាស់ផលិតកម្មនានា មិនឱ្យហៅតារារូបនេះ យកទៅសម្តែងបន្តទៀតឡើយ និងទី៣-ហាមដាច់ខាត មិនឲ្យមានការចាក់ផ្សាយរាល់ស្នាដៃរបស់នាងដេនីក្វាន់ឡើយ ក្នុងពេលដែលតារារូបនេះកំពុងតែជាប់ក្នុងពិន័យ ។
ត្រង់ចំណុចទាំងនេះ លោកចំរើន វ៉ាន់ថា បានបញ្ជាក់ថា យើងបានហាមឃាត់ តែស្នាដៃដែលដេនីក្វាន់បានថតនៅក្រោយការផាកពិន័យប៉ុណ្ណះ ចំណែកស្នាដៃដែលនាងបានថតមុនសេចក្តីសម្រេចផាកពិន័យបានចេញជាផ្លូវការនោះ គឺយើងអនុញ្ញាតឲ្យមានការចាក់ផ្សាយដដែល ។
បើតាមលោកចំរើន វ៉ាន់ ថា សេចក្តីសម្រេចក្នុងការដាក់ពិន័យនេះ នឹងចេញជាផ្លូវការក្នុងពេលឆាប់ៗនេះ តាមតែអាចធ្វើទៅបាន ប៉ុន្តែយើងបើកសិទ្ធិចំពោះការតវ៉ាណាមួយពីនាងដេនីក្វាន់ ហើយបើច្បាប់បានធ្វើហើយ គឺត្រូវតែអនុវត្ត ។ លោកបានបន្ថែមថា ការដាក់ពិន័យទៅលើតារាសម្តែងនាងដេនីក្វាន់ នាពេលនេះ គឺយើងបានធ្វើការពិភាក្សាគ្នាយ៉ាងល្អិតល្អន់ មុនពេលចេញសេចក្តីសម្រេចរួមមួយ ព្រោះករណីរបស់តារារូបនេះ មិនមែនកើតឡើងតែម្តងនោះឡើយ ហើយកន្លងមកតារារូបនេះ ក៏បានទទួលការណែនាំពីក្រសួងម្តងរួចមកហើយ ប៉ុន្តែតារារូបនេះនៅតែប្រព្រឹត្តផ្ទុយ ។
ចែករំលែកព័តមាននេះ