រាជធានីភ្នំពេញ ៖ មានករណីទុស្សេខ្សែភ្លើងមួយបានបង្កឡើងដោយមានអណ្តាតភ្លើងឆេះ និងផ្សែងខ្មៅហុយទ្រលោមនៅហាងកាហ្វេ (ដេលី កាហ្វេ) បង្កឱ្យមានការភ្ញាក់ផ្អើលយ៉ាងខ្លាំងទៅដល់ភ្ញៀវ និងបុគ្គលិករត់ចែកជើងគ្នា សំណាងល្អត្រូវបានបុគ្គលិកនាំគ្នាយកបំពង់ពន្លត់អគ្គិភ័យទៅបាញ់ពន្លត់ និងបិទបារ៉ែតភ្លើងទាន់ពេលវេលា។ ហេតុការណ៍នេះដែរបានកើតឡើងកាលពីវេលាម៉ោង៥ និង ៣៥នាទីល្ងាច ថ្ងៃទី២៤ ខែមេសា ឆ្នាំ២០១៧ នៅហាងកាហ្វេយីហោ (ដេលី កាហ្វ) ផ្ទះលេខ២០២-២០៤ ផ្លូវព្រះសីហនុ កែងនឹងផ្លូវលេខ១១៣ ក្នុងសង្កាតបឹងកេងកងទី២ ខណ្ឌចំការមន។
តាមប្រភពព័ត៌មានពីនគរបាលមូដ្ឋានបានប្រាប់ឱ្យដឹងថា មុនពេលកើតហេតុ ក្រុមបុគ្គលិកដែលបម្រើការងារនៅក្នុងហាងកាហ្វេ ដេលី បានឃើញអណ្តាតភ្លើងឆាបឆេះ និងផ្សែងខ្មៅហុយទ្រលោម ចេញពីក្នុងពីដានហាង ក៏នាំគ្នាមានការភ្ញាក់ផ្អើល និងឆោឡោឡើង រួមទាំងភ្ញៀវជាច្រើននាក់ដែលកំពុងតែអង្គុយផឹកកាហ្វេនៅខាងក្នុងនាំគ្នារត់ចែកជើងគ្នាចេញប្រសាចចេញផងដែរ។ ភ្លាមនោះ ក្រុមបុគ្គលិក និងអ្នកដែលមានទីលំនៅក្បែរខាងក៏បាននាំគ្នារត់ទៅយកបំពង់ពន្លត់អគ្គិភ័យជាច្រើនបំពង់មកបាញ់ពន្លត់ និងបិទបារ៉ែតភ្លើងកុំឲ្យឆេះបន្តទៅទៀតទាន់ពេលវេលា។
តាមប្រភពដដែលបានប្រាប់បន្តទទៀតថា ករណីទុស្សេខ្សែភ្លើងនេះដែរបានកើតឡើងនៅក្នុងប្រអប់ភ្លើងលេខ OP ៦៣-១១៤ ដោយសារតែការឆ្លងចរន្តអគ្គិសនីឆេះសំណុំខ្សែភ្លើងមួយដុំធំ ដែលគេបានដាក់បង្កប់នៅក្នុងពិដានទៅតាមផ្ទះជាច្រើនដែលនៅក្បែរខាងនោះ។ ក្នុងហេតុការណ៍ទុស្សេខ្សែភ្លើងបង្កជាអគ្គិភ័យនៅហាងកាហ្វេ ដេលី នេះដែរ ត្រូវបានគេប្រើប្រាស់បំពង់ពន្លត់អគ្គិភ័យអស់ចំនួន ៣បំពង់ និងបិទបារ៉ែតភ្លើង ដើម្បីកុំឲ្យមានការឆាបឆេះរីករាលដាលជាបន្តទៅទៀតបានទាន់ពេលវេលា សំណាងល្អមិនបង្កឲ្យមានគ្រោះអគ្គិភ័យកើតឡើងធំជាងនេះ៕
ចែករំលែកព័តមាននេះ