រាជធានីភ្នំពេញ ៖ កាន់តែដុនដាប ហើយក៏ស្លាប់ទៅ គឺជាស្ថានភាពនៃជីវិតរបស់ភរិយាលោករិន សាវ៉េត ដែលមិនអាចយកឈ្នះជំងឺមហារីកសុដន់បាន ។ សពត្រូវបាននាំយកទៅតម្កល់ធ្វើបុណ្យនៅស្រុកត្រាំកក់ ខេត្តតាកែវ ជាកន្លែងកំណើតរបស់នាង ។
ប្រពន្ធរបស់លោករិន សាវ៉េត បានស្លាប់ក្រោយពីសម្រាកព្យាបាលជាច្រើនខែ ។ នាង មានជំងឺមហារីកសុដន់កម្រិតធ្ងន់ ហើយព្យាបាលតាំងពីចុងឆ្នាំ២០១៦ រហូតទល់ពេលនេះ ។ ការលាចាកលោករបស់អ្នកស្រីគង់ សាវី អាយុ៣៧ឆ្នាំ ធ្វើឱ្យស្វាមីលោករិន សាវ៉េត តក់ស្លុត និងសោកស្តាយយ៉ាងខ្លាំង ។ សិល្បករ និងមហាជនក៏ចូលរួមសោកស្តាយជាមួយលោករិន សាវ៉េត ដែរ ។
ក្រោយពេលទទួលមរណភាពកាលពីថ្ងៃទី២៣ មេសា ២០១៧ វេលាម៉ោងជាង៣រសៀលនៅមន្ទីរពេទ្យមិត្តភាពកម្ពុជា-សូវៀតហៅពេទ្យរុស្ស៊ី លោករិន សាវ៉េត បាននាំសពភរិយាតាមរថយន្តពេទ្យយកទៅធ្វើបុណ្យនៅស្រុកត្រាំកក់ ខេត្តតាកែវ ដោយគ្រូពេទ្យចាក់បារ៉ត សម្រាប់រក្សាទុករយៈពេល៥ថ្ងៃ ។
លោករិន សាវ៉េត និយាយថា «មុនពេលប្រពន្ធខ្ញុំឈឺ ដុនដាបទៅៗ គាត់តែងតែគិតដល់កូនប្រុសរបស់គាត់ដែលនៅតូច ដោយរមែងនិយាយឱ្យខ្ញុំជាប្តី ទោះបីយ៉ាងណា កុំចោលកូន ជួយមើលថែកូន និងចិញ្ចឹមកូនឱ្យមានអនាគតល្អ សមជាទឹកចិត្តរបស់ឪពុក ។ មូលហេតុបែបនេះហើយខ្ញុំគ្មានអ្វីក្រៅពីខំធ្វើតួនាទីជាឪពុកល្អប្តីល្អដែលបានតាំងចិត្តដើម្បីឱ្យភរិយាស្ងប់ចិត្ត និងធ្វើប្តីល្អដូចបុរសទូទៅដូចគេឯង » ។
ភរិយាលោករិន សាវ៉េត ពីដំបូងអាការ មិនសូវធ្ងន់ទេ ប៉ុន្តែក្រោយចាក់ថ្នាំគីមីបន្ថែមដើម្បីសម្លាប់មេរោគមហារីកជំងឺកាន់តែធ្វើទុក្ខខ្លាំង ឡើងៗ ។ មិនត្រឹមតែមានជំងឺមហារីក ត្រង់សុដន់១មុខឡើយ ភរិយារបស់លោកត្រូវមេរោគនោះរីករាលដាលស្ទើរពេញខ្លួនទាំងអស់ ពោលគឺនៅត្រង់ខួរក្បាល និងសួត ។ បន្ទាប់ពីចាក់ថ្នាំគីមីលើកទី៤មក បានធ្វើទុក្ខដល់ខួរក្បាល គឺក្បាលចាប់ផ្ដើមឈឺកាន់តែខ្លាំងឡើងស្ទើរផ្ទុះសន្លប់ ។ ក្នុងស្ថានភាពបែបនេះបុរសជាប្តីបាននាំភរិយាទៅសម្រាកព្យាបាលនៅមន្ទីរពេទ្យ ។ គ្រូពេទ្យបានស្គែនមើលក្បាលក៏ឃើញមេរោគមហារីកនៅក្នុងខួរក្បាលទៀត ។ បន្ទាប់ពីចាក់ថ្នាំគីមីព្យាបាលនៅត្រង់ខួរក្បាល នាំឲ្យនាងហត់ ខ្លាំង គ្រូពេទ្យពិនិត្យសួត ឃើញមានមហារីកទៀត ។
បុណ្យសពរៀបចំនៅស្រុកត្រាំកក់ ដូច្នេះអ្នកចង់ចូលរួមសូមអញ្ជើញទៅទីនោះ ៕
ចែករំលែកព័តមាននេះ