គណៈកម្មាធិការបច្ចេកទេសរបស់ OPEC និងមិនមែន OPEC បានណែនាំប្រទេសអ្នកផលិតប្រេងឲ្យបន្តកិច្ចព្រមព្រៀងជាសកល ដើម្បីកាត់បន្ថយការផ្គត់ផ្គង់រយៈពេល៦ខែទៀត ចាប់ពីខែមិថុនា។ នេះបើតាមប្រភពជិតស្និទ្ធបាននិយាយក្នុងកិច្ចប្រឹងប្រែងជម្នះបញ្ហាទិន្នផលប្រេងឆៅលើសលប់ដែលប៉ះពាល់ដល់តម្លៃប្រេង ។
រុស្ស៊ី និងប្រទេសផលិតប្រេងផ្សេងទៀត ពីដំបូងបានយល់ព្រមកាត់បន្ថយការផលិតត្រឹម១,៨លានបារ៉ែលក្នុង១ថ្ងៃសម្រាប់រយៈពេល៦ខែ ចាប់ពីថ្ងៃទី១ មករា ដើម្បីគាំទ្រដល់ទីផ្សារនេះ ។
ការអនុលោមតាមច្បាប់ត្រូវបានពិនិត្យឡើងវិញផងដែរក្នុងកិច្ចប្រជុំនៅទីក្រុង Vienna ថ្ងៃសុក្រ រួមមាន មន្ត្រីមកពីប្រទេសត្រួតពិនិត្យកិច្ចព្រមព្រៀងលើកម្រិតទិន្នផល សមាជិកអង្គការ OPEC ប្រទេសកូវ៉ែត វ៉េណេស៊ុយអេឡា អាល់ហ្សេរី និងប្រទេសមិនមែនសមាជិកអង្គការ OPEC គឺរុស្ស៊ី និងអូម៉ង់ ។
ប្រភពមួយឱ្យដឹងថា ការយល់ព្រមទាំងស្រុងជាមួយកិច្ចសន្យាកាត់បន្ថយត្រឹម៩៨%ក្នុងខែមីនា ។ ប្រភពពីរទៀតឱ្យដឹងថា អត្រាក្នុងខែមីនា គឺតំណាងឲ្យការកើនឡើងនៃកម្រិតខែកុម្ភៈ ។
តម្លៃប្រេងនៅតែធ្លាក់ចុះកាលពីថ្ងៃសុក្រ ខណៈតម្លៃប្រេងឆៅ Brent ស្មើក្រោម៥២ដុល្លារក្នុង១បារ៉ែល ។ គេបារម្ភថា ការបង្កើនផលិតកម្មរបស់សហរដ្ឋអាមេរិក និងការស្តុកទុកច្រើនអាចនឹងបំផ្លាញកិច្ចខិតខំរបស់អង្គការ OPEC និងសម្ព័ន្ធមិត្តរបស់ខ្លួនដើម្បីកាត់បន្ថយការផ្គត់ផ្គង់ ។
ការណែនាំរបស់គណៈកម្មាធិការដើម្បីបន្តកិច្ចព្រមព្រៀងកាត់បន្ថយការផ្គត់ផ្គង់ គឺមិនមែនជាការភ្ញាក់ផ្អើលទេ បន្ទាប់ពីរដ្ឋមន្ត្រីប្រេងពីមកពីប្រទេសនាំចេញប្រេងកំពូល គឺអារ៉ាប៊ីសាអូឌីត និងកូវ៉ែតបានផ្តល់សញ្ញាច្បាស់មួយកាលពីថ្ងៃព្រហស្បតិ៍ថា ពួកគេគ្រោងនឹងពន្យារកិច្ចព្រមព្រៀងនេះ ។
រដ្ឋមន្ត្រីថាមពលរុស្ស៊ី លោក Alexander Novak បានថ្លែងនៅថ្ងៃសុក្រថា សេចក្តីសម្រេចបន្តកិច្ចព្រមព្រៀងនេះ មិនទាន់ត្រូវបានគេយកមកពិចារណាទេ ប៉ុន្តែនឹងត្រូវយកទៅពិភាក្សាជាមួយអង្គការ OPEC នៅថ្ងៃទី២៤ ឧសភា។ រដ្ឋមន្ត្រីអង្គការ OPEC និងមិនមែន OPEC គ្រោងនឹងជួបប្រជុំនៅថ្ងៃទី២៥ ឧសភា ខាងមុខ ។
ក្រុមជួបប្រជុំគ្នានៅទីស្នាក់ការកណ្តាលរបស់ OPEC ក្នុងក្រុង Vienna ជាគណៈកម្មាធិការបច្ចេកទេសចម្រុះ (JTC) ដែលបានបង្កើតឡើងនៅខែមករា ដើម្បីត្រួតពិនិត្យការប្រកាន់ខ្ជាប់កិច្ចព្រមព្រៀងកាត់បន្ថយការផ្គត់ផ្គង់ ។
ប្រទេសអ្នកផលិតប្រេងកំពូលរបស់ OPEC គឺអារ៉ាប៊ីសាអូឌីត គឺជាសមាជិក JTC ក្នុងនាមជាប្រធាន OPEC នៅឆ្នាំ២០១៧ ៕
ចែករំលែកព័តមាននេះ