រាជធានីភ្នំពេញ ៖ ការនាំចេញសម្លៀកបំពាក់ និងស្បែកជើងពីកម្ពុជាក្នុងត្រីមាសទី១ឆ្នាំនេះកើនឡើងជាង១៣% បើធៀបនឹងរយៈពេលដូចគ្នាកាលពីឆ្នាំមុន ដោយទំហំទឹកប្រាក់បានកើនពី១.៣៧០ ដល់ជាង១.៥៥០លានដុល្លារអាមេរិក ។
រាជធានីភ្នំពេញ ៖ ការនាំចេញសម្លៀកបំពាក់ និងស្បែកជើងពីកម្ពុជាក្នុងត្រីមាសទី១ឆ្នាំនេះកើនឡើងជាង១៣% បើធៀបនឹងរយៈពេលដូចគ្នាកាលពីឆ្នាំមុន ដោយទំហំទឹកប្រាក់បានកើនពី១.៣៧០ ដល់ជាង១.៥៥០លានដុល្លារអាមេរិក ។
យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ បញ្ចេញនៅថ្ងៃទី២០ មេសា ឲ្យដឹងថា ទីផ្សារធំៗដែលកម្ពុជាបាននាំចេញស្បែកជើង និងសម្លៀកបំពាក់ មានដូចជា ទីផ្សារអឺរ៉ុប សហរដ្ឋអាមេរិក កាណាដា និងជប៉ុនជាដើម ។
លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ថ្លែងថា វិស័យវាយនភ័ណ្ឌកម្ពុជានៅតែរក្សាបាននូវកំណើនយ៉ាងរឹងមាំ ទោះជាសេដ្ឋកិច្ចពិភពលោកប្រឈមនឹងភាពមិនប្រាកដប្រជាក្តី ព្រោះរោងចក្រកាន់តែច្រើនបានធ្វើពិពិធកម្មផលិតផលរបស់ពួកគេ តាមរយៈការស្វែងរកតម្លៃបន្ថែមកាន់តែច្រើន ។ លោកបន្តថា ៖ « ទីផ្សារនាំចេញរបស់កម្ពុជាកាន់តែមានការធ្វើពិពិធកម្មផងដែរ ដោយយើងមិនពឹងផ្អែកតែលើទីផ្សារអឺរ៉ុប និងសហរដ្ឋអាមេរិកទៀតទេ » ។
គិតក្នុងរយៈពេលដដែលនេះ ក្រសួងឧស្សាហកម្ម និងសិប្បកម្ម បានចុះបញ្ជីរោងចក្រ និងសិប្បកម្ម រួមទាំងអនុម័តនូវការបង្កើតរោងចក្រថ្មីចំនួន១៤១រោងចក្រ និងបង្កើតការងារចំនួន៦២.៣១២កន្លែង ហើយនៅទូទាំងវិស័យនេះមានកម្មករធ្វើការជិត១លាននាក់ ។
សេដ្ឋវិទូកម្ពុជា លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិថ្លែងថា ការធ្វើការងារជាក្រុមមានភាពប្រសើរឡើងក្នុងវិស័យនេះ តាមរយៈការបណ្តុះបណ្តាលពីម្ចាស់រោងចក្រ សហគ្រាសនានា ដែលធ្វើឲ្យផលិតភាពកើនឡើងក្នុងរយៈពេលនេះ ហើយរោងចក្រកាត់ដេរនានាបានធ្វើពិពិធកម្មផលិតផលរបស់ខ្លួន ដោយផលិតផលិតផលតម្លៃថោក មកផលិតផលិតផលមានតម្លៃថ្លៃ និងទទួលបានតម្លៃបន្ថែមកាន់តែច្រើន ។
លោកមានប្រសាសន៍ថា ៖ « កម្ពុជាកំពុងចាកចេញពីឧស្សាហកម្មអតិពលកម្ម ទៅជាពលកម្មដែលប្រើប្រាស់ជំនាញ និងចំណេះដឹងខ្ពស់ ដើម្បីឲ្យប្រជាពលរដ្ឋទទួលបានផលប្រយោជន៍កាន់តែច្រើន ប៉ុន្តែវិស័យកាត់ដេរនៅតែជាវិស័យដ៏សំខាន់ក្នុងការជំរុញកំណើនសេដ្ឋកិច្ចជាតិ»។ លោកបន្តថា ៖ « កម្ពុជាត្រូវតែផ្តោតការយកចិត្តទុកដាក់ និងថែទាំវិស័យនេះដើម្បីធ្វើជាឈ្នាន់ឈានទៅវិស័យដទៃទៀត » ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងក្នុងពិធីចែកសញ្ញាបត្រនៅរាជធានីភ្នំពេញនាពេលថ្មីៗនេះថា កម្ពុជាត្រូវធ្វើយ៉ាងណា រក្សាកំណើនសេដ្ឋកិច្ចឲ្យបាន៧% ដើម្បីរុញកម្ពុជាចេញពីប្រទេសក្រីក្រ ទៅកាន់ប្រទេសមានប្រាក់ចំណូលខ្ពស់នៅឆ្នាំ២០៣០ តាមរយៈការធ្វើឲ្យវិស័យឧស្សាហកម្មឆ្នាំ២០១៥-២០២៥ ដំណើរការ ។
យោងតាមការចាត់ចំណាត់ថ្នាក់របស់ធនាគារពិភពលោកឲ្យដឹងថា ប្រទេសមានប្រាក់ចំណូលមធ្យមកម្រិតខ្ពស់ សំដៅលើប្រទេសដែលប្រជាពលរដ្ឋម្នាក់មានប្រាក់ចំណូលចន្លោះជាង៤ពាន់ដុល្លារ ដល់ជាង១ម៉ឺន២ពាន់ដុល្លារអាមេរិកក្នុង១ឆ្នាំ ៕
ចែករំលែកព័តមាននេះ