រាជធានីភ្នំពេញ ៖ យោងតាមសេចក្តីជូនព័ត៌មានរបស់ក្រសួងវប្បធម៌និងវិចិត្រសិល្បៈ ចុះថ្ងៃទី២១ ខែមេសា ឆ្នាំ២០១៧ ស្តីពីការទទួលមកវិញនូវឈុតគ្រឿងអលង្ការមាសរបស់ខ្មែរនាសម័យអង្គរ បានឱ្យដឹង នាថ្ងៃទី២០ ខែមេសា កន្លងមកនេះ ភ្នាក់ងារលក់វត្ថុបុរាណJohnathan Tucker Antonia Tozer Asian Art បានស្ម័គ្រចិត្តប្រគល់ឈុតគ្រឿងអលង្ការមាសសម្រាប់លម្អរូបចម្លាក់ថ្ម ដែលមានអាយុកាលក្នុងសម័យអង្គរ ជូនមករាជរដ្ឋាភិបាលនិងប្រជាជនកម្ពុជាវិញ តាមរយៈស្ថានឯកអគ្គរាជទូតកម្ពុជាប្រចាំចក្រភពអង់គ្លេស នាទីក្រុងឡុង ដោយមានការចូលរួមពីសំណាក់លោកជំទាវឯកអគ្គរាជទូតនៃព្រះរាជាណាចក្រកម្ពុជា ប្រចាំចក្រភពអង់គ្លេស និងមន្ត្រីជំនាញនៃក្រសួងវប្បធម៌ និងវិចិត្រសិល្បៈ លោកស្រីKaltherine McGinn មន្ត្រីការិយាល័យទទួលបន្ទុកកិច្ចការប្រចាំប្រទេសកម្ពុជា ឡាវ សិង្ហបុរី អាស៊ាន និងASEM នៃក្រសួងការបរទេសនិង The Commonwealthនៃចក្រភពអង់គ្លេស លោកស្រីDC Sophie V.Hayesទទួលបន្ទុកកិច្ចការសិល្បៈ និងបុរាណវត្ថុនៃស្នងការដ្ឋាននគរបាលក្រុងឡុង នាយកដ្ឋានវប្បធម៌ផ្សព្វផ្សាយ និងកីឡា និងលោក Neil F.Perry អ្នកជំនាញអភិរក្ស តំណាងភ្នាក់ងារលក់វត្ថុបុរាណ Johnathan Tucker Antonia Tozer Asian Art ។
តាមសេចក្តីជូនព័ត៌មានបានលើកឡើងថា កាលពីថ្ងៃទី១៨ ខែវិច្ឆិកា ឆ្នាំ២០១៦ ក្រសួងវប្បធម៌ និងវិចិត្រសិល្បៈ ទទួលព័ត៌មានថា ភ្នាក់ងារលក់វត្ថុបុរាណ Johnathan Tucker Antonia Tozer Asian Art បានប្រកាសដាក់តាំងលក់វត្ថុបុរាណឥណ្ឌា និងអាស៊ីអាគ្នេយ៍ នៅស្នាក់ការរបស់ខ្លួននាទីក្រុងឡុង អាសយដ្ឋាន៣៧ Bury Street,St.James’s,London,SW1Y 6AUចាប់ពីថ្ងៃទី៣ ដល់ទី២៥ ខែវិច្ឆិកា ឆ្នាំ២០១៦ ដែលក្នុងនេះមានឈុតគ្រឿងអលង្ការមាសសម្រាប់លម្អរូបចម្លាក់ថ្ម ដែលវត្ថុបុរាណនេះធ្លាប់បានផ្សព្វផ្សាយក្នុងសៀវភៅ Khmer Gold:Gifts for the Gods និពន្ធរួមដោយលោកស្រី Emma C.BunkerនិងលោកDouglas A.J .Latchford នាឆ្នាំ២០០៨ ។
ទទួលបានដំណឹងនេះភ្លាម ក្រសួងវប្បធម៌ និងវិចិត្រសិល្បៈ បានជូនដំណឹងដល់ក្រសួងការបរទេសនិងសហប្រតិបត្តិការអន្តរជាតិ និងទទួលបានសេចក្តីណែនាំជាបន្ទាន់មួយ ដើម្បីធ្វើការទាមទារសុំឱ្យភ្នាក់ងារលក់វត្ថុបុរាណ Johnathan Tucker Antonia Tozer Asian Art ដកចេញពីបញ្ជីលក់ និងសម្របសម្រួលបញ្ជូនមកកម្ពុជាវិញ ដោយភាគីកម្ពុជាបានផ្តល់សក្ខីកម្មយ៉ាងច្បាស់ថា វត្ថុបុរាណនេះជាកម្មសិទ្ធិតែមួយគត់របស់កម្ពុជា តាមរយៈក្បូរក្បាច់រចនាដែលមានតែក្នុងរចនាបថសិល្បៈខ្មែរមួយគត់ ហើយដែលត្រូវបានយកចេញដោយខុសច្បាប់ពីកម្ពុជា ។
រាជរដ្ឋាភិបាលកម្ពុជា សូមសម្តែងការកោតសរសើរដល់រាជរដ្ឋាភិបាលនៃចក្រភពអង់គ្លេសដែលបានខ្នះខ្នែងជាមួយរាជរដ្ឋាភិបាលកម្ពុជា ក្នុងការទាមទារវត្ថុបុរាណនេះមកឱ្យកម្ពុជាវិញ និងសូមថ្លែងអំណរគុណផងដែរដល់ភ្នាក់ងារលក់វត្ថុបុរាណ Johnathan Tucker Antonia Tozer Asian Art ដែលមានសុច្ឆន្ទៈ និងសហការបានល្អប្រសើរជាមួយអាជ្ញាធរ ក្នុងការសម្របសម្រួលប្រគល់វត្ថុបុរាណនេះជូនមករាជរដ្ឋាភិបាល និងប្រជាជនកម្ពុជាវិញ ។
ក្នុងឱកាសនេះ លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈនៃព្រះរាជាណាចក្រកម្ពុជា មានចំណាប់អារម្មណ៍ថា៖ ការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការនាំត្រឡប់មកវិញនូវរតនវត្ថុរបស់ជាតិនាពេលនេះ គឺជាមង្គលដ៏ឧត្តមមួយរបស់ប្រទេស ក៏ដូចជាចំណងដៃមួយដ៏ថ្លៃថ្លាជូនប្រជាជនកម្ពុជាទាំងមូលនាឱកាសឆ្នាំថ្មីនេះដែរ ។ ការប្រគល់ត្រឡប់មកវិញដោយការស្ម័គ្រចិត្តនេះ បង្ហាញឱ្យឃើញពីការលើកតម្លៃសម្បត្តិវប្បធម៌កម្ពុជា និងក្រមសីលធម៌នៃអ្នកធ្វើសមុច្ច័យវត្ថុបុរាណមានការប្រសើរឡើង និងសូមលើកទឹកចិត្តដល់បុគ្គលដល់សារមន្ទីរ ក្រុមហ៊ុន ក៏ដូចស្ថាប័ននានាលើសកលលោក ដែលកំពុងតាំងបង្ហាញ និងរក្សាទុកវត្ថុបុរាណរបស់កម្ពុជា សូមសហការជាមួយរាជរដ្ឋាភិបាលកម្ពុជាតាមរយៈក្រសួងវប្បធម៌និងវិចិត្រសិល្បៈ ក៏ដូចជាតាមរយៈស្ថានទូតកម្ពុជានៅតាមប្រទេសនីមួយៗ ក្នុងការស្ម័គ្រចិត្តប្រគល់វត្ថុបុរាណទាំងនោះមកកម្ពុជាវិញ ។
កម្ពុជាចាត់ទុកថា ទង្វើដ៏ថ្លៃថ្លានេះ មិនត្រឹមតែបង្ហាញពីការចូលរួមលើកតម្លៃដល់វប្បធម៌នៃជាតិសាសន៍មួយប៉ុណ្ណោះទេ តែក៏បានចូលរួមចំណែកដ៏ឧត្តុង្គឧត្តមក្នុងការផ្សះផ្សា និងព្យាបាលរបួសផ្លូវចិត្តរបស់ប្រជាជនកម្ពុជា ដែលឆ្លងកាត់សង្គ្រាមស៊ីវិលរ៉ាំរ៉ៃ និងរងគ្រោះពីសោកនាដកម្ម និងទារុណកម្មនៃអំពើប្រល័យពូជសាសន៍ខ្មែរក្រហម ៕
ចែករំលែកព័តមាននេះ