ខេត្តកំពង់ចាម ៖ បាតុភូតធម្មជាតិបានកើតឡើងនៅស្រុកចំនួនពីរក្នុងនោះមាន ស្រុកចម្ការលើ និងស្រុកជើងព្រៃ ដោយខ្យល់កន្ត្រាក់បានបំផ្លាញលំនៅឋាន របស់ប្រជាពលរដ្ឋអស់ជាច្រើនខ្នង តែសំណាងល្អមិនមានប្រជាពលរដ្ឋណាម្នាក់រងគ្រោះថ្នាក់ដល់អាយុជីវិតនោះទេ។
ហេតុការណ៍នោះបានកើតឡើងនៅរសៀលថ្ងៃទី២២ មេសា ២០១៧។ លោកវរសេនីយ៍ឯក ខេង ស្រេង អធិការនគរបាលស្រុកចម្ការលើបានប្រាប់ឲ្យដឹងថា ដំបូងមេឃបានខ្មៅមីរដេរដាសឡើងងងឹតនៅវេលាម៉ោង២ និង១០នាទីរសៀលថ្ងៃខាងលើ ដែលបង្កឲ្យមានផលប៉ះពាល់ឃុំចំនួន២ ក្នុងមានដូចជា នៅឃុំស្វាយទាបមាន បណ្តាលឲ្យជើងសរសររំកិលធ្លាក់ពីជើងតម្កល់មកដី និងរបើកដំបូលផ្ទះប្រជាពលរដ្ឋចំនួន២ខ្នង ទី១-ផ្ទះឈ្មោះ អ៊ឹម លី ភេទប្រុស អាយុ២៤ឆ្នាំ មានប្រពន្ធឈ្មោះ ងុយ ប៉ិក អាយុ២៣ឆ្នាំ នៅភូមិបុសថ្លាន់ ផ្ទះទំហំ៥គុណ៧ម៉ែត្រ ប្រក់ស័ង្កសី ទី២-ផ្ទះឈ្មោះ ហ៊ន់ ហេង ភេទប្រុស អាយុ៣៥ឆ្នាំ ប្រពន្ធឈ្មោះ ស៊ូ ផល អាយុ៣២ឆ្នាំ ផ្ទះទំហំ៦គុណ៧ម៉ែត្រ ប្រក់ស័ង្កសី របើកដំបូលទាំងអស់តែម្តង។
ចំណែកនៅឃុំស្ពឺវិញគឺ បណ្តាលឲ្យផ្ទះរបស់ប្រជាពលរដ្ឋចំននួន៤ខ្នង របើកដំបូលទាំងស្រុង១ខ្នង របើកដំបូលខ្លះ៣ខ្នង ដែលក្នុងនោះមាន១-ផ្ទះឈ្មោះ ម៉ិល ចាន់ថន ភេទប្រុស អាយុ២៦ឆ្នាំ ទំហំ៤គុណ១០ម៉ែត្រ នៅភូមិពព្រេង របើកដំបូលស័ង្កសីទាំងអស់ ២-ផ្ទះឈ្មោះ ស៊ឹង វុទ្ធី ភេទប្រុស អាយុ៣៦ឆ្នាំ ទំហំ៦ម៉ែត្រគុណ៦ម៉ែត្រ របើកដំបូលស័ង្កសីមួយចំហៀងមុខ ៣-ផ្ទះឈ្មោះ យ៉ន យ៉ែន ភេទប្រុស អាយុ៤៥ឆ្នាំទំហំ៦ម៉ែត្រគុណ៨ម៉ែត្រ របើកក្បឿង និងទ្រេតបង្គោលភ្លើង១ដើម ៤-ផ្ទះឈ្មោះ តុង ស៊ឹមឡេង ភេទស្រី អាយុ៥២ឆ្នាំ ទំហំ៧ម៉ែត្រគុណ៩ម៉ែត្រ ដើមដូងរលំលើបែកក្បឿងអស់ជាច្រើនសន្លឹក។ ទាំង២ឃុំនេះមិនមានគ្រោះថ្នាក់ដល់មនុស្សនោះទេ។
ចំណែកលោកឧត្តមសេនីយ៍ត្រី ហេង សម្បត្តិ ស្នងការរងនគរបាលខេត្ត ទទួលផែនសេនាធិការមានប្រសាសន៍ឲ្យដឹងដែរថា នៅរសៀលថ្ងៃទី២២ មេសា ២០១៧ គ្រោះធម្មជាតិខ្យល់កន្ត្រាក់បានបង្កឲ្យមានផលប៉ះពាល់លើស្រុកចំនួន២គឺនៅស្រុកចម្ការលើ ដោយឡែកនៅស្រុកជើងព្រៃក៏ទទួលរងផលប៉ះពាល់ដែរក្នុងនោះមានដូចជានៅភូមិកោះចំប៉ា ឃុំព្រីងជ្រុំ ស្រុកជើងព្រៃ ដោយបណ្តាលឲ្យផ្ទះរបស់ប្រជាពលរដ្ឋចំនួន១៤ខ្នងត្រូវរងការខូចខាត មិនមានមានសេចក្តីរាយការណ៍មនុស្សរងគ្រោះថ្នាក់នោះទេ។ ករណីទាំងពីរស្រុកនេះកម្លាំងជំនាញកំពុងតែបានរាយការណ៍ទៅកាកបាទក្រហមស្រុកនីមួយៗដើម្បីឲ្យចុះមកពិនិត្យមើលទំហំការខូចខាតដើម្បីត្រៀមនឹងចែកអំណោយ ប្រសិនបើផ្ទះណាដែលរងផលប៉ះពាល់ធ្ងន់ជាងគេនោះ៕
ចែករំលែកព័តមាននេះ