ប្រទេសជប៉ុន ៖ តូក្យូបានត្រៀមខ្លួនស្វាគមន៍អគារខ្ពស់ៗកប់ពពកថ្មីចំនួន៤៥ ខណៈទីក្រុងនេះនឹងធ្វើជាម្ចាស់ផ្ទះប្រកួតកីឡាអូឡាំពិកនៅឆ្នាំ២០២០ ។
« រដ្ឋធានីរបស់ប្រទេសជប៉ុន នឹងមានអគារខ្ពស់ថ្មីបន្ថែមទៀតជិត៥០%ក្នុងរយៈពេល៣ឆ្នាំខាងមុខ ដែលច្រើនជាងកាលពី៣ឆ្នាំមុន » ។ នេះបើតាមលោក Toyokazu Imazeki ប្រធានអ្នកវិភាគក្រុមហ៊ុនជួល និងប្រឹក្សានៃការិយាល័យ Sanko Estate Co Ltd បាននិយាយក្នុងបទសម្ភាសន៍មួយ ។
លោក Imazeki និយាយថា កំណើននេះត្រូវបានជំរុញដោយការបង្កើនពន្ធ និងការបន្ធូរបន្ថយគោលនយោបាយរូបិយវត្ថុ នៅក្រោមកម្មវិធីសេដ្ឋកិច្ចរបស់នាយករដ្ឋមន្ត្រីជប៉ុន លោក Abe បន្ទាប់ពីការបោះឆ្នោតនៅចុងឆ្នាំ២០១២ ។ លោកថា ៖ « ការកំណត់ពេលវេលាបញ្ចប់ការសាងសង់អគារទាំងនេះ គឺបានគ្រោងទុកតាំងពីឆ្នាំ២០១៣មកម្ល៉េះ ដែលក្រុមហ៊ុនអភិវឌ្ឍន៍រំពឹងថា សេដ្ឋកិច្ចនឹងកើនឡើង » ។
លោកបន្តថា ការកើនឡើងក្នុងវិស័យអគារ មិនត្រឹមតែគាំទ្រការពង្រីកគោលនយោបាយរបស់លោក Abe ប៉ុណ្ណោះទេ ប៉ុន្តែក៏ដោយសារអត្រាការប្រាក់ទាបខ្លាំងរបស់ជប៉ុនផងដែរ ។
លោក Imazeki បន្ថែមថា ការជួលការិយាល័យថ្មីនៅអគារជាច្រើនជាន់ មានទំហំ៦៦១ម៉ែត្រការ៉េក្នុងតំបន់កណ្តាលទាំងបីនៃទីក្រុងតូក្យូ នឹងកើនប្រហែល១,៨លានម៉ែត្រការ៉េនៅឆ្នាំ២០២០ ពី១,២លានម៉ែត្រការ៉េក្នុងរយៈពេល៣ឆ្នាំកន្លងមក ។ អចលនទ្រព្យទាំងនោះស្ថិតនៅស្រុក Marunouchi នៅជិតស្ថានីយក្រុងតូក្យូ និងអគារថ្មីមួយមានកម្ពស់៤១ជាន់ គ្រោងនឹងបញ្ចប់នៅឆ្នាំ២០១៩ ។
សំណង់ថ្មី៧៥% ក្នុងរយៈពេលពីឆ្នាំ២០១៦-២០១៨ នឹងមាននៅក្នុងតំបន់ Chiyoda, Chuo និង Minato បើប្រៀបនឹងចំនួន៦១%ពីឆ្នាំ២០១១ ដល់២០១៥ ។ នេះបើតាមការស្រាវជ្រាវរបស់ក្រុមហ៊ុន Mori Building Co Ltd ។
លោក Takashi Ishizawa អ្នកស្រាវជ្រាវជាន់ខ្ពស់ប្រចាំក្រុមហ៊ុន Mizuho Securities ថ្លែងថា ៖ « អគារភាគច្រើនស្ថិតនៅកណ្តាលតំបន់ប្រណីតទាំងបីក្នុងទីក្រុងតូក្យូ ។ វានឹងប្រកួតប្រជែងខ្លាំងជាមួយការជួលក្នុងតំបន់ផ្សេងទៀតនៃទីក្រុង ដោយសារអ្នកជួលការិយាល័យងាកទៅរកទីតាំងប្រណីតទាំងនេះ » ។
លោក Ishizawa បន្ថែមថា នឹងមានតម្រូវការទាក់ទងនឹងការធ្វើជាម្ចាស់ផ្ទះនៃព្រឹត្តិការណ៍ប្រកួតកីឡាអូឡាំពិកឆ្នាំ២០២០ ក្នុងទីក្រុងតូក្យូ ៕
ចែករំលែកព័តមាននេះ