តម្លៃផ្ទះនៅចិនមានស្ថិរភាព ខណៈការរឹតបន្តឹងកំពុងបន្ត
ប្រទេសចិន ៖ បទប្បញ្ញត្តិរឹតបន្តឹងទីផ្សារអចលនទ្រព្យរបស់ចិន ដើម្បីទប់ស្កាត់កំណើនតម្លៃផ្ទះបានចាប់ផ្តើមមានលទ្ធផល ខណៈតម្លៃផ្ទះនៅក្នុងទីក្រុងធំៗបន្តមានស្ថិរភាព។
ប្រទេសចិន ៖ បទប្បញ្ញត្តិរឹតបន្តឹងទីផ្សារអចលនទ្រព្យរបស់ចិន ដើម្បីទប់ស្កាត់កំណើនតម្លៃផ្ទះបានចាប់ផ្តើមមានលទ្ធផល ខណៈតម្លៃផ្ទះនៅក្នុងទីក្រុងធំៗបន្តមានស្ថិរភាព។
ការិយាល័យស្ថិតិជាតិបាននិយាយកាលពីពេលថ្មីៗថា ក្នុងចំណោមការអង្កេតលើទីក្រុងធំ និងមធ្យមចំនួន៧០បង្ហាញថា តម្លៃអចលនទ្រព្យក្នុងទីក្រុងចំនួន២៤ បានកើនឡើងយឺតៗពីមួយឆ្នាំទៅមួយឆ្នាំ នៅខែមីនា ។
តម្លៃផ្ទះថ្មីជាមធ្យមបានកើនឡើងយឺតពីមួយឆ្នាំទៅមួយឆ្នាំ ក្នុងទីក្រុងលំដាប់ទី១ទាំង១៥ និងទីក្រុងលំដាប់ទី២ ។ ការដំឡើងថ្លៃរបស់ពួកគេស្ថិតក្នុងចន្លោះពី០,២% និង០,៦% ទាបជាងខែកុម្ភៈ ។
ការិយាល័យនេះឲ្យដឹងទៀតថា ចំពោះតម្លៃប្រចាំខែនៃអចលនទ្រព្យនៅទីក្រុង៦ក្នុងចំណោម១៥ បានធ្លាក់ចុះពីខែកុម្ភៈ ខណៈទីក្រុង៦ទៀតដំឡើងថ្លៃក្រោម០,៥% ។
លោក Liu Jianwei អ្នកស្ថិតិជាន់ខ្ពស់របស់ការិយាល័យនេះនិយាយថា ៖ « ខែមីនា គឺជារដូវកាលលក់ដាច់ខ្លាំង ហើយតម្លៃផ្ទះថ្មីក្នុងទីក្រុងលំដាប់ទី១ទាំង១៥ និងលំដាប់ទី២ បានកើនឡើងយឺត ស្របតាមវិធានការទប់ស្កាត់តម្លៃផ្ទះក្នុងទីក្រុងនានា » ។
តម្លៃផ្ទះថ្មីនៅទីក្រុងប៉េកាំងបានកើនឡើង០,៤%កាលពីខែមីនា ខណៈតម្លៃក្នុងទីក្រុងសៀងហៃ ធ្លាក់ចុះ០,១% និងទីក្រុង Shenzhen ធ្លាក់ចុះ០,៣% ។
ការលក់អចលនទ្រព្យបានកើនឡើងយ៉ាងខ្លាំងនៅឆ្នាំ២០១៦ គឺកើនឡើង២២,៥%ប្រចាំឆ្នាំ ដោយសារការបន្ធូរបន្ថយគោលនយោបាយរយៈពេល២ឆ្នាំ និងកាត់បន្ថយអត្រាការប្រាក់ ។
ចាប់ពីខែតុលា រដ្ឋាភិបាលចិនបានអនុវត្តវិធានការដើម្បីបញ្ចុះតម្លៃផ្ទះដែលកើនឡើងកាន់តែខ្ពស់ រួមមាន រឹតបន្តឹងការទិញ និងបង្កើនការបង់ប្រាក់មុនពេលទិញផ្ទះ ។
ទន្ទឹមនឹងនេះ ធនាគារកណ្តាលចិនបានជំរុញឱ្យធនាគារផ្សេងៗពង្រឹងការគ្រប់គ្រងហានិភ័យលើប្រាក់កម្ចីទិញផ្ទះ និងបង្ក្រាបភាពមិនប្រក្រតីទីផ្សារដូចជា ការលែងលះក្លែងក្លាយដើម្បីគេចពីការបង់ប្រាក់ខ្ពស់មុនទិញផ្ទះ ។
« ទោះបីជាមានបទប្បញ្ញត្តិលំនៅឋានដ៏តឹងរ៉ឹងក្តី ក៏តម្លៃផ្ទះនៅទីក្រុងមួយចំនួននៅតែមានកំណើនខ្ពស់ក្នុងខែមីនា ដែលបង្ហាញថា បទប្បញ្ញត្តិលំនៅស្ថាននេះត្រូវរឹតបន្តឹងបន្ថែមទៀត»។ នេះបើតាមលោក Xia Dan អ្នកស្រាវជ្រាវជាន់ខ្ពស់នៅធនាគារ Communications ។
លោក Xia និយាយថា ៖ « វិធានការត្រួតពិនិត្យលើតម្លៃផ្ទះនៅតែមាន ដរាបណាមានការដំឡើងថ្លៃ ។ តម្លៃផ្ទះក្នុងបណ្តាទីក្រុងបានកើនឡើងលឿន ទំនងជានឹងរឹតបន្តឹងវិធានការនេះបន្ថែមទៀត » ។
ថ្លែងក្នុងសន្និសីទកាសែតមួយកាលពីថ្ងៃចន្ទ អ្នកនាំពាក្យការិយាល័យស្ថិតិ លោក Mao Shengyong ទទួលស្គាល់ថា ឥទ្ធិពលនៃការគ្រប់គ្រងអចលនទ្រព្យនឹងបង្ហាញលទ្ធផលនៅខែមេសា និងខែក្រោយៗទៀត ។
លោកបន្តថា រយៈពេលប៉ុន្មានឆ្នាំខាងមុខ ប្រទេសចិននឹងបង្កើតយន្តការតម្រង់ទិសទីផ្សាររយៈពេលវែង ដើម្បីកាត់បន្ថយបញ្ហាអចលនទ្រព្យ និងទប់ស្កាត់ការប្រែប្រួលនៃទីផ្សារធំៗ ៕
ចែករំលែកព័តមាននេះ