រាជធានីភ្នំពេញ ៖ មានគ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងរថយន្តបាឡែនពណ៍ទឹកប្រាក់ពាក់ស្លាកលេខ ភ្នំពេញ2U-1295 បើកបរដោយស្ត្រីរូបស្រស់ម្នាក់ជាអ្នកបង្កហេតុបុករះម៉ូតូឌ្រីមសង់សេ១២៥ ពណ៍ខ្មៅ ពាក់ស្លាកលេខ ព្រៃវែង1J-2250ស៊េរីឆ្នាំ២០១៦ ហើយជ្រុលទៅបុកម៉ូតូរ៉ឺកម៉កកង់បីក្រឡាប់ផ្ងារជើង កាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី២៣ ខែមេសា ឆ្នាំ២០១៧ នៅចំណុចរង្វង់មូលសម្ដេចសង្ឃជួនណាត តាមផ្លូវព្រះសីហនុកែងផ្លូវរដ្ឋសភាជាតិសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីបុរសម្នាក់ដែលបានឃើញហេតុការណ៍ប្រាប់ភ្នាក់ងារសារព័ត៌មានកោះសន្តិភាពថា ដោយមុនកើតហេតុមានរថយន្តម៉ាកបាឡែនបើកបរដោយស្ត្រីរូបស្រស់ម្នាក់បើកតាមផ្លូវរដ្ឋសភាជាតិក្នុងទិសដៅពីរដ្ឋសភាជាតិមកសម្ដេចសង្ឃជួនណាតដោយល្បឿនលឿនពេកក៏ជ្រុលទៅបុកម៉ូតូសង់ឌ្រីមដែលជិះ២នាក់ប្រុសម្នាក់ និងស្រីម្នាក់ម្នាក់ដែលកំពង់ជិះនៅរង្វង់មូលសម្ដេចសង្ឃជួនណាត ហើយបុកចំហៀងខាងឆ្វេងខ្ចាតបោកក្បាលស្លាប់ភ្លាមនៅកន្លែងកើតហេតុ រីឯស្ត្រីរងគ្រោះរបួសស្រាល ហើយរថយន្តមិនទាន់អស់លឿនជ្រុលទៅបុកម៉ូតូរ៉ឺកម៉កកង់បី១គ្រឿងពីក្រោយទៀតបណ្ដាលឱ្យក្រឡាប់ផ្ងារជើងតែមិន មានរបួសទេ ក្រោយកើតហេតុក៏មានរថយន្តសង្គ្រោះឯកជនមកដឹកយកទៅព្យាបាលដែរ ប៉ុន្តែគ្រូពេទ្យប្រាប់ថា បុរសអ្នកបើកម៉ូតូស្លាប់ហើយ រីឯនារីអ្នកអង្គុយខាងក្រោយសង្ស័យភ័យពេកដើរឡើងជិះម៉ូតូឌុបទៅបាត់ហើយក្រោយមកទើបឃើញសមត្ថកិច្ចអាជ្ញាធរមូលដ្ឋានចុះមកដល់កន្លែងកើតហេតុដើម្បីធ្វើការវាស់វែង ។ ចំណែកអ្នកបើករថយន្តបង្កហេតុបានរត់គេចខ្លួនបាត់ ។
សពជនរងគ្រោះមានឈ្មោះ នី រដ្ឋា ភេទប្រុស អាយុ២១ឆ្នាំ ជាបុគ្គលិកចាក់សាំងមានស្រុកកំណើតផ្ទះលេខ៩ ភូមិពាមស្ពឺ ឃុំព្រែ ជ្រៃ ស្រុកពោធិ៍រៀង ខេត្តព្រៃវែង ជាម្ចាស់ម៉ូតូម៉ាកសង់សេ១២៥ពណ៌ខ្មៅពាក់ស្លាកលេខ ព្រៃវែង1J-2250 ស៊េរីឆ្នាំ២០១៦ ស្លាប់នៅកន្លែងកើតហេតុបោកក្បាលទៅនឹងថ្នល់ ។ ចំណែកស្ត្រីមានឈ្មោះ វណ្ណី ស្រីល័ក្ខ ភេទស្រី អាយុ២៨ឆ្នាំ ជាកម្មការីនីរោងចក្រកាត់ដេរសំលៀកបំពាក់នៅម្ដុំកំបូល ស្នាក់នៅបន្ទប់ជួលសង្កាត់កំបូល ខណ្ឌពោធិ៍សែនជ័យរាជធានីភ្នំពេញត្រូវជាបងស្រីបង្កើតបានប្រាប់សមត្ថកិច្ចទាំងទឹកភ្នែកថា ប្អូនគាត់រៀនផងឆ្លៀតធ្វើការផងដោយមានមិត្តភក្តិយកទូរស័ព្ទខលប្រាប់ទើបឱ្យបងប្អូនជូនមកដល់កន្លែងកើតហេតុសឹងតែមិនចង់ជឿរពេលមកដល់ឃើញប្អូនប្រុសគាត់ដេកស្លាប់នៅនឹងថ្នល់បែកក្បាលឈាមពេញមុខហើយក្រោយពីសមត្ថកិច្ចធ្វើការវាស់វែងរួច និងយកសពដាក់រថយន្តដឹកសពទៅស្រុកកំណើតដើម្បីធ្វើបុណ្យតាមប្រពៃណីខ្មែរ ៕
ចែករំលែកព័តមាននេះ