រាជធានីភ្នំពេញ ៖ រថយន្តដឹកស៊ីម៉ង់ត៍១គ្រឿង បានបុកជាមួយរថយន្តដឹកមាន់មួយគ្រឿងទៀតយ៉ាងពេញទំហឹង បណ្ដាលឱ្យរថយន្តដឹកមាន់ រងការខូចខាតខ្ទេចមុខអស់ទាំងស្រុង និងអ្នកជិះនៅក្នុងរថយន្តរងរបួសធ្ងន់ម្នាក់ និងស្រាល៣នាក់ ហើយត្រូវបញ្ជូនទៅសង្គ្រោះនៅមន្ទីរពេទ្យភ្លាមៗ ។ រីឯរថយន្តដឹកស៊ីម៉ង់ត៍ រងការខូចខាតបន្តិចបន្តួច ហើយអ្នកបើករត់គេចខ្លួនបាត់ស្រមោល ។
ហេតុការណ៍នេះ កើតឡើងកាលពីវេលាម៉ោង០៥ និង៣០នាទីព្រឹកថ្ងៃទី២២ មេសា ស្ថិតនៅលើកំណាត់ផ្លូវអូរដឹមកប់ស្រូវ ត្រង់ចំណុចជិតសាលាពហុបច្ចេកទេសពូនភ្នំ ហៅសាលាកូរ៉េ ក្នុងភូមិស្រែរាជ្ជៈ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ប្រភពឱ្យដឹងថា រថយន្តដឹកមាន់ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខកំពង់ស្ពឺ2A-3695 បើកបរដោយយុវជនមិនស្គាល់ឈ្មោះម្នាក់ និងរួមដំណើរមានចំនួន៣នាក់ទៀត ។ ពួកគេរងរបួសទាំងអស់គ្នា ហើយរថយន្តនេះក៏រងការខូចខាតអស់ទាំងស្រុងដែរ ។ ចំណែករថយន្តដឹកស៊ីម៉ង់ត៍ ម៉ាកហ៊ីយ៉ាន់ដាយ ពណ៌.ស ពាក់ស្លាកលេខព្រះសីហនុ3A-2721 របស់ក្រុមហ៊ុនHC ដែលអ្នកបើកបរ បានរត់គេចខ្លួនបាត់ ។
តាមប្រភពឱ្យដឹងថា នៅមុនពេលកើតហេតុ រថយន្តទាំងពីរគ្រឿង ធ្វើដំណើរក្នុងទិសដៅបញ្ច្រាសគ្នា ដោយរថយន្តដឹកមាន់បើកបរក្នុងទិសដៅពីជើងទៅត្បូង ។ ចំណែករថយន្តដឹកស៊ីម៉ង់ត៍ បើកបរក្នុងទិសដៅពីត្បូងទៅជើង ។ លុះពេលទៅដល់ត្រង់ចំណុចកើតហេតុខាងលើមិនដឹងថា មានបញ្ហាអ្វីនោះទេ ទើបបុកគ្នា ហើយទំនងរថយន្តដឹកមាន់បុកចំធុងប្រេងរបស់រថយន្តដឹកស៊ីម៉ង់ត៍ ។ព្រោះធុងប្រេងបែក ចំណែករថយន្តដឹកមាន់បានរងការខូចខាតក្លាយជាដែកអេតចាយតែម្ដង។
ក្រោយពេលកើតហេតុ រថយន្តទាំង២គ្រឿង ត្រូវនគរបាលការិយល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញ នាំទៅរក្សាទុក រង់ចាំការដោះស្រាយ។
ចែករំលែកព័តមាននេះ