ខេត្តត្បូងឃ្មុំ ៖ កម្លាំងសមត្ថកិច្ចចម្រុះក្នុងនោះមាន អាវុធហត្ថនគរបាល និងជលផលបានចុះបង្ក្រាបបទល្មើសនេសាទត្រង់ចំណុចបឹងកាំពិត ក្នុងឃុំមៀន ស្រុកអូររាំងឪ នាព្រឹកថ្ងៃទី២១
ខេត្តត្បូងឃ្មុំ ៖ កម្លាំងសមត្ថកិច្ចចម្រុះក្នុងនោះមាន អាវុធហត្ថនគរបាល និងជលផលបានចុះបង្ក្រាបបទល្មើសនេសាទត្រង់ចំណុចបឹងកាំពិត ក្នុងឃុំមៀន ស្រុកអូររាំងឪ នាព្រឹកថ្ងៃទី២១ មេសា ២០១៧ ក្នុងនោះ
បានវះកាត់ស្បៃមុង៣២មាត់ បំផ្លាញបង្គោលឫស្សី៨០០ដើម ព្រមទាំងបានចាក់លែងកូនត្រី២០គីឡូក្រាម ទៅក្នុងបឹងធម្មជាតិវិញផងដែរ។
លោក ម៉ា យ៉ុងរី នាយខណ្ឌជលផលខេត្តប្រាប់ឲ្យដឹងថា កាលពី២ថ្ងៃមុនចុះបង្ក្រាបនោះ កម្លាំងសហគមន៍នេសាទក្នុងមូលដ្ឋានបានរាយការណ៍មករូបលោក ពីសកម្មភាពបទល្មើសដែលបានដាក់នៅក្នុងផ្ទៃទឹកបឹងព្រោងព្រាត ដើម្បីចាប់យកត្រីដោយខុសច្បាប់ ហាក់បីដូចជាមិនញញើតនោះទេ ទោះបីជាមានការអប់រំផ្សព្វផ្សាយជារឿយៗ យ៉ាងណាក្តីនាពេលកន្លងមកនោះ។ លោក ម៉ា យ៉ុងរី នាយខណ្ឌរដ្ឋបាលជលផលខេត្ត ប្រាប់បន្តថា រហូតមកដល់ព្រឹកថ្ងៃទី២១ មេសា កម្លាំងរបស់លោកបានចុះសហការណ៍ជាមួយនឹងគណៈបញ្ជាការឯកភាពស្រុកអូររាំងឪ បានចុះទៅបង្ក្រាបបទល្មើសនេសាទបានចំនួនខាងលើនោះ។
បឹងកាពិតនេះអតីតឡូត៍នេសាទលេខ៩ ត្រូវបានរាជរដ្ឋាភិបាលកម្ពុជា បានកាត់មកឲ្យប្រជាពលរដ្ឋដើម្បីនេសាទ តែប្រជាពលរដ្ឋមួយចំនួនមិនយល់នឹងច្បាប់នោះទេដោយពួកគាត់បាននាំគ្នាប្រព្រឹត្តបទល្មើស ដាក់ឧបករណ៍នេសាទខុសច្បាប់ ក្នុងផ្ទៃទឹកបឹងដើម្បីបំផ្លាញពពួកមច្ឆាជាតិតូចធំទៅវិញ។ កន្លងមកមន្ត្រីជំនាញជលផល ក៏ដូចជាអាជ្ញាមូលដ្ឋានធ្លាប់បានធ្វើការផ្សព្វផ្សាយជារឿយៗ ធ្វើយ៉ាងណាឲ្យពលរដ្ឋដែលរស់នៅជុំវិញបឹងកាពិត ក្នុងឃុំមៀន ស្រុកអូររាំងឪ ប្រើប្រាស់ឧបករណ៍នេសាទស្របច្បាប់ជាលក្ខណៈគ្រួសារ ដើម្បីថែរក្សាឲ្យមានភាពយូរអង្វែងទៅថ្ងៃមុខនោះ។
ក៏ប៉ុន្តែពលរដ្ឋបានស្តាប់យល់ព្រមធ្វើតាម លុះពេលដែលជំនាញចេញមកបាត់បែរជាលួចដាក់ឧបករណ៍នេសាទខុសច្បាប់ព្រោងព្រាតតាមបឹងទៅវិញ តាមច្បាប់ក្នុងករណីដែលចាប់បានពេលកំពុងតែប្រព្រឹត្តបទល្មើសនោះ នឹងត្រូវចាប់បញ្ជូនទៅសាលាដំបូងខេត្ត ។ លោក ម៉ា យ៉ុងរី នាយខណ្ឌរដ្ឋបាលជលផលខេត្តត្បូងឃ្មុំ បញ្ជាក់ថា ទាំងរដូវបិទ និងរដូវបើកនេសាទនាពេលកន្លងមកអាជ្ញាធរស្រុកក៏ដូចជាស្ថាប័នជំនាញ បានចុះទៅបង្ក្រាបបទល្មើសនេសាទនៅបឹងកាពិតខាងលើជាញឹកញាប់មកហើយ តែបទល្មើសនេសាទរបស់ពលរដ្ឋខិលខូចនៅតែបន្តលួចដាក់ដដែលដើម្បីចាប់យកត្រីនោះ។
ក្នុងករណីមិនរាងចាលតែបទសមត្ថកិច្ចចាប់បានពេលដែលកំពុងតែប្រព្រឹត្តបទល្មើសនោះនឹងត្រូវបញ្ជូនទៅតុលាការខេត្ត ដោយមិនអាចអត់ឳនឲ្យបានទេ ព្រោះដដែលៗពេកទង្វើនេះនាំឲ្យអន្តរាយហិនហោចត្រីគ្រប់ប្រភេទ៕
ចែករំលែកព័តមាននេះ