ខេត្តកែប ៖ ជិតដល់ថ្ងៃរៀបការហើយ ស្រាប់តែបាត់ខ្លួនកូនក្រមុំ ធ្វើឲ្យកូនកំលោះមានការខកបំណងយ៉ាងខ្លាំង ហេតុការណ៍នេះកើតឡើងនៅថ្ងៃទី១៤ ខែមេសា ឆ្នាំ២០១៧ វេលាម៉ោង៩ព្រឹក នៅផ្សារកំពុងត្រាច ។
តាមព័ត៌មានបានឱ្យដឹងថា កូនក្រមុំឈ្មោះ ង៉ែត ទូច ហៅស្រីពេជ្រ អាយុ១៩ឆ្នាំ និងកូនកំលោះឈ្មោះ តាន់ សុភ័ក្ត្រ អាយុ២៤ឆ្នាំ អ្នកទាំងពីររស់នៅភូមិអូរដូង ឃុំពងទឹក ស្រុកដំណាក់ចង្អើ ខេត្តកែប ។
បើតាមក្រុមគ្រួសារកូនកំលោះបានឱ្យដឹងថា នៅថ្ងៃទី១៤នោះ អនាគតកូនក្រមុំត្រូវជាកូនប្រសារ និងកូនកំលោះ ព្រមទាំងសាច់ញាតិខាងកូនស្រី៣-៤នាក់ទៀត បានជិះរ៉ឺម៉កម៉ូតូចេញពីផ្សារពងទឹក ហួសទៅផ្សារកំពង់ត្រាច ដោយនាំគ្នាទិញសម្លៀកបំពាក់ត្រៀមនឹងចូលរោងការនៅថ្ងៃទី២០ មេសា តែអកុសលបាត់កូនក្រមុំធ្វើឲ្យកូនកំលោះ និងអ្នករួមដំណើរមានការឆោឡោដើររកពេញផ្សារកំពង់ត្រាច ។
នៅក្នុងហេតុការណ៍នោះដែរសាច់ញាតិទាំងស្រីទាំងប្រុសបាននិយាយថា នៅមុនពេលបាត់កូនក្រមុំក្នុងផ្សារកំពង់ត្រាច កូនក្រមុំបានប្រាប់បងប្អូនជីដូនមួយរបស់នាងដែលទៅផ្សារដូចគ្នាថា សុំទៅបន្ទប់ទឹក ស្រាប់តែបាត់ដំណឹងសូន្យឈឹង ទោះចុចទូរស័ព្ទទៅនាងជាច្រើនដងក៏គ្មានអ្នកលើកដែរ ពេលនោះបាននាំគ្នាដើររកអស់ពេលពេញ១ថ្ងៃតែម្តង ក៏នាំគ្នាត្រឡប់មកផ្ទះវិញរៀងៗខ្លួន ។
បើតាមសម្តីឪពុកម្តាយខាងកូនក្រមុំបានឱ្យដឹងថា កូនស្រីរបស់គាត់នៅថ្ងៃកើតហេតុនោះ បានសុំទៅផ្សារកំពង់ត្រាច ដើម្បីទិញសម្លៀកបំពាក់ចូលរោងការ ហើយជញ្ជៀន១ជី និងលុយខ្មែរ១០ម៉ឺនជាប់ខ្លួន ។ ក្រោយមកស្រាប់តែឮថាបាត់កូនស្រី គាត់មានការព្រួយបារម្ភយ៉ាងខ្លាំងខំដើររកគ្រប់ច្រកល្ហក សូម្បីតែចុចទូរស័ព្ទទៅនាងចូលច្រើនដងមិនលើក លុះចុងក្រោយបិទទូរស័ព្ទចោលទៀត ។ គាត់បន្តទៀតថា រហូតដល់ថ្ងៃទី១៧ មេសា គាត់តាមរកកូនស្រីរបស់គាត់ឃើញនៅឯក្រុងភ្នំពេញក៏នាំមកផ្ទះវិញ ហើយឃើញរាងកាយរបស់នាងមានស្នាមជាំពេញភ្លៅខាងឆ្វេង និងដៃជាច្រើនកន្លែង ចំណែកឯសម្ភារនៅក្នុងខ្លួនមានមាស១ជី ទូរស័ព្ទ១គ្រឿង ក៏បាត់អស់ដែរ រួចហើយគាត់បាននាំកូនស្រីយកទៅស្រោចទឹក ដើម្បីរំដោះគ្រោះ ។ ហើយនៅថ្ងៃទី១៨ មេសា គាត់បានហៅឪពុកម្តាយ និងកូនកំលោះដើម្បីពិភាក្សាពីរឿងរៀបការ ស្រាប់តែកូនក្រមុំបានប្រកែកថាមិនព្រមរៀបការជាដាច់ខាត ធ្វើឲ្យខាងកូនកំលោះ និងឪពុកម្តាយមានការខកបំណងយ៉ាងខ្លាំង ។ ចំណែកឯបណ្តាដែលខាងកូនកំលោះប្រគល់ឱ្យមានចំនួន១.៥០០ដុល្លារ ហើយកក់សម្ភារជាច្រើន និងដើរប្រាប់ភ្ញៀវចំនួន៧០០នាក់ តែបែរជាកូនក្រមុំប្រកែកមិនព្រមវិញ ធ្វើខាងកូនកំលោះមានការខកចិត្តយ៉ាងខ្លាំង។ ស្រាប់តែនៅព្រឹកថ្ងៃទី១៩ ខាងកូនកំលោះបានប្តឹងទៅអាជ្ញាធរឃុំពងទឹក ដើម្បីឱ្យសងបណ្តាការនោះ ដោយខាងកូនក្រមុំបានសងទៅខាងកូនកំលោះបានចំនួន៧០០ដុល្លារខាតអស់៨០០ដុល្លារ ហើយភាគីខាងកូនកម្លោះខ្ជិលសន្សំរឿងក៏ទទួលយក។
បើតាមប្រភពព័ត៌មានពីអាជ្ញាធរឃុំបានឱ្យដឹងថា ទង្វើខាងកូនស្រីធ្វើបែបនេះមិនសមទាល់តែសោះ ធ្វើឲ្យភាគីខាងកូនកំលោះខាតបង់ទាំងថវិកា និងពេលវេលា។ ទាក់ទិននឹងករណីខាងលើសារព័ត៌មានយើងបានសួរទៅសមត្ថកិច្ចប៉ូលិសឃុំពងទឹក ពីរឿងខាងកូនក្រមុំត្រូវថ្នាំសណ្តំរបស់គេនោះ ខាងប៉ូលិសថា ខាងកូនស្រីអត់ដាក់ពាក្យបណ្តឹង ទើបប៉ូលិសប្រគល់ឱ្យអាជ្ញាធរដោះស្រាយរឿងបណ្តាការទៅខាងកូនកំលោះ៕
ចែករំលែកព័តមាននេះ