ក្នុងពិភពលោកយើងនេះនៅរៀងរាល់៤០វិនាទីម្តង មានមនុស្សម្នាក់ ស្លាប់ដោយការសម្លាប់ខ្លួន ។ សម្រាប់អ្នកមានជំងឺធ្លាក់ទឹកចិត្តធ្ងន់ តែងតែគិតអំពីការសម្លាប់ខ្លួន ហើយសញ្ញាសម្គាល់គ្រោះថ្នាក់ខ្លះៗដែលអាចដឹងអ្នកជំងឺអាចកំពុងគិតពីការធ្វើអត្តឃាតនេះមានដូចជា ៖
-គំរាមសម្លាប់ខ្លួន ។
-និយាយថា គ្មាននរណាម្នាក់នឹកនាដល់ខ្ញុំទេ បើពេលណាមួយខ្ញុំបាត់ពីលោកនេះទៅ ។
-រិះរកវិធីផ្សេងៗ ដើម្បីសម្លាប់ខ្លួន ដូចជា ថ្នាំសម្លាប់សត្វល្អិត អាវុធ ថ្នាំពេទ្យ ឬស្វែងរកមធ្យោបាយផ្សេងៗតាមអីុនធើរណេត ដើម្បីដឹងពីរបៀបក្នុងការធ្វើអត្តឃាត ។
-និយាយពាក្យលាទៅកាន់សមាជិកគ្រួសារណាដែលជិតដិត និងមិត្តភក្តិជិតស្និទ្ធ ឬបរិច្ចាគរបស់មានតម្លៃផ្ទាល់ខ្លួន ឬសរសេរបណ្តាំ ។
អ្នកដែលអាចកំពុងប្រឈមគ្រោះថ្នាក់ ជាមួយនឹងការធ្វើអត្តឃាតនេះ មានដូចជា៖
-អ្នកដែលព្យាយាមសម្លាប់ខ្លួនពីមុន ។
-អ្នកដែលមានជំងឺធ្លាក់ទឹកចិត្តឬអ្នកដែលផឹកស្រាច្រើន ឬអ្នកប្រើប្រាស់គ្រឿងញៀន ។
-អ្នកដែលកំពុងរងទុក្ខលំបាកថ្លូវចិត្តធ្ងន់ ឧទាហណ៍ ៖ ក្រោយពីការស្លាប់បាត់បង់ជីវិតមនុស្សជាទីស្រឡាញ់ ឬបាក់បែកស្នេហាជាដើម។
-អ្នកដែលកំពុងរងទុក្ខលំបាកដោយសារមានការឈឺចាប់ធ្ងន់ ឬជំងឺរ៉ាំរ៉ៃ ។
-អ្នកដែលធ្លាប់មានបទពិសោធន៍រស់នៅក្នុងសម័យសង្គ្រាម អំពើហិង្សា ការប៉ះទង្គិចផ្លូវចិត្ត ការរំលោភបំពាន ឬការរើសអើងផ្សេងៗ ។
-អ្នកដែលព្យាយាមនៅឆ្ងាយពីគេឯង ។
នៅពេលដែលលោកអ្នកគិតថាជនណាម្នាក់ស្ថិតអ្នកសភាពដូចដែលបានរៀបរាប់ខាងលើនេះ អ្វីដែលលោកអ្នកអាចធ្វើបាននោះមានដូចជា៖
-ស្វែងរកពេលវេលាសមរម្យ និងកន្លែងស្ងាត់មួយដើម្បីពិភាក្សាអំពីការធ្វើអត្តឃាត ជាមួយអ្នកណាម្នាក់ដែលអ្នកកំពុងបារម្ភពីគាត់ ហើយធ្វើឲ្យគាត់ទទួលអារម្មណ៍ថាអ្នកនៅទីនោះដើម្បីស្តាប់គាត់ ។
-លើកទឹកចិត្តគាត់ឲ្យស្វែងរកការជួយពីអ្នកជំនាញដូចជាវេជ្ជបណ្ឌិត អ្នកជំនាញផ្នែកសុខភាពផ្លួវចិត្ត អ្នកប្រឹក្សា ឬអ្នកសង្គមវិទ្យា ហើយអ្នកអាចជួយគាត់ដើម្បីស្វែងរកការណាត់ជួយជាមួយអ្នកជំនាញទាំងនោះ ។
-ប្រសិនបើអ្នកគិតថា គាត់ស្ថិតក្នុងស្ថានភាពគ្រោះថ្នាក់ខ្លាំង សូមកុំទុកគាត់ឲ្យនៅម្នាក់ឯង ។ ត្រូវស្វែងជំនួយពីអ្នកជំនាញផ្នែកសង្គ្រោះបន្ទាន់ ឬអ្នកជំនាញផ្នែកសុខភាពផ្លូវចិត្តណាមួយ ឬទាក់ទងភ្លាមទៅសមាជិកគ្រួសារគាត់ ។
-ប្រសិនបើអ្នកដែលអ្នកព្រួយបារម្ភជាមនុស្សរស់នៅជាមួយអ្នក អ្នកដាច់ខាត់ត្រូវប្រាកដក្នុងចិត្តថា គាត់មិនអាចរករបស់របរ ដែលអាចបង្កគ្រោះថ្នាក់ដល់គាត់បានទេ ។
-តាមដាន និងនៅក្បែរគាត់ជានិច្ច ដើម្បីអាចដឹងថាគាត់កំពុងធ្វើអ្វីខ្លះ ។ ប្រសិនបើអ្នកដឹងថា មាននរណាម្នាក់អាចកំពុងគិតចង់សម្លាប់ខ្លួន សូមនិយាយជាមួយគាត់អំពីរឿងនោះ ។ ត្រូវស្តាប់គាត់ដោយបើកចិត្តឱ្យទូលាយ និងផ្តល់ការជួយគាំទ្រផ្លូវចិត្តដល់គាត់ ៕
ចែករំលែកព័តមាននេះ