អារ៉ែងជាតំបន់ទេសចរណ៍ធម្មជាតិដ៏ត្រកាលទាក់ទាញទេសចរជាតិនិងអន្តរជាតិ
ខេត្តកោះកុង ៖ កាលពីថ្ងែទី១៩ ខែមេសា ឆ្នាំ២០១៧ លោកថោង ខុន រដ្ឋមន្ត្រីក្រសួងទេសចរណ៍ បានដឹកនាំប្រតិភូ និងសមាគមទីភ្នាក់ងារទេសចរណ៍(CATA)ទៅធ្វើទស្សនកិច្ចនៅ
ខេត្តកោះកុង ៖ កាលពីថ្ងែទី១៩ ខែមេសា ឆ្នាំ២០១៧ លោកថោង ខុន រដ្ឋមន្ត្រីក្រសួងទេសចរណ៍ បានដឹកនាំប្រតិភូ និងសមាគមទីភ្នាក់ងារទេសចរណ៍(CATA)ទៅធ្វើទស្សនកិច្ចនៅសហគមន៍អេកូទេសចរណ៍អារ៉ែង ។ លោករដ្ឋមន្ត្រីបានណែនាំឱ្យសហគមន៍អេកូទេសចរណ៍ ដែលទើបកើតថ្មីមួយនេះអនុវត្តការងាររបស់ខ្លួនឱ្យស្របតាមស្តង់ដាជាតិ និងអាស៊ាន ដើម្បីទាក់ទាញភ្ញៀវទេសចរជាតិ និងអន្តរជាតិ ឱ្យទៅទស្សនាកាន់តែច្រើនឡើង ។
នាឱកាសនោះមានការចូលរួមពីលោកប៊ុន លឺត អភិបាលខេត្តកោះកុង លោកហាស់ សារ៉េត រដ្ឋលេខាធិការក្រសួងកសិកម្ម លោកសូខន ឫទ្ធិគុណ អនុរដ្ឋលេខាក្រសួងបរិស្ថាន កញ្ញា Suwanna Gauntlet ប្រធានអង្គការសម្ព័ន្ធភាពសត្វព្រៃ លោកស្រីឆាយ ស៊ីវលីន ប្រធានសមាគមទីភ្នាក់ងារទេសចរណ៍(CATA)លោកអភិបាលស្រុកថ្មបាំង មេឃុំ រួមជាមួយប្រជាពលរដ្ឋសហគមន៍ជាង២០០នាក់ ដែលរស់នៅក្នុងឃុំចំនួន៣ឃុំ នៃស្រុកថ្មបាំង ខេត្តកោះកុង ។
លោកថោង ខុន រដ្ឋមន្ត្រីក្រសួងទេសចរណ៍ បានណែនាំឱ្យសហគមន៍អេកូទេសចរណ៍អារ៉ែង អនុវត្តការងាររបស់ខ្លួនឱ្យបានល្អស្របតាមស្តង់ដាសហគមន៍ទេសចរណ៍កម្ពុជានិងអាស៊ាន ។
ចំពោះការខ្វះខាតអគ្គិសនី សេវាទូរស័ព្ទ អុីនធើរណេត ការគ្រប់គ្រងកែច្នៃកាកសំណល់ ក្រសួងពាក់ព័ន្ធ និងអាជ្ញាធរខេត្តនឹងសហការដោះស្រាយជាបន្តបន្ទាប់ទៀត ។
លោកថោង ខុន បានប្រាប់ប្រជាពលរដ្ឋនៅក្នុងសហគមន៍អំពីផលប្រយោជន៍នៃសហគមន៍ទេសចរណ៍ ដែលនាំមកដល់ប្រជាជនសហគម៍មូលដ្ឋាន តាមរយៈការចំណាយរបស់ភ្ញៀវទេសចរជាតិ និងអន្តរជាតិដែលជាដំណើរ និងសកម្មភាពទេសចរណ៍មួយប្រកបដោយស្មារតីទទួលខុសត្រូវខ្ពស់ក្នុងការទស្សនាកម្សាន្តផង និងចូលរួមថែរក្សាការពារបរិស្ថានធម្មជាតិផង ។ លោកក៏បានប្រាប់ប្រជាពលរដ្ឋ អំពីតួនាទីរបស់ភាគីទាំង៤(Public,Partnership,Private, People)ក្នុងការជួយអភិវឌ្ឍសហគមន៍អេកូទេសចរណ៍មានភាគីសាធារណៈបច្ចុប្បន្ន រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជានាយករដ្ឋមន្ត្រីបានណែនាំឱ្យក្រសួងអភិវឌ្ឍន៍ជនបទស្ថាបនាផ្លូវថ្នល់ដែលបច្ចុប្បន្នកំពុងស្ថាបនាកសាងដោយកងវិស្វកម្ម នៃអគ្គបញ្ជាការដ្ឋានក្រសួងការពារជាតិ ដែលជាប្រតិបត្តិករស្ថាបនាធ្វើជិតរួចរាល់ហើយ និងការទទួលស្គាល់ផ្លូវច្បាប់របស់ក្រសួងពាក់ព័ន្ធ ពីថ្នាក់ក្រោមជាតិ និងថ្នាក់ជាតិ រួមមានក្រសួងមហាផ្ទៃ ក្រសួងបរិស្ថាន ក្រសួងទេសចរណ៍ ក្រសួងកសិកម្ម រុក្ខាប្រមាញ់និងនេសាទ ។
ចំពោះអង្គការសម្ព័ន្ធភាពសត្វព្រៃគឺជាដៃគូមួយដ៏ល្អកំពុងជួយរៀបចំរចនាសម្ព័ន្ធសហគមន៍ផ្តល់បទពិសោធន៍នានាក្នុងដំណើរការអភិវឌ្ឍសហគមន៍ ។
ចំណែកភាគីឯកជនមិនអាចខ្វះបានក៏នឹងជួយផ្សព្វផ្សាយទាក់ទាញទេសចរទាំងជាតិ អន្តរជាតិ និងពិចារណាតាមការចាំបាច់នាំមកនូវអ្នកវិនិយោគទុនខ្នាតតូច ដែលមានពិសោធន៍ក្នុងកិច្ចការពារបរិស្ថាន ។
ភាគីទី៤ គឺប្រជាពលរដ្ឋសហគមន៍មូលដ្ឋាន ដែលចាំបាច់ត្រូវមានការយល់ដឹងច្បាស់លាស់ អំពីអនាម័យ កិច្ចការពារបរិស្ថាន និងការរៀនសូត្រអំពីជំនាញវិជា្ជជីវៈទេសចរណ៍ ដូចជាផ្នែកបដិសណ្ឋារកិច្ច ភាសាទាក់ទង ផ្ទះស្នាក់ មគ្គុទ្ទេសទេសចរណ៍សហគមន៍ សេវាដឹកជញ្ជូន សេវាម្ហូបអាហារ ដែលការងារនេះក្រសួងទេសចរណ៍ នឹងជួយបណ្តុះបណ្តាលបង្ហាត់បង្រៀន ។
តំបន់សហគមន៍អេកូទេសចរណ៍អារ៉ែង ស្ថិតនៅចម្ងាយ៣៤០គីឡូម៉ែត្រ ពីរាជធានីភ្នំពេញ និង៨០គីឡូម៉ែត្រពីទីរួមខេត្តកោះកុង ។ អារ៉ែងសម្បូរទៅដោយសក្តានុពលទេសចរណ៍ធម្មជាតិល្អឯក មានគោលដៅទេសចរណ៍ជាង៦០ដែលគួរទៅទស្សនា ដូចជាតំបន់ទឹកធ្លាក់ឆាយអារ៉ែង ឆាយហ៊ីង អូរពោធិ៍ប្រាំបួន តំបន់ដើរផ្សងព្រេង (Trekking) តំបន់មើលថ្ងៃលិច ជម្រកសត្វក្រពើភ្នំ ជម្រកត្រីនាគ តំបន់ពាងក្រឡបុរាណ តំបន់ជនជាតិភាគតិចកំពុងរស់នៅ ។
លោករដ្ឋមន្ត្រីក្រសួងទេសចរណ៍បានផ្តល់ប្រាក់ និងអំណោយសម្ភារ ថ្នាំពេទ្យមួយចំនួនជូនប្រជាពលរដ្ឋមូលដ្ឋាន យោធាតំបន់សឹករងស្រុកថ្មបាំង និងបានឧបត្ថម្ភទោចក្រយាន២០គ្រឿងដល់សហគមន៍អេកូទេសចរណ៍អារ៉ែង ៕
ចែករំលែកព័តមាននេះ