ចម្លែកណាស់ ម្តាយក្មេកមិនស្គាល់ភូមិស្រុកអនាគតកូនប្រសា បាត់កូនស្រីប្តឹងប៉ូលិស
រាជធានីភ្នំពេញ ៖ ស្ត្រីម្នាក់បានកាន់រូបថតកូនស្រីទាំងអារម្មណ៍ក្តុកក្តួល មកកាន់ប៉ុស្ដិ៍នគរបាលចោមចៅ កាលពីវេលាម៉ោង៦ល្ងាចថ្ងៃទី១៨ ខែមេសា
រាជធានីភ្នំពេញ ៖ ស្ត្រីម្នាក់បានកាន់រូបថតកូនស្រីទាំងអារម្មណ៍ក្តុកក្តួល មកកាន់ប៉ុស្ដិ៍នគរបាលចោមចៅ កាលពីវេលាម៉ោង៦ល្ងាចថ្ងៃទី១៨ ខែមេសា ដើម្បីសុំឱ្យនគរបាលជួយអន្តរា គមន៍រកកូនស្រីគាត់ ដែលនាងបានទៅលេងស្រុកកំណើតខាងគូដណ្ដឹងអស់រយៈពេលជាង១០ថ្ងៃហើយ មិនឃើញត្រឡប់មកផ្ទះវិញសោះ ។
ចំណែករូបគាត់ជាម្ដាយមិនដែលបានស្គាល់ស្រុកកំណើតអនាគតកូនប្រសាទេ គឺដឹងត្រឹមតែនៅក្នុងខេត្តព្រៃវែងប៉ុណ្ណោះ ប៉ុន្តែមិនបានដឹងថានៅក្នុងភូមិ ឃុំ និងស្រុកណាឡើយ ទើបមិនអាចទៅតាមរកដល់ទីនោះបាន ។ ម្យ៉ាងទៀតកូនស្រីសំណព្វចិត្តក៏បានបិទទូរស័ព្ទមិនអាចទាក់ទងបានទៀត ទើបធ្វើឱ្យគាត់មានការព្រួយបារម្ភយ៉ាងខ្លាំងពីសុវត្ថិភាពកូនស្រី ហើយក៏បានរត់រកនគរបាលឱ្យជួយតែម្ដង ។
ស្ត្រីជាម្ដាយរូបនេះឈ្មោះ ម៉ា ចាន់ អាយុ៤៣ឆ្នាំ ជាកម្មការិនីរោងចក្រកាត់ដេរ មានស្រុកកំណើតនៅភូមិខ្នាច ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង បច្ចុប្បន្នស្នាក់នៅផ្ទះជួលក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។ គាត់មានកូនជាមួយប្ដីមុន២នាក់ចំណែកកូនស្រីដែលបាត់ខ្លួនឈ្មោះ អ៊ន ស្រីចម អាយុ១៨ឆ្នាំ ជាកូនប្តីមុន និងជាកម្មការិនីរោងចក្រកាត់ដេរដែរ ។ ក្រោយពេលបែកបាក់ជាមួយប្ដីមុន គាត់បានយកប្តីក្រោយទៀត ឈ្មោះឡេង សេង បច្ចុប្បន្នអាយុ៤៨ឆ្នាំ និងមានកូនជាមួយប្ដីក្រោយនេះ២នាក់ទៀត ។ ដោយឡែក គូដណ្ដឹងកូនស្រីនិងជាអនាគតកូនប្រសាគាត់នោះឈ្មោះ ពិសិដ្ឋ មានស្រុកកំណើតនៅខេត្តព្រៃវែង ។
នៅប៉ុស្ដិ៍នគរបាលចោមចៅ ស្ត្រីដែលបាត់កូនស្រីរូបនេះបានប្រាប់នគរបាលថា គាត់និងក្រុមគ្រួសារបានចាកចេញពីស្រុកកំណើត មកស្នាក់នៅក្នុងផ្ទះជួលខាងលើដើម្បីធ្វើជាកម្មករ កម្មការិនីរោងចក្រកាត់ដេរ ។ ឯកូនស្រីគាត់បានទទួលការស្រឡាញ់ពីយុវជនឈ្មោះ ពិសិដ្ឋដោយយុវជនរូបនេះ បានឱ្យចាស់ទុំចូលចែចូវស្ដីដណ្ដឹងតាមទំនៀមទម្លាប់ប្រពៃណីខ្មែរ កាលពីអំឡុងថ្ងៃបុណ្យភ្ជុំបិណ្ឌក្នុងឆ្នាំ២០១៦កន្លងទៅ ។
ក្រោយពេលចូលស្ដីដណ្ដឹងនិងភ្ជាប់ពាក្យរួចរាល់ហើយ ក៏បានកំណត់ថ្ងៃរៀបអាពាហ៍ពិពាហ៍នៅក្នុងខែសីហា ឆ្នាំ២០១៧ គឺ៤ខែខាងមុខនេះ ដោយខាងប្រុសបានព្រមជូនថ្លៃទឹកដោះចំនួន១.៥០០ដុល្លារ ។ ទោះជាបែបនេះក្ដី ការចូលស្ដីដណ្ដឹងនិងការភ្ជាប់ពាក្យធ្វើឡើងនៅផ្ទះជួលក្នុងភូមិជម្ពូវ័ន សង្កាត់ចោមចៅ តែប៉ុណ្ណោះ មិនបានទៅធ្វើនៅឯស្រុកកំណើតនោះទេ ។ ចំណែករូបគាត់ក៏មិនដែលបានស្គាល់ស្រុកកំណើតខាងអនាគតកូនប្រសានោះដែរ គឺមានតែកូនស្រីគាត់ដែលបាត់ខ្លួនម្នាក់គត់ដែលស្គាល់ ។
ស្ត្រីជាម្ដាយរូបនេះរៀបរាប់ទៀតថា ដោយឡែកកាលពីថ្ងៃទី៨ ខែមេសា កូនស្រីគាត់បានសុំទៅលេងស្រុកកំណើតគូដណ្ដឹង ដោយមុនពេលទៅបានប្រគល់លុយប្រាក់ខែឱ្យគាត់ទាំងអស់ ឯនៅជាប់នឹងខ្លួននាងមានតែគ្រឿងអលង្ការមួយចំនួនប៉ុណ្ណោះ ហើយបានប្រាប់គាត់ថា នឹងវិលត្រឡប់មកផ្ទះវិញឱ្យទាន់ថ្ងៃបុណ្យចូលឆ្នាំថ្មី ។
ប៉ុន្តែ ស្រាប់តែទៅបាត់រហូតដល់ថ្ងៃទី១៦ ខែមេសា ទើបគាត់ទូរស័ព្ទទៅសួរកូនស្រីថា «ត្រឡប់មកផ្ទះវិញថ្ងៃណា? ព្រោះត្រូវចូលធ្វើការវិញនៅថ្ងៃទី១៨ ខែមេសា ហើយ» ។ ពេលនោះកូនស្រីបានប្រាប់ថា «ដឹងហើយតែថ្ងៃទី១៧ ខែមេសា ទើបត្រឡប់មកវិញ ព្រោះពេលនេះអត់មានរថយន្តឈ្នួលជិះទៅទេ» ។
បន្ទាប់ពីនោះមក ក៏ស្រាប់តែកូនស្រីបិទទូរស័ព្ទរហូតហៅលែងចូលតែម្ដង ហើយក៏មិនឃើញត្រឡប់មកផ្ទះវិញសោះ ដែលជាហេតុធ្វើឱ្យគាត់មានការព្រួយបារម្ភខ្លាចកូនមានគ្រោះថ្នាក់ដោយប្រការណាមួយ ។ ម្យ៉ាងទៀត គាត់មិនដែលស្គាល់ស្រុកកំណើតអនាគតកូនប្រសា និងមិនអាចទៅតាមរកបានផងនោះ ទើបសម្រេចចិត្តដាក់ពាក្យបណ្ដឹង សុំឱ្យនគរបាលជួយអន្តរាគមន៍ស្វែងរក ។
ទោះបីជាបែបណា នៅពេលនោះនគរបាលបានទទួលពាក្យបណ្ដឹងពីគាត់ និងបានលួងលោមកុំឱ្យពិបាកចិត្តនិងកុំគិតអ្វីដែលអាក្រក់ៗ ខណៈមិនទាន់មានការច្បាស់លាស់ក្នុងចិត្តនោះ ៕
ចែករំលែកព័តមាននេះ