កូរ៉េខាងជើងមានសមត្ថភាពទាញយកថវិកាដើម្បីអភិវឌ្ឍន៍កម្មវិធីអាវុធនុយក្លេអ៊ែររបស់ខ្លួនមិនគួរឲ្យជឿ បើទោះជាប្រទេសតូចមួយនេះបានផ្តាច់ខ្លួនចេញពីប្រទេសដទៃនៅលើពិភពលោក និងត្រូវបានគេដាក់ទណ្ឌកម្មធ្ងន់ធ្ងរក៏ដោយ ។ នេះបើយោងតាមគេហទំព័រ cnbc ចេញផ្សាយកាលពីថ្ងៃទី១៨ មេសា ។
ធនាគារជាតិរបស់កូរ៉េខាងត្បូងព្យាករថា ប្រាក់ចំណូលក្នុងស្រុកសរុបរបស់កូរ៉េខាងជើងក្នុងឆ្នាំ២០១៥ គឺស្មើតែ៣០ប៊ីលានដុល្លារប៉ុណ្ណោះ ឬ២,២%នៃប្រាក់ចំណូលក្នុងស្រុកសរុបរបស់កូរ៉េខាងត្បូង ប៉ុន្តែកូរ៉េខាងជើងបានចំណាយប្រមាណ២៥%នៃផលិតផលក្នុងស្រុកសរុប (GDP) របស់ខ្លួនទៅលើអាវុធ ។
លោកស្រី Sharon Squassoni ប្រធានកម្មវិធីទប់ស្កាត់ការបង្កើនចំនួនអាវុធ ក្នុងមជ្ឈមណ្ឌលសិក្សាយុទ្ធសាស្ត្រអន្តរជាតិ និយាយថា ៖ « នេះគឺជាជនផ្តាច់ការដ៏ឃោរឃៅម្នាក់ ដែលមិនចង់ប្រើប្រាស់ថវិកាសម្រាប់សុវត្ថិភាព សុខភាព និងការអប់រំប្រជាជនខ្លួន ។ ខ្ញុំមិនភ្ញាក់ផ្អើលទេ ប្រសិនបើលោកប្រើប្រាស់ធនធានចូលក្នុងការផលិតអាវុធនុយក្លេអ៊ែរ ។ ខ្ញុំសង្ឃឹមថា នឹងមិនត្រូវបានប្រើប្រាស់ » ។
យោងតាមអ្នកវិភាគ ខាងក្រោមនេះគឺជាប្រភពទាំង៥ ដែលផ្តល់ថវិកាដល់កូរ៉េខាងជើង ។
១-ប្រទេសចិន ៖
យោងតាមភ្នាក់ងារ CIA របស់សហរដ្ឋអាមេរិក ប្រមាណ៣ភាគ៤នៃការធ្វើពាណិជ្ជកម្មរបស់កូរ៉េខាងជើង គឺត្រូវបានធ្វើឡើងជាមួយប្រទេសចិន ដែលនៅជិតខាង ។
លោក Scott Snyder នាយកផ្នែកកម្មវិធីទាក់ទិននឹងគោលនយោបាយអាមេរិក និងកូរ៉េក្នុងក្រុមប្រឹក្សាទំនាក់ទំនងបរទេស និយាយថា ៖ « ប្រទេសចិនមានសមត្ថភាពយ៉ាងខ្លាំងក្នុងការជះឥទ្ធិពលលើស្ថិរភាពនៅកូរ៉េខាងជើង ប៉ុន្តែភាគច្រើនពួកគេគិតថា មិនអាចប្រើប្រាស់សមត្ថភាពនោះបាន ព្រោះតែវាអាចប៉ះពាល់ដល់ផលប្រយោជន៍របស់ចិនក្នុងកូរ៉េខាងជើង»។ លោកបន្ថែមថា ប្រទេសចិនមានសមត្ថភាពបញ្ឈប់ការផ្គត់ផ្គង់អាហារ និងថាមពលដល់កូរ៉េខាងជើង ។
ប៉ុន្តែការដួលរលំរបស់កូរ៉េខាងជើងអាចនឹងបង្កឲ្យមានជនភៀសខ្លួនរត់ឆ្លងព្រំដែនចូលមកកាន់តំបន់ឦសានរបស់ប្រទេសចិន ដែលមានសេដ្ឋកិច្ចទន់ខ្សោយ និងជាស្ថានការណ៍មួយដែលប្រទេសចិនចង់ចៀសវាង ។
២-ពលកម្មទាសករនៅបរទេស ៖
លោក Robert Manning មកពី Atlantic Council និយាយថា ពលករចាប់បង្ខំជនជាតិកូរ៉េខាងជើងនៅប្រទេសចិន និងរុស្ស៊ី បានផ្តល់ ថវិកាដល់កូរ៉េខាងជើង ។ ការនាំចេញផ្សេងៗដូចជាធ្យូងថ្ម និងធនធានរ៉ែ ក៏ផ្តល់ថវិកាជាប្រាក់យន់របស់ចិន ដុល្លារអាមេរិក និងអឺរ៉ូជាដើម ។
៣-ការលក់អាវុធ ៖
លោកស្រី Anwita Basu អ្នកវិភាគរបស់ The Economist Intelligence Unit និយាយថា ៖ « សេដ្ឋកិច្ចរបស់កូរ៉េខាងជើង គឺដឹកនាំដោយការលក់អាវុធ » ។ លោកស្រីអះអាងថា ការលក់អាវុធរបស់កូរ៉េខាងជើងបានសម្រេចជាមួយប្រទេសក្នុងទ្វីបអាហ្វ្រិក ។ ចំណែកអ្នកវិភាគនយោបាយផ្សេងទៀតគិតថា កូរ៉េខាងជើង និងប្រទេសអីុរ៉ង់បានសហការគ្នាលើការផលិតអាវុធនុយក្លេអ៊ែរផងដែរ ។
សេចក្តីរាយការណ៍ប្រចាំខែកុម្ភៈរបស់អ្នកជំនាញក្រុមប្រឹក្សាសន្តិសុខនៃអង្គការសហប្រជាជាតិឲ្យដឹងថា កូរ៉េខាងជើងបន្តធ្វើពាណិជ្ជកម្មអាវុធ និងធនធានដែលទាក់ទិនក្នុងទីផ្សារជាមួយសេវាកម្មផ្គត់ផ្គង់ក្នុងអាស៊ី អាហ្វ្រិក និងមជ្ឈិមបូព៌ា ។
សេចក្តីរាយការណ៍បន្ថែមថា កូរ៉េខាងជើងប្រើប្រាស់ក្រុមហ៊ុនសាងសង់របស់ខ្លួនក្នុងអាហ្វ្រិក ដើម្បីភ្ជាប់ហេដ្ឋារចនាសម្ព័ន្ធដែលទាក់ទិននឹងអាវុធ យោធា និងសន្តិសុខ ។
៤-គ្រឿងញៀន ៖
លោក Manning បន្តថា ៖ « កូរ៉េខាងជើងមានវិស័យគ្រឿងញៀនខុសច្បាប់យ៉ាងធំ ។ ខ្ញុំធ្លាប់ឃើញគំរូថ្នាំ Viagra ដែលបានលក់ចេញពីកូរ៉េខាងជើង ។ វាគឺជាប្រភពថវិកាដ៏សំខាន់ » ។
៥-ឧក្រិដ្ឋកម្មតាមអីុនធើរណេត ៖
កូរ៉េខាងជើងត្រូវបានរាយការណ៍មកថា ជាអ្នកនៅពីក្រោយខ្នងនៃការលួចប្រាក់លើអុីនធើរណេតចំនួន៨១លានដុល្លារពីធនាគារកណ្តាលរបស់ញូវយ៉ក តាមរយៈគណនីមួយក្នុងប្រទេសបង់ក្លាដែស កាលពីឆ្នាំមុន ។
សហគ្រាសហិរញ្ញវត្ថុរបស់ប្រទេសចិនមួយចំនួន ក៏ត្រូវបានប្រើប្រាស់ជាផ្លូវសម្រាប់ផ្តល់ថវិកាដល់កូរ៉េខាងជើងផងដែរ ។ កាលពីខែកុម្ភៈ សមាជិកព្រឹទ្ធសភាអាមេរិកចំនួន៦រូបបានផ្ញើសំណើទៅកាន់លេខាធិការរតនាគារអាមេរិក លោក Steven Mnuchin និងជំរុញលោកឲ្យរឹតបន្តឹងទំនាក់ទំនងរវាងធនាគារចិន និងធនាគារកូរ៉េខាងជើង ៕
ចែករំលែកព័តមាននេះ