រាជធានីភ្នំពេញ ៖ ល្បែងបោះអង្គញ់ ចោលឈូងនិងល្បែងប្រជាប្រិយខ្មែរជាច្រើនទៀតស្ទើរតែគ្មានលេងកម្សាន្ត ខណៈល្បែងជះទឹក និងប៉ាតម្សៅពេញនិយមលេងកម្សាន្តក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ។
រាជធានីភ្នំពេញ ៖ ល្បែងបោះអង្គញ់ ចោលឈូងនិងល្បែងប្រជាប្រិយខ្មែរជាច្រើនទៀតស្ទើរតែគ្មានលេងកម្សាន្ត ខណៈល្បែងជះទឹក និងប៉ាតម្សៅពេញនិយមលេងកម្សាន្តក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ។
ល្បែងប្រជាប្រិយខ្មែរមួយចំនួនហាក់មិនមានការបំផុសលេងកម្សាន្ត ឬស្ទើរតែគ្មានឃើញលេងក្នុងឱកាសបុណ្យចូលឆ្នាំខ្មែរដែលកន្លងទៅនាពេល ថ្មីៗនេះ ក្នុងនោះមានល្បែងបោះអង្គញ់ ចោលឈោង លាក់កន្សែង ដណ្តើមស្លឹកឈើជាដើម ។
ជាការកត់សម្គាល់ប៉ុន្មានឆ្នាំចុងក្រោយនេះល្បែងប្រជាប្រិយខ្មែរបានធ្លាក់ចុះប្រជាប្រិយភាពក្នុងការលេងនៅតាមទីតំបន់នានាដោយជំនួសវិញដោយការរាំច្រៀង និងការលេងប៉ាតម្សៅនិងជះទឹក ដែលល្បែងមួយនេះមានឥទ្ធិពលមកពីប្រទេសជិតខាង ។
ល្បែងបោះអង្គញ់ និងចោលឈូងដែលជាល្បែងប្រជាប្រិយខ្មែរមានការនិយមលេងជាងគេនៅក្នុងឱកាសបុណ្យចូលឆ្នាំខ្មែរនាពេលកន្លងមកនោះ ស្ទើរតែបាត់វត្តមានលេងនៅឱកាសបុណ្យចូលឆ្នាំខ្មែរ ខណៈពេលល្បែងវាយក្អម និងល្បែងប្រជាប្រិយមួយចំនួនទៀតត្រូវគេលើកយកមកលេងតិចតួចប៉ុណ្ណោះនៅតាមស្រុកភូមិនានា ។
អ្វីដែលមិននឹកស្មានដល់នោះនៅតាមកញ្ចក់ទូរទស្សន៍នានា គេសង្កេតឃើញមិនសូវមានការថតទុក សម្រាប់ចាក់ផ្សាយការលេងល្បែងប្រជាប្រិយខ្មែរឱ្យបានផុសផុលដូចបណ្តាឆ្នាំ មុនៗទេ ផ្ទុយទៅវិញមានតែការច្រៀងរាំចង្វាក់ប្រពៃណី ។
លោកសួ ម៉េង ជាកម្មករសំណង់វ័យជិត៤០ឆ្នាំ រស់នៅភូមិកោះផុស ស្រុកកៀនស្វាយ ខេត្តកណ្តាលឱ្យដឹងថា កាលលោកនៅកំលោះ មុន និងពេលបុណ្យចូលឆ្នាំ នៅក្នុងភូមិរបស់លោក តែងតែប្រមូលផ្តុំគ្នាលេងល្បែងប្រជាប្រិយខ្មែរ ផ្សេងៗ ។ ល្បែងប្រជាប្រិយខ្មែរដែលពួកលោកនិយមលេងនោះ មានបោះអង្គញ់ លាក់កន្សែង និងល្បែងប្រជាប្រិយមួយចំនួនទៀត ។
បើតាមលោកសួ ម៉េង ថាល្បែងប្រជាប្រិយខ្មែរត្រូវអ្នកភូមិលេងតាំងពីមុនចូលឆ្នាំខ្មែរ និងពេលចូលឆ្នាំខ្មែរ ដែលក្នុងពេលនោះល្បែងជះទឹក លាបម្សៅមិនទាន់មានវត្តមានទេ ។
ការមិននាំគ្នាលេងល្បែងប្រជាប្រិយខ្មែរនាប៉ុន្មានឆ្នាំចុងក្រោយនេះ សម្រាប់លោកមិនដឹងមូលហេតុឱ្យបានទូលំទូលាយឡើយ ប៉ុន្តែតាមការគិតរបស់លោក យុវវ័យសម័យនេះនិយមរាំលេងកម្សាន្តជាជាងការលេងល្បែងប្រជាប្រិយខ្មែរ ។
លោកអឿន ចុងភៅរស់នៅភូមិដីឥដ្ឋ ស្រុកកៀនស្វាយ វ័យជាង៣០ឆ្នាំឱ្យដឹងថា ក្នុងរយៈពេល៣ថ្ងៃនៃពិធីបុណ្យចូលឆ្នាំខ្មែរ លោកសង្កេតឃើញថា ល្បែងបោះអង្គញ់និងចោលឈូង បាត់វត្តមានលេងនៅក្នុងស្រុកភូមិរបស់លោក ប៉ុន្តែលោកមិនសូវដឹងពីមូលហេតុអ្វីឡើយ ព្រោះសូម្បីតែរូបលោកពេលមានប្រពន្ធកូនហើយនោះ ក៏ហាក់មិនសូវជាចាប់អារម្មណ៍ចូលរួមលេងកម្សាន្តដែរ ក្រៅពីការជួបជុំមិត្តភក្តិបងប្អូនផឹកសុីសប្បាយប៉ុណ្ណោះ ។
លោកកែវ ស៊ីណេត បុគ្គលិកបម្រើការនៅក្រុមហ៊ុនឯកជនមួយអះអាងថា ល្បែងកម្សាន្តចោលឈូង បោះអង្គញ់ពិតជាបាត់វត្តមានលេងកម្សាន្តនាឱកាសបុណ្យចូលឆ្នាំខ្មែរមែន ។ ក្នុងឆ្នាំនេះសូម្បីតែរូបលោកដែលបានរៀបចំនាំ ចាស់ៗ និង ក្មេងៗមួយចំនួនលេងល្បែងប្រជាប្រិយខ្មែរនៅក្នុងភូមិនោះក៏មិនបាននឹកឃើញដល់ការរៀបចំលេងល្បែងទាំងនោះដែរ លោកគ្រាន់តែបានរៀបចំល្បែងមួយចំនួនដូចជាវាយក្អម រាំដណ្តើមកៅអី និងបូមទឹកដាក់ដបប៉ុណ្ណោះ ។
បើតាមលោកកែវ ស៊ីណេត ល្បែងប្រជាប្រិយដែលលោកបានរៀបចំនេះ អូសទាញកុមារឱ្យចូលរួមលេងច្រើនជាងមនុស្សពេញវ័យនិងមនុស្សចាស់ ហើយល្បែងទាំងអស់នេះគឺបានផ្តល់ភាពសប្បាយរីករាយជាងល្បែង ផ្សេងៗ ។
ល្បែងប្រជាប្រិយខ្មែរបានថមថយប្រជាប្រិយភាពនៅដំណាក់កាលប៉ុន្មានឆ្នាំចុងក្រោយនេះ ក្នុងពេលដែលបច្ចេកវិទ្យា និងបរិបទសង្គមមានការផ្លាស់ប្តូរ ក្នុងនោះទំនោរចិត្តរបស់យុវវ័យក៏មានការប្រែប្រួលដែរ ។
តាមការតំណាល ពីចាស់ៗថា ល្បែងប្រជាប្រិយខ្មែរត្រូវប្រជាជនខ្មែរលើកយកមកលេងកម្សាន្តតាំងពីមុនចូលឆ្នាំខ្មែរម្ល៉េះ ពោលអាចលេងតាំងពី១ខែ ឬកន្លះខែមុនចូលឆ្នាំខ្មែរមកដល់ ។
ល្បែងប្រជាប្រិយដែលគេនិយមលែងកម្សាន្តខ្លាំងជាងគេ មានចោលឈូង ទាញព្រ័ត្រ លាក់កន្លែង។ល។ ប៉ុន្តែល្បែងប្រជាប្រិយខ្មែរក្នុងយុគសម័យទំនើបនេះ មិនសូវទទួលបានការចាប់អារម្មណ៍លេងពីយុវវ័យឡើយ តែជំនួសមកវិញ ដោយការលេងល្បែងស៊ីសង ផឹកស្រា ចាក់ធុងបាស់រាំលេងយ៉ាងផុសផុលនៅតាមភូមិ ឃុំ ។
មានការលើកឡើងថា មូលហេតុសំខាន់ចំនួន៣ ដែលអាចពន្យល់ពីការប្រែប្រួលធ្វើឱ្យមានការថមថយនូវការលេងល្បែងប្រជាប្រិយខ្មែរនាឱកាសបុណ្យចូលឆ្នាំខ្មែរ គឺទី១-កត្តាសេដ្ឋកិច្ច ទី២-ការហូរចូលនៃវប្បធម៌បរទេស និងទី៣-ការរីកចម្រើននៃបច្ចេកវិទ្យា ។
ល្បែងប្រជាប្រិយខ្មែរ ជាង២០ទម្រង់ មិនត្រឹមតែមានប្រយោជន៍ពង្រឹងសាមគ្គីភាព ធ្វើឱ្យសប្បាយ មានសុខភាពកម្លាំងកាយ និងស្មារតីរឹងមាំទេ វាជាអត្តសញ្ញាណមួយរបស់ខ្មែរ ដែលបន្សល់ទុកតាំងពីបុរាណកាល ៕
ចែករំលែកព័តមាននេះ