គណបក្សប្រឆាំងនៅតែបង្ហាញជំហរចង់ចរចា ជាមួយគណបក្សកាន់អំណាចក្នុងការដោះលែងអ្នកទោស
រាជធានីភ្នំពេញ ៖ លោកស្រី មូរ សុខហួរ អនុប្រធានគណបក្សសង្គ្រោះជាតិ នៅថ្ងៃទី១៩ ខែមេសា បានថ្លែងថា គណបក្សលោកស្រីនៅតែមានសង្ឃឹមក្នុងការចរចា
រាជធានីភ្នំពេញ ៖ លោកស្រី មូរ សុខហួរ អនុប្រធានគណបក្សសង្គ្រោះជាតិ នៅថ្ងៃទី១៩ ខែមេសា បានថ្លែងថា គណបក្សលោកស្រីនៅតែមានសង្ឃឹមក្នុងការចរចា ដោយផ្អែកលើមធ្យោបាយវប្បធម៌សន្ទនាដែលមិនអាចចៀសផុតបានឡើយ ។ លោកស្រី មូរ សុខហួរ បានថ្លែងបែបនេះ នៅក្បែររបងពន្ធនាគារព្រៃស ពេលដឹកនាំតំណាងរាស្ត្រខាងគណបក្សសង្គ្រោះជាតិចំនួន៣រូប ចូលទៅកាន់ពន្ធនាគារព្រៃស ដើម្បីសួរសុខទុក្ខអ្នកទោសចំនួន១៦នាក់ ដែលកំពុងជាប់ឃុំឃាំង ។
យោងតាមលិខិតរបស់មន្ត្រីពន្ធនាគារបានឲ្យដឹងថា អ្នកដែលតំណាងរាស្ត្រខាងគណបក្សសង្គ្រោះជាតិចូលជួបរួមមាន លោក អ៊ុំ សំអាន លោក មាជ សុវណ្ណារ៉ា លោក ឃិន ជំរឿន លោក ស៊ុំ ពុទ្ធី លោក អឿ ណារិទ្ធ លោក អាន បឋម លោក សាន សីហៈ លោក សាន គឹមហេង លោក នាង សុឃុន លោក រឿន ចាន់ត្រា លោក ទេព ណារិន លោក អ៊ុក ពេជ្រសំណាង លោក កែ ឃីម លោក យន់ គឹមហួរ និងលោក យា ថុង ។
បន្ទាប់ពីចេញពីពន្ធនាគារវិញ លោកស្រី មូរ សុខហួរ បានថ្លែងប្រាប់អ្នកកាសែតថា សហការីនិងសកម្មជនគណបក្សសង្គ្រោះជាតិចំនួន១៦នាក់ កំពុងជាប់ឃុំឃាំងនៅពន្ធនាគារព្រៃស បានប្រាប់លោកស្រីថា «ពួកគាត់ជាអ្នកទោសមនសិការ»។ លោកស្រីអះអាងថា អ្នកទោសមនសិការមានន័យថា ជាប់ពន្ធនាគារដោយភាពអយុត្តិធម៌ ដោយសារតែពួកគាត់ជាអ្នកស្នេហាជាតិ ។
លោកស្រី មូរ សុខហួរ បានលើកឡើងថា ក្រុមអ្នកទោសក៏បានលើកឡើងពីការបោះឆ្នោតដោយបានផ្ញើសារទៅ គ.ជ.ប តាមរយៈអ្នកតំណាងរាស្ត្រពីកង្វល់របស់អ្នកទោសទាំងនោះថា សូមឲ្យគ.ជ.ប ពិនិត្យពីបច្ចេកទសេទាំងឡាយឲ្យបានត្រឹមត្រូវបំផុត ព្រោះវាអាចបង្កគ្រោះថ្នាក់ពិសេសបញ្ជីឈ្មោះជាដើម ។
លោកស្រីថ្លែងថា៖ សូមឲ្យ គ.ជ.ប ពិនិត្យជាពិសេសបញ្ជីឈ្មោះអ្នកបោះឆ្នោត កុំឲ្យដូចកាលពីលើកមុនទៀត ។ ចំពោះបច្ចេកទេសណាក៏ដោយ ត្រូវតែពិនិត្យឲ្យមែនទែន ហើយបច្ចេកទេសទាំងអស់ត្រូវតែប្រុងប្រយ័ត្ន។ តាមរយៈលោកស្រី មូរ សុខហួរ ក្រុមអ្នកទោសទាំងនោះបានសូមឲ្យអ្នកដែលបានចុះឈ្មោះបោះឆ្នោត ត្រូវទៅបោះឆ្នោតទាំងអស់គ្នា ។
គេមិនដឹងថា អ្វីដែលលោកស្រី មូរ សុខហួរ បានលើកឡើងនេះជាសម្តីពិតឬអត់ទេដែលអ្នកទោសទាំងនោះបានលើកឡើង ព្រោះគ្មានអ្នកទោសណាម្នាក់បានជួបជាមួយអ្នកសារព័ត៌មាននោះទេ គឺជួបតែតំណាង ។ ក្រុមអ្នកទោសទាំងនោះ ត្រូវបានចាប់ខ្លួនជាបន្តបន្ទាប់កាលពីកំឡុងខែកក្កដា និងខែវិច្ឆិកា ឆ្នាំ២០១៤ហើយត្រូវបានចោទប្រកាន់និងកាត់ទោសដាក់ពន្ធនាគាររហូតមកដល់ពេលនេះ ។
លោកស្រី មូរ សុខហួរ បានលើកឡើងថា៖ ក្រុមអ្នកទោសបាននិយាយថា ពួកគាត់ចង់ទទួលបានយុត្តិធម៌ សូមអ្នកមានឈ្មោះក្នុងបញ្ជីបោះឆ្នោត ត្រូវទៅបោះឆ្នោតជ្រើសរើសថ្នាក់ដឹកនាំឃុំ-សង្កាត់។ យុត្តិធម៌ត្រូវចាប់ផ្តើមពីថ្នាក់ឃុំ-សង្កាត់ឡើងទៅ ហើយឈានទៅការផ្លាស់ប្តូរជាវិជ្ជមាន។ លោកស្រីបានលើកឡើងទៀតថា អ្នកទោសមិនមែនមានតែសកម្មជនគណបក្សសង្គ្រោះជាតិទេ គឺនៅមានអ្នកទោសជាបុគ្គលិកអង្គការសង្គមស៊ីវិលទៀតផង ។
បុគ្គលិកអង្គការសង្គមស៊ីវិល និងមន្ត្រី គ.ជ.ប សរុបចំនួន៥នាក់ កំពុងជាប់ឃុំឃាំងដែលអ្នកទាំងនោះត្រូវបានតំណាងរាស្ត្រគណបក្សសង្គ្រោះជាតិចាត់ទុកថាជាអ្នកទោសមនសិការរួមមាន លោក នី ចរិយា លោក នី សុខា លោកស្រី លឹម មុនី លោក យី សុខសាន្ត និងលោក ណៃ វ៉ង់ដា ។ អ្នកទាំងនោះ ត្រូវបានចោទប្រកាន់និងចាប់ឃាត់ខ្លួន កាលពីខែមេសា និងខែឧសភា ឆ្នាំ២០១៦ ។
លោកស្រី មូរ សុខហួរ ថ្លែថា បើបងប្អូនចង់ឲ្យអ្នកទោសមនសិការ ចង់ឲ្យជាតិយើងទទួលបានយុត្តិធម៌ បងប្អូនត្រូវទៅបោះឆ្នោត ។ នៅពេលដែលសួរថា តើវាសនារបស់អ្នកទោសទាំងនោះសង្ឃឹមទៅលើលទ្ធផលនៃការបោះឆ្នោត មិនមែនសង្ឃឹមលើការចរចារវាងគណបក្សនយោបាយធំៗទាំងពីរទេឬ ?
លោកស្រី មូរ សុខហួរ បញ្ជាក់ថា៖ អ្នកទោសទាំងនោះបានបញ្ជាក់ច្បាស់ណាស់ថា៖ «កុំយករឿងរបស់ពួកគាត់ទៅដោះដូរនឹងរឿងនយោបាយនិងការដោះដូរគ្នា ។ ពួកគាត់សង្ឃឹមតែទៅលើការបោះឆ្នោត» ។ លោកស្រីបានលើកឡើងថា ថ្ងៃនេះជាថ្ងៃពិសេសដែលក្រុមអ្នកតំណាងរាស្ត្រមិននឹកស្មានថា អ្នកទោសមនសិការគិតពីរឿងបោះឆ្នោតបែបនេះទេ ។ ការជួបគ្នានេះមានរយៈពេល៥០នាទី ហើយអ្នកទោសទាំង១៦នាក់ បាននិយាយតែពីរឿងបោះឆ្នោត ។
ពេលដែលសួរថា គណបក្សប្រឆាំងមិនមានសកម្មភាពអ្វីដើម្បីជួយដល់ពួកគាត់ឲ្យមានការដោះលែង ឬនៅសម្ងំស្ងៀមរង់ចាំលទ្ធផលដូចពួកគាត់និយាយ ? លោកស្រី មូរ សុខហួរថ្លែងថា រហូតមកដល់ពេលនេះគណបក្សយើងបាននិយាយរួចហើយថា៖ «យើងឆ្ពោះទៅរកការបោះឆ្នោត យើងបានត្រៀមខ្លួនជាស្រេចហើយ»។ អ្នកទោសទាំងនោះនៅតែមានមនសិការជាប់ជាមួយថ្នាក់ដឹកនាំគណបក្សសង្គ្រោះជាតិដដែល ។
លោកស្រីអនុប្រធានគណបក្សសង្គ្រោះជាតិរូបនេះ បានលើកឡើងទៀតថា យើងមានការឯកភាពផ្ទៃក្នុងល្អណាស់ និងបានដាក់បេក្ខភាពរហូតដល់១.៦៤៦ឃុំ-សង្កាត់ទូទាំងប្រទេសសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណតិទី៤ នៅថ្ងៃទី៤ខែមិថុនា ខាងមុខនេះ ។ អ្នកទោសបាននិយាយថា ពូកគាត់សប្បាយចិត្តនៅពេលឮដូចនេះ ។ នៅពេលសួរទៀតថា រហូតដល់ពេលនេះ ហេតុមេ្តចបានជាគណបក្សប្រឆាំងនៅមិនអាចរកដំណោះស្រាយឲ្យអ្នកទោសទាំងនោះនៅក្រៅឃុំបាន ?
លោកស្រីបានលើកឡើងថា៖«យើងនៅតែមានសង្ឃឹមថា នឹងមានការចរចាដោយផ្អែកលើវប្បធម៌សន្ទនា ។ ចរចាដើម្បីរកដំណោះស្រាយនៅពេលជួបបញ្ហា យើងមិនអាចមិនយកវប្បធម៌សន្ទនាធ្វើជាមធ្យោបាយដើម្បីរកដំណោះស្រាយទេ» ។ លោកស្រីបន្តថា វាចៀសមិនផុតពីការជជែកគ្នារកដំណោះស្រាយទេ ។
ចំណែកលោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងថា គណបក្សសង្គ្រោះជាតិនិងមេធាវី បានបំបែកសំណុំរឿងកាន់តែវែង ប្តឹងសុំនៅក្រៅឃុំជាបន្តបន្ទាប់ ខណៈសាលាដំបូងមិនទាន់បានផ្តន្ទាទោសជនណាម្នាក់ឬសម្រេចថាមានទោសនៅឡើយ។ ការលើកលែងទោស លុះត្រាអ្នកទោសណាត្រូវបានតុលាការកាត់ទោស បើមិនទាន់កាត់ទោសផងលើកលែងយ៉ាងម៉េចកើត ។ បើសិនតុលាការមិនទាន់កាត់ទោសជនជាប់ចោទទេ ហើយទៅដោះលែងមានន័យថា រំលោភលើនីតិវិធីតុលាការ ៕
ចែករំលែកព័តមាននេះ