ខេត្ដកំពង់ចាម ៖ ដោយសារមានទឹកចេញពីក្បាលហុងខួបវស្សាខួបប្រាំងនោះ ទោះបីជាស្ថិតនៅក្នុងតំបន់ព្រៃបន្តិចក្តី ប៉ុន្តែក្នុងឱកាសបុណ្យចូលឆ្នាំថ្មីប្រពៃណីជាតិឆ្នាំនេះ គេឃើញប្រជាពលរដ្ឋមកពីទីជិតឆ្ងាយ នាំគ្នាទៅកម្សាន្ដសប្បាយនៅរមណីយដ្ឋានទឹកឆា ស្ថិតក្នុងឃុំក្រូច ស្រុកព្រៃឈរ ដែលជាកន្លែងទេសេចរណ៍បែបធម្មជាតិ ។
លោក សន សយ អាយុ៦៧ឆ្នាំ រស់នៅភូមិមេម៉ាយ សង្កាត់បឹងកុក ក្រុងកំពង់ចាម និយាយថា នាព្រឹកថ្ងៃបុណ្យចូលឆ្នាំទី៣គឺថ្ងៃទី១៦ ខែមេសា រូបគាត់និងក្រុមសាច់ញាតិចំនួន៣រថយន្ត បាននាំគ្នាធ្វើដំណើរមកលេងនៅរមណីយដ្ឋានទឹកឆា ដែលពីមួយឆ្នាំទៅមួយឆ្នាំអាជ្ញាធរពាក់ព័ន្ធតាំងពីថ្នាក់ស្រុករហូតដល់ខេត្ត បានកែច្នៃឲ្យកាន់តែមានភាពស្រស់ស្អាតឡើង ដោយមានទឹកហូរធ្លាក់ចុះទៅតាមប្រទ្បាយឥតដាច់ ។
លោក សន សយ បន្តថា នេះគឺជាលើកទី៤ហើយដែលរូបគាត់បាននាំក្រុមគ្រួសារមកលេងនៅទីនេះ ។ អ្វីដែលកត់សម្គាល់នោះ គឺពីមួយឆ្នាំទៅមួយឆ្នាំការកសាងនៅរមណីយដ្ឋានទឹកឆា មានការកែច្នៃបន្តិចម្តងៗ តាំងពីរោងសម្រាប់ឲ្យប្រជាពលរដ្ឋមកអង្គុយលេងគយគន់មើលទេសភាព ហើយការមកលេងនៅទីនេះគឺមានសុវត្ថិភាពជាងការដើរលេងនៅតំបន់ឆ្ងាយៗណាមួយជិតផ្ទះផង ងាយធ្វើដំណើរទៅមក ។
អ្នកស្រី ជួន សុខ អាយុ៦៥ឆ្នាំ រស់នៅភូមិតុងរុ៉ង ឃុំតុងរុ៉ង ស្រុកព្រៃឈរ និយាយថា កាលពីមុនគាត់ធ្លាប់បានមកលេងនៅទឹកឆានេះម្តង ដែលកាលណោះមានដើមឈើធំៗដុះព័ទ្ធជុំវិញ ហើយទឹកដែលចេញពីក្បាលហុង ផ្នែកខាងលើក៏ច្រើនទៀត ។ ចំណែកនៅឆ្នាំ២០១៧នេះ គាត់មកលេងទៀតឃើញថា ទឹកចេញមកខ្សោយជាងពីមុន តែមានការកែច្នៃស្អាតជាងមុន ។
លោក ស៊ាន សុគុណ ប្រធានមន្ទីរទេសចរណ៍ខេត្ត ថ្លែងថា ក្នុងរយៈពេល៣ថ្ងៃនៃពិធីបុណ្យចូលឆ្នាំថ្មីប្រពៃណីជាតិ ចាប់ពីថ្ងៃទី១៤ដល់១៦ ខែមេសា ឆ្នាំនេះ ភ្ញៀវទេសចរជាតិនិងអន្តរជាតិដែលបានមកកម្សាន្តនៅខេត្តកំពង់ចាម មានចំនួន៣៧៧.៩០៣នាក់ ហើយក្នុងចំណោមរមណីយដ្ឋានដែលភ្ញៀវមកកម្សាន្តច្រើនជាងគេគឺរមណីយដ្ឋានទឹកឆា ស្ថិតនៅស្រុកព្រៃឈរ ។
នៅឆ្នាំក្រោយ អាជ្ញាធរខេត្តនឹងរៀបចំឲ្យមានសង្ក្រាន្តកំពង់ចាម ដែលសង្ឃឹមថានឹងទាក់ទាញភ្ញៀវទេសចរមកកម្សាន្ដកាន់តែច្រើនកុះករបន្ថែមទៀត ៕
ចែករំលែកព័តមាននេះ