ខេត្តកំពង់ធំ ៖ មានករណីគ្រោះថ្នាក់ចរាចរណ៍មួយបានកើតឡើងកាលពីវេលាម៉ោង១០និង២០នាទីព្រឹក ថ្ងៃទី១៨ ខែមេសា ឆ្នាំ២០១៧ ដែលរថយន្តបានបុកម៉ូតូពីក្រោយបណ្តាលឲ្យស្លា.ប់មនុស្សម្នាក់ភ្លាមៗ
ខេត្តកំពង់ធំ ៖ មានករណីគ្រោះថ្នាក់ចរាចរណ៍មួយបានកើតឡើងកាលពីវេលាម៉ោង១០និង២០នាទីព្រឹក ថ្ងៃទី១៨ ខែមេសា ឆ្នាំ២០១៧ ដែលរថយន្តបានបុកម៉ូតូពីក្រោយបណ្តាលឲ្យស្លាប់មនុស្សម្នាក់ភ្លាមៗនៅនឹងកន្លែងកើតហេតុ និងរបួសស្រាលម្នាក់។ ហេតុការណ៍នេះបានកើតឡើងតាមបណ្តោយផ្លូវជាតិលេខ៦ត្រង់ចំណុចភូមិឈើទាល ឃុំទ្រា ស្រុកស្ទោង ខេត្តកំពង់ធំ។
ប្រភពព័ត៌មានពីលោកវរៈសេនីយ៍ទោ យ៉ង សំ អធិការនគរបាលស្រុកស្ទោងបានឲ្យដឹងថា រថយន្តបង្កត្រូវបានគេស្គាល់ម៉ាក កាំម៉ាស់ ពណ៌ផ្ទៃមេឃ សម្រាប់ដឹកគ្រឿងចក្រ បានបើកទៅពីក្រោយម៉ូតូម៉ាកសេ១២៥ ស៊េរីឆ្នាំ២០១៦ ពណ៌ខ្មៅពាក់ស្លាកលេខ កំពង់ធំ 1I-3343 ជិះគ្នា២នាក់បើកបរដោយឈ្មោះ ឃូវ ម៉ាឡា ភេទស្រី អាយុ២៨ឆ្នាំ រស់នៅភូមិស្លា ឃុំទ្រា ស្រុកស្ទោង ខេត្តកំពង់ធំ បានរងរបួសស្រាល និងអ្នករួមដំណើរឈ្មោះ ឈន ញ៉ច ភេទស្រី អាយុ៥២ឆ្នាំ រស់នៅភូមិឃុំជាមួយគ្នា (ស្លាប់នៅកន្លែងកើតហេតុ) រួចអ្នកបើកបររថយន្តបង្កបានបើករថយន្តគេចខ្លួនបាត់។
ក្រោយកើតហេតុសមត្ថកិច្ចចុះវាស់វែង និងប្រគល់សាកសពឲ្យសាច់ញាតិយកទៅធ្វើបុណ្យតាមប្រពៃណី អ្នករបួសត្រូវបងប្អូនយកទៅសង្គ្រោះនៅពេទ្យបង្អែកស្ទោង។ ចំណែករថយន្ដគេចខ្លួនបាត់នោះ ត្រូវបានកម្លាំងសមត្ថកិច្ចរបស់លោកស្រាវជ្រាវរកឃើញ ខណៈជនសង្ស័យបានបើករថយន្តបង្កយកទៅទុកចោលនៅក្នុងភូមិតាម៉ោ ឃុំបន្ទាយស្ទោង ស្រុកស្ទោង រួចចុះរត់គេចខ្លួនបាត់ សមត្ថកិច្ចក៏នាំយកមកកាន់អធិការដ្ឋាននគរបាលស្រុកស្ទោង នៅថ្ងៃទី១៩ ខែមេសា ឆ្នាំ២០១៧នេះ ដើម្បីឲ្យម្ចាស់ចូលខ្លួនមកដោះស្រាយតាមផ្លូវច្បាប់៕
ចែករំលែកព័តមាននេះ