ការពិសោធទឹកស្ទឹងសែនដែលត្រីពុលរាប់ម៉ឺនក្បាល ដោយសាររោងចក្រស្ករស
ខេត្ដព្រះវិហារ ៖ មន្ទីរបរិស្ថានខេត្តបានបញ្ជាក់ថា យោងតាមលទ្ធផលពិសោធន៍ទឹករបស់ក្រសួងបរិស្ថាន ចំពោះទឹកស្ទឹងសែន ក្នុងស្រុកជ័យសែន និងស្រុករវៀង
ខេត្ដព្រះវិហារ ៖ មន្ទីរបរិស្ថានខេត្តបានបញ្ជាក់ថា យោងតាមលទ្ធផលពិសោធន៍ទឹករបស់ក្រសួងបរិស្ថាន ចំពោះទឹកស្ទឹងសែន ក្នុងស្រុកជ័យសែន និងស្រុករវៀង
ខេត្ដព្រះវិហារ ៖ មន្ទីរបរិស្ថានខេត្តបានបញ្ជាក់ថា យោងតាមលទ្ធផលពិសោធន៍ទឹករបស់ក្រសួងបរិស្ថាន ចំពោះទឹកស្ទឹងសែន ក្នុងស្រុកជ័យសែន និងស្រុករវៀង ដែលមានជាតិពុលបណ្តាលឲ្យត្រីតូចធំងាប់រាប់ម៉ឺនក្បាលកាលពីខែមុន បានដឹងមូលហេតុច្បាស់លាស់ហើយ គឺជាតិពុលដែលបង្ហូរចេញពីអាងស្ដុកកាកសំណល់កខ្វក់របស់រោងចក្រផលិតស្ករសរ៉ូយហ្វេងខេត្តព្រះវិហារ ។
លទ្ធផលនេះ ត្រូវបានឲ្យដឹងកាលពីថ្ងៃទី១២ ខែមេសា ដោយលោក អៀ សុខា ប្រធានមន្ទីរបរិស្ថានខេត្ត ។ លោកប្រធានមន្ទីរថ្លែងថា អស់រយៈពេលជិត១ខែមកនេះ ទឹកស្ទឹងសែន នៅស្រុកជ័យសែន និងស្រុករវៀង មានផ្ទុកសារធាតុពុល ធ្វើឲ្យត្រីគ្រប់ប្រភេទទាំងតូចទាំងធំងាប់រាប់ម៉ឺនក្បាល ។ រហូតមកដល់ពេលនេះ ជាតិពុលក្នុងទឹកបានហូរធ្លាក់ដល់ស្រុករវៀង ប៉ុន្តែជាតិពុលនោះបានចុះខ្សោយវិញហើយ ។
លោកបញ្ជាក់ថា បន្ទាប់ពីមានសារធាតុពុលក្នុងទឹក មន្ត្រីជំនាញក៏បានយកទឹកស្ទឹងនោះទៅពិសោធន៍ដើម្បីរកសារធាតុពុលនោះ តើចេញមកពីប្រភពណាច្បាស់លាស់ ។ រហូតមកដល់ពេលនេះទទួលបានលទ្ធផលហើយ បន្ទាប់ពីធ្វើការពិសោធន៍អស់រយៈពេលជាងកន្លះខែឃើញថា ជាតិពុលនេះមានប្រភពហូរធ្លាក់មកពីអាងស្តុកកាកសំណល់របស់ក្រុមហ៊ុនចម្ការអំពៅផលិតស្ករសរ៉ូយហ្វេង ។
លោកប្រធានមន្ទីរបញ្ជាក់ទៀតថា ការហូរចូលក្នុងទឹកស្ទឹងនូវសារធាតុពុលនេះ ដោយសារតែមានភ្លៀងធ្លាក់ខ្លាំង២ថ្ងៃជាប់ៗគ្នា ធ្វើឲ្យទំនប់ អាងស្តុកកាកសំណល់របសរោងច្រកស្ករសរ៉ូយហ្វេង ហូរចូលក្នុងស្ទឹងតែម្តង ទើបបណ្តាលឲ្យមានជាតិពុលងាប់ត្រីបែបនេះ ។
លោក អៀ សុខា ថ្លែងទៀតថា ក្រោយពីទទួលបានលទ្ធផលពិសោធន៍ទឹកនេះហើយ មន្ត្រីជំនាញនឹងធ្វើការណែនាំដល់ក្រុមហ៊ុនរោងចក្រស្កសរ ត្រូវធ្វើយ៉ាងណាពង្រីកបន្ថែមអាងស្តុកកាកសំណល់ដែលចេញពីរោងចក្រនេះឲ្យកាន់តែធំនិងមានច្រើនកន្លែង ចៀសវាងការហូរហៀរធ្លាក់ចូលទៅក្នុងទឹកស្ទឹងទៀត បណ្តាលឲ្យប៉ះពាល់ធ្ងន់ធ្ងរដល់បរិស្ថាន និងសុខភាពមនុស្ស ។
លោក វង្ស សុខខេងលី រស់នៅភូមិឈ្នួន ឃុំរួសរាន់ ស្រុករវៀង បានលើកឡើងដែរថា ចាប់តាំងពីមានសារធាតុពុលហូរចូលក្នុងស្ទឹង ក្បែរភូមិគាត់រស់នៅមក អ្នកភូមិទាំងអស់បានផ្អាកឈប់ប្រើប្រាស់ទឹកស្ទឹងនោះ រហូតមកដល់ពេលនេះពួកគាត់ប្រើតែទឹកអណ្តូងស្នប់និងអណ្តូងជីកតែប៉ុណ្ណោះ ។ កន្លងទៅ អ្នកភូមិគាត់បានចុះទៅដងទឹកប្រើប្រាស់ និងរើសយកត្រីដែលងាប់ក្នុងទឹកស្ទឹងនោះមកបរិភោគធ្វើឲ្យពួកគេពុលក្អួតចង្អោរ អស់កម្លាំង អ្នកខ្លះបានដាក់សេរ៉ូម និងខ្លះទៀតនាំទៅសង្គ្រោះនៅមណ្ឌលសុខភាព រីឯអ្នកនេសាទវិញ ពួកគេបានផ្អាកនេសាទនៅទីនោះហើយ ។
គាត់បានស្នើឲ្យអាជ្ញាធរ និងមន្ត្រីជំនាញពាក់ព័ន្ធទាំងអស់ ជំរុញឲ្យរោងចក្រផលិតស្ករសនោះ រៀបចំអាងស្តុកកាកសំណល់ជាតិពុលនោះបន្ថែមទៀត ឲ្យបានឆាប់រហ័សបំផុត ។
ជុំវិញបញ្ហានេះ លោក ហ្គួយ យៀង តំណាងក្រុមហ៊ុនរ៉ូយហ្វេងអភិវឌ្ឍន៍ដំណាំអំពៅ បានទទួលស្គាល់ថា រោងចក្រពិតជាមានកន្លែងស្តុកកាកសំណល់ចេញពីរោងចក្រប្រាកដមែន ហើយរោងចក្រពុំមានចេតនាណាមួយបង្ហូរកាកសំណល់នេះ ធ្វើឲ្យប៉ះពាល់ដល់បរិស្ថាន មនុស្ស និងសត្វនោះទេ ។ ដូច្នេះ បន្ទាប់ពីមានករណីជាតិពុលក្នុងទឹកស្ទឹងដែលហូរចេញពីអាងស្តុកទឹកកខ្វក់របស់រោងចក្រនេះ ក្រុមហ៊ុននឹងពិភាក្សាបង្កើតទីតាំងស្តុកសារធាតុកខ្វក់ដែលចេញពីរោងចក្របន្ថែមទៀត ។
សូមបញ្ជាក់ថា គិតត្រឹមថ្ងៃទី១៣ ខែមេសា ជាតិពុលដែលមាននៅក្នុងទឹកស្ទឹងសែន ស្រុកជ័យសែន បានហូរធ្លាក់មកដល់ស្រុករវៀងហើយ ប៉ុន្តែជាតិពុលនោះបានថយចុះច្រើន រីឯត្រីក៏នៅតែមានងាប់ជាបន្តដែរ តែតិចតួចទេ ៕
ចែករំលែកព័តមាននេះ