រាជធានីភ្នំពេញ ៖ បុរស៣នាក់រងរបួសធ្ងន់ និងស្រាលនៅក្នុងគ្រោះថ្នាក់ចរាចរណ៍ដោយសារតែជិះរ៉ឺម៉កម៉ូតូដឹកដែកមួយគ្រឿងជ្រុលទៅបុកជាមួយរថយន្តដឹកដីមួយគ្រឿងនៅចំណុចផ្លូវកែវ ។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០ព្រឹកថ្ងៃទី១៩ ខែមេសា ឆ្នាំ២០១៧ នៅក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ ។ អ្នករងរបួសដែលជាអ្នកជិះម៉ូតូរ៉ឺម៉កដឹកដែកមិនត្រូវបានស្គាល់ឈ្មោះឡើយត្រូវបានបញ្ជូនទៅកាន់មន្ទីរពេទ្យ ។
តាមព័ត៌មានបានឱ្យដឹងថា នៅមុនពេលកើតហេតុរថយន្តបែនដឹកដីពណ៌ស ពាក់ស្លាកលេខ ភ្នំពេញ 3D-2313 បើកបរដោយបុរសម្នាក់ធ្វើដំណើរតាមផ្លូវលំក្នុងទិសដៅពីលិចទៅកើត ។ នៅពេលមកដល់កន្លែងកើតហេតុដែលជាផ្លូវកែងរថយន្តប្រុងបត់ឆ្វេងហើយរ៉ឺម៉កម៉ូតូដឹកដែកដែលធ្វើដំណើរតាមផ្លូវភ្នំពេញហាណូយពីជើងទៅត្បូងជាន់ហ្វ្រាំងមិនទាន់ក៏បាន នឹងក្បាលរថយន្តបណ្តាលអ្នកជិះម៉ូតូរ៉ឺម៉ករងរបួសធ្ងន់២នាក់ និងម្នាក់ទៀតរងរបួសស្រាល ។ តាមនគរបាលបានឱ្យដឹងថា នៅព្រឹកនោះភាគីខាងរថយន្តបានចេញមកសម្របសម្រួលដោយចេញថ្លៃព្យាបាលចំនួន២៥០ដុល្លារដើម្បីបញ្ចប់រឿង ៕
ចែករំលែកព័តមាននេះ