រាជធានីភ្នំពេញ ៖ ប្រតិភូកីឡាប៉េតង់ជម្រើសជាតិកម្ពុជា ដែលបានទៅចូលរួមប្រកួតនៅក្នុងព្រឹត្តិការណ៍ពិភពលោក World Championship Petanque2017 នៅប្រទេសបែល ហ្ស៊ិក បានវិលត្រឡប់មកដល់រាជធានីភ្នំពេញវិញហើយ កាលពី
រាជធានីភ្នំពេញ ៖ ប្រតិភូកីឡាប៉េតង់ជម្រើសជាតិកម្ពុជា ដែលបានទៅចូលរួមប្រកួតនៅក្នុងព្រឹត្តិការណ៍ពិភពលោក World Championship Petanque2017 នៅប្រទេសបែល ហ្ស៊ិក បានវិលត្រឡប់មកដល់រាជធានីភ្នំពេញវិញហើយ កាលពីថ្ងៃទី១៨ មេសា វេលាម៉ោង៣និង៤៥នាទីរសៀល ដោយនាំមកជាមួយនូវមេដាយមាស១គ្រឿង និងប្រាក់១គ្រឿងមកជូនប្រទេសជាតិ ។
ការមកដល់របស់ក្រុមប្រតិភូកីឡាប៉េតង់ជម្រើសជាតិកម្ពុជានាឱកាសនោះ ត្រូវបានទទួលស្វាគមន៍យ៉ាងកក់ក្ដៅពីសំណាក់លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡា និងមិត្តរួមអាជីពជាច្រើនរូបទៀត ព្រមទាំងមានការដង្ហែយ៉ាងគគ្រឹកគគ្រេងដោយក្បួនម៉ូតូធំ១២គ្រឿងពីអាកាសយានដ្ឋានអន្តរជាតិភ្នំពេញ មកកាន់ទីស្នាក់ការគណៈកម្មាធិការជាតិអូឡាំពិកកម្ពុជាថែមទៀតផង ។
កីឡាការិនី អ៊ុក ស្រីមុំ ជាស្ត្រីខ្មែរទី២ហើយដែលដណ្ដើមបានមេដាយមាសលំដាប់ថ្នាក់ពិភពលោក បន្ទាប់ពីអ្នកស្រី កែ ឡេង លើវិញ្ញាសាឯកត្តជននារីវាយយកពិន្ទុដូចគ្នា ។ ដោយឡែកកីឡាករ សុខ ចាន់មាន ម្ចាស់មេដាយមាសឆ្នាំ២០១៦នោះ បែរជាខកចិត្តដោយសារពុំទទួលបានលទ្ធផលល្អនោះទេ ។ ចំណែកមេដាយប្រាក់១គ្រឿងទៀត រកបានដោយកីឡាការិនី ស្រៀង សុរ៉ាឃីម និងកីឡាករ ញ៉ែម បូរ៉ា ដែលបានចាប់ដៃគ្នាប្រកួតលើវិញ្ញាសាវាយគូចម្រុះ។
លោក វ៉ាត់ ចំរើន អគ្គលេខាធិការគណៈ កម្មាធិការជាតិអូឡាំពិកកម្ពុជា បានឱ្យដឹងថា ការរៀបចំក្បួនដង្ហែម៉ូតូធំទាំង១២គ្រឿងនេះ គឺអនុវត្តទៅតាមអនុសាសន៍របស់សម្ដេចតេជោ ហ៊ុន សែន ដើម្បីលើកទឹកចិត្តដល់អត្តពលិកដណ្ដើមបានមេដាយមាសពិភពលោកផងដែរ ។ សម្ដេចតេជោក៏ត្រៀមផ្ដល់កិត្តិយសឱ្យម្ចាស់មេដាយមាសពិភពលោកចូលជួបសំណេះសំណាល និងផ្ដល់រង្វាន់លើកទឹកចិត្តដូចកីឡាករ សុខ ចាន់មាន និងកីឡាការិនី កែ ឡេង ផងដែរក្នុងពេលវេលាដ៏សមស្របណាមួយ ។
លោក សូម៉ៃ សុខគា អគ្គលេខាធិការរងសហព័ន្ធកីឡាប៉េតង់កម្ពុជា បានឱ្យដឹងថា មូលហេតុដែលសហព័ន្ធសម្រេចចិត្តដាក់កីឡាការិនី អ៊ុក ស្រីមុំ ទៅចូលរួមប្រកួតលើកនេះន្ទាប់ពីបានមើលឃើញថា កីឡាការិនីរូបនេះឆ្លងកាត់ការប្រកួតតេស្តប្រចាំខែ និងប្រចាំឆ្នាំទទួលបានលទ្ធផលល្អជាងគេលើវិញ្ញាសាមួយទល់នឹងមួយនិងពីរទល់នឹងពីរ ។ ចំណែកកីឡាការិនី កែ ឡេង ពូកែតែខាងប្រកួតវាយយកពិន្ទុប៉ុណ្ណោះ ។ កីឡាការិនី អ៊ុក ស្រីមុំ ក៏បានបង្ហាញអារម្មណ៍រំភើបនិងប្រាប់ថា ក្នុងមួយជីវិតនេះគឺមានតែថ្ងៃនេះទេដែលគាត់សប្បាយចិត្តជាងគេ ៕
ចែករំលែកព័តមាននេះ