រាជធានីភ្នំពេញ ៖ ស្ត្រីចំណាស់ម្នាក់ ត្រូវម៉ូតូពួកទាក់ឆ្កែបុកយ៉ាងពេញទំហឹង បណ្តាលឱ្យប៉ើងប្រមាណជាង១០ម៉ែត្រស្លាប់យ៉ាងអាណោចអាធ័ម កើតឡើងកាលពីវេលាម៉ោង០៥ និង៣០នាទីទៀបភ្លឺថ្ងៃទី១៩ មេសា ស្ថិតនៅតាមបណ្តោយផ្លូវជាតិលេខ៥ ត្រង់ចំណុចមុខផ្ទះលេខ១៧០ ក្នុងភូមិខ១ សង្កាត់ច្រាំងចំរេះទី២ ខណ្ឌប្ញស្សីកេវ ។
បន្ទាប់ពីបង្កគ្រោះថ្នាក់នេះ អ្នកបើកម៉ូតូដែលជាទាក់ឆ្កែ ឈ្មោះកែវ រ៉ានី អាយុ២៧ឆ្នាំ ស្នាក់នៅភូមិសាមគ្គី សង្កាត់ប្ញស្សីកែវខណ្ឌឬស្សីកែវ ត្រូវប្រជាពលរដ្ឋនាំគ្នាឃាត់ខ្លួនប្រគល់ឱ្យនគរបាល ។ រីឯជនរងគ្រោះដែលស្លាប់ ឈ្មោះជិន សុខជា អាយុ៦២ឆ្នាំ មានទីលំនៅភូមិផ្សារក្រោម ឃុំចុងកោះ ក្រុងកំពង់ឆ្នាំង ខេត្តកំពង់ឆ្នាំង ដោយមកលេងផ្ទះបងប្អូននៅកន្លែងកើតហេតុខាងលើ ។
តាមប្រភពឱ្យដឹងថា មុនពេលកើតហេតុ ជនបង្កជិះម៉ូតូម៉ាកយ៉ាម៉ាហា ពណ៌ខ្មៅលាយក្រហម ពាក់ស្លាកលេខភ្នំពេញ1CC-5658 រួមដំណើរជាមួយម្នាក់ទៀត មានដឹកឆ្កែមួយបាវ ធ្វើដំណើរតាមផ្លូវជាតិលេខ៥ ក្នុងទិសដៅពីជើងមកត្បូង ក្នុងល្បឿនយ៉ាងលឿន។នៅពេលមកដល់កន្លែងកើតហេតុ ក៏បានជ្រុលទៅបុកស្ត្រីរងគ្រោះកំពុងដើរឆ្លងផ្លូវ ក្នុងទិសដៅពីកើតទៅលិចពេញទំហឹង ។
នៅក្នុងគ្រោះថ្នាក់នេះ ស្ត្រីរងគ្រោះបានខ្ទាតប្រមាណជាង១០ម៉ែត្ររងរបួសធ្ងន់ធ្ងរ ហើយត្រូវបានបងប្អូននាំគ្នាបញ្ជូនទៅកាន់មន្ទីរពេទ្យ ដោយសារតែរបួសធ្ងន់ពេក បានដាច់ខ្យល់ស្លាប់តែម្តង ។
ប្រភពពីជនសង្ស័យឱ្យដឹងដែរថា នៅមុនពេលកើតហេតុ រូបគេបានជិះម៉ូតូដើរទាក់ឆ្កែ រហូតដល់ព្រែកក្តាម ហើយដឹកឆ្កែមកលក់ឱ្យម៉ូយនៅភូមិសាមគ្គី សង្កាត់ប្ញស្សីកែវ ខណ្ឌឬស្សីកែវ បានជួបគ្រោះថ្នាក់នេះតែម្តង ។
ចែករំលែកព័តមាននេះ