រាជធានីភ្នំពេញ ៖ សម្តេចវិបុលសេនាភក្តី សាយ ឈុំ ប្រធានព្រឹទ្ធសភានឹងនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដើម្បីពិភាក្សា និងអនុម័តលើករបៀបវារៈចំនួនបី ។ នេះបើតាមការឲ្យដឹងពីអគ្គលេខាធការដ្ឋានព្រឹទ្ធសភា។
សេចក្តីប្រកាសព័ត៌មានរបស់អគ្គលេខាធិការដ្ឋានព្រឹទ្ធសភាបានឲ្យដឹងថា នៅព្រឹកថ្ងៃទី២០ ខែមេសា សម្តេច សាយ ឈុំ ប្រធានព្រឹទ្ធសភានឹងដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដើម្បីពិភាក្សាលើរបៀបវារៈចំនួនបីរួមមាន ៖
ទី១-ពិនិត្យ និងសម្រេច លើសំណើររបស់គណៈកម្មាធិការទី៦ព្រឹទ្ធសភា សុំដាក់សេចក្តីស្នើច្បាប់ស្តីពី វិសោធនកម្មច្បាប់ស្តីពីលក្ខន្តិកៈ មន្ត្រីរាជការនៃក្រុមនីតិប្បញ្ញតិ្ត ទៅក្នុងរបៀបវារៈសម័យប្រជុំលើកទី១០ ព្រឹទ្ធសភា នីតិកាលទី៣ ។
ទី២-ពិនិត្យ និងសម្រេចលើសំណើររបស់គណៈកម្មការទី៩ព្រឹទ្ធសភា សុំដាក់សេចក្តីព្រាងច្បាប់ស្តីពីការអនុម័តយល់ព្រមលើពិធីសារទី៣ ធ្វើវិសោធនកម្មកិច្ចព្រមព្រៀងពាណិជ្ជកម្មទំនិញនៅក្រោមកិច្ចព្រមព្រៀងក្របខ័ណ្ឌស្តីពីកិច្ចសហប្រតិបត្តិការសេដ្ឋកិច្ចទូលំទូលាយក្នុងចំណោមរដ្ឋាភិបាល នៃប្រទេសសមាជិកសមាគមប្រជាជាតិអាស៊ីអាគ្នេយ៍ និងសាធារណរដ្ឋកូរ៉េនៅក្នុងរបៀបវារៈសម័យប្រជុំលើកទី១០ ព្រឹទ្ធសភានីតិកាលទី៣ ។
ទី៣-កំណត់កាលបរិច្ឆេទ និងរបៀបវារៈបន្តសម័យប្រជុំលើកទី១០ ព្រឹទ្ធសភា ។
សូមជម្រាប់ថា សេចក្តីស្នើច្បាប់ខាងលើត្រូវបានសមាជិករដ្ឋសភាមកពីគណបក្សសង្គ្រោះជាតិ និងគណបក្សប្រជាជនកម្ពុជាលើកដៃអនុម័តកាលពីថ្ងៃទី៧ ខែមេសា កន្លងមក រួចហើយ៕
ចែករំលែកព័តមាននេះ