ខេត្តសៀមរាប ៖ សេចក្តីរាយការណ៍ឱ្យដឹងថា ស្ត្រីជាម្ចាស់ហាងយីហោ «បារាយណ៍ស្ប៉ា» Baray Spa ស្ថិតនៅខាងជើងហាង
«អង្គរហ៊ើប» ក្នុងតំបន់Pub Street ដែលធ្វេសប្រហែសរាយខ្សែភ្លើងដាក់តាមចិញ្ចើមផ្លូវ ធ្វើឱ្យឆក់ក្មេងស្រីម្នាក់ស្លាប់នោះ ត្រូវបានតុលាការខេត្ត សម្រេចឃុំខ្លួនដាក់ពន្ធនាគារហើយ កាលពីរសៀលថ្ងៃទី១៨ មេសា ដោយព្រះរាជអាជ្ញារង លោកសំរិទ្ធ សុខន សាកសួរចម្លើយនិងសម្រេចចោទប្រកាន់ស្ត្រីម្ចាស់ហាងរូបនេះ ពីបទមនុស្សឃាតដោយអចេតនា ។ បងស្រីនារីឆក់ខ្សែភ្លើងនៅផាប់ស្ទ្រីត ចេញស្រាយបំភ្លឺការស្លាប់របស់ប្អូនស្រី
ប្រភពឱ្យដឹងថា ស្ត្រីម្ចាស់ហាងខាងលើ មានឈ្មោះមាស សុភ័ក្រ អាយុ៣៦ឆ្នាំ បានសម្រេចដាក់ពន្ធនាគារ ក្រោយពីរកឃើញភស្តុតាង ក្នុងនោះមាន២ចំណុច ទី១-ម្ចាស់ហាងមានការធ្វេសប្រហែស មិនមានការប្រុងប្រយ័ត្ន ឬខ្ជីខ្ជា និងទី២-ការបំពានទៅលើកាតព្វកិច្ចសន្តិសុខ ឬកាតព្វកិច្ចប្រុងប្រយ័ត្ន ដែលច្បាប់តម្រូវ ។
ដូច្នេះ តុលាការខេត្តក៏សម្រេចឃុំខ្លួន ចែងតាមមាត្រា២០៧នៃច្បាប់ក្រមព្រហ្មទណ្ឌ ដែលមានទោសពី១ឆ្នាំ ទៅដល់៣ឆ្នាំ និងពិន័យជាប្រាក់២លានរៀល ទៅដល់៦លានរៀល និងមានទោសបន្ថែមមួយទៀត គឺហាមឃាត់ប្រកបវិជ្ជាជីវៈ ឬ (ហាមបើកម៉ាស្សាវិញ)។
គួរបញ្ជាក់ថា ក្មេងស្រីដ៏ស្រស់ស្អាតម្នាក់ឈ្មោះលី មុនីរដ្ឋានី អាយុ១៤ឆ្នាំ មានទីលំនៅភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ បានស្លាប់ដោយសារឆក់ខ្សែភ្លើង នៅតំបន់កម្សាន្ត Pub Street ស្ថិតនៅភូមិមណ្ឌល១ សង្កាត់ស្វាយដង្គំ ក្រុងសៀមរាប កាលពីយប់ថ្ងៃទី១៦ មេសា ឈានចូលថ្ងៃទី១៧ មេសា ជាថ្ងៃចុងក្រោយនៃពិធីបុណ្យចូលឆ្នាំថ្មីប្រពៃណីខ្មែរ ។
ចែករំលែកព័តមាននេះ