រាជធានីភ្នំពេញ ៖ ធនាគារពិភពលោក បានសម្រេចផ្តល់កម្ចីឥតការប្រាក់ទំហំ១០០លានដុល្លារអាមេរិកដល់កម្ពុជាសម្រាប់ គម្រោងលើកកម្ពស់គុណភាពអប់រំកម្រិតអនុវិទ្យាល័យ និងស្ថាបនាផ្លូវលំជនបទឲ្យកាន់តែប្រសើរ និង
រាជធានីភ្នំពេញ ៖ ធនាគារពិភពលោក បានសម្រេចផ្តល់កម្ចីឥតការប្រាក់ទំហំ១០០លានដុល្លារអាមេរិកដល់កម្ពុជាសម្រាប់ គម្រោងលើកកម្ពស់គុណភាពអប់រំកម្រិតអនុវិទ្យាល័យ និងស្ថាបនាផ្លូវលំជនបទឲ្យកាន់តែប្រសើរ និងមានភាពធននឹងការប្រែប្រួលអាកាសធាតុ ។
យោងតាមសេចក្តីប្រកាសព័ត៌មានរបស់ធនាគារពិភពលោក ដែលបានចេញផ្សាយកាលពីថ្ងៃទី១៧ មេសា បានឲ្យដឹងថា គម្រោងទី១ជាគម្រោងគាំទ្រការពង្រឹងគុណភាពអប់រំនៅអនុវិទ្យាល័យ មានរយៈពេល៥ឆ្នាំនៅទូទាំងប្រទេសដែលមានទឹកប្រាក់ចំនួន៤០លានដុល្លារ និងផ្តល់ដល់សមាគមអភិវឌ្ឍន៍អន្តរជាតិ ជាមួយទីភ្នាក់ងារអភិវឌ្ឍន៍របស់ធនាគារពិភពលោក សម្រាប់ជួយប្រទេសក្រីក្រ ។ គម្រោងនេះមានគោលបំណងពង្រឹងការគ្រប់គ្រងសាលា ការលើកកម្ពស់គុណភាពគ្រូបង្រៀន ពិសេសមុខវិជ្ជា គណិតវិទ្យា រូបវិទ្យា ជីវវិទ្យា គីមីវិទ្យា អក្សរសាស្ត្រខ្មែរ និងប្រវត្តិវិទ្យា ។
គម្រោងនេះក៏នឹងធ្វើឲ្យប្រសើរឡើងនូវគុណភាពសមស្របរបស់នាយកសាលានិងសាលារៀន ដោយស្ថាបនាឡើងវិញនូវអនុវិទ្យាល័យចំនួន១០០កន្លែង និងសាងសង់អគារថ្មីចំនួន៣០។ គម្រោងនេះ នឹងផ្តល់ផលប្រយោជន៍ដល់សិស្សជាង១៦.០០០នាក់ គ្រូជាង២.២០០នាក់ នាយក និងនាយករងអនុវិទ្យាល័យចំនួន៣១០នាក់ និងមន្ត្រីនៃអនុវិទ្យាល័យ ព្រមទាំងមន្ទីរអប់រំខេត្ត និងស្រុកចំនួន១.៥០០នាក់ផងដែរ ។
សេចក្តីប្រកាសព័ត៌មានដដែលបានបន្ដថា សម្រាប់គម្រោងទី២ គឺការគ្រប់គ្រងហានិភ័យនៃគ្រោះមហន្តរាយក្នុងតំបន់អាស៊ីអាគ្នេយ៍ ដែលនឹងជួយធ្វើឲ្យប្រសើរឡើងនូវទំនាក់ទំនងសហគមន៍ជនបទ ដែលមានទឹកប្រាក់៦០លានដុល្លារអាមេរិក ។ គម្រោងនេះនឹងស្ថាបនាផ្លូវជនបទប្រវែង២៥០គីឡូម៉ែត្រ ក្នុងខេត្តចំនួន៦តាមដងទន្លេមេគង្គ និងទន្លេសាប ហើយវានឹងផ្តល់ផលប្រយោជន៍ដល់ប្រជាពលរដ្ឋប្រមាណ៣,៥លាននាក់ក្នុងខេត្តស្ទឹងត្រែង ក្រចេះ កំពង់ចាម ត្បូងឃ្មុំ សៀមរាប និងខេត្តកណ្តាល ។
« គម្រោងនេះនឹងស្ថាបនាផ្លូវដែលអាចធននឹងទឹកជំនន់ ដែលអាចបញ្ចៀសការចំណាយខ្ពស់លើការសាងសង់ដដែលៗ។ ប្រព័ន្ធគ្រប់គ្រងផ្លូវថ្នល់ និងយុទ្ធសាស្ត្រនានានឹងត្រូវពង្រឹង ដើម្បីគាំទ្រដល់កម្ពុជាលើផែនការធននឹងអាកាសធាតុ ការអនុវត្ត និងការស្ថាបនាផ្លូវតាមទីជនបទ » ។ សេចក្តីប្រកាសព័ត៌មានបញ្ជាក់ឲ្យដឹង ។
ប្រធានគ្រប់គ្រងធនាគារពិភពលោកប្រចាំកម្ពុជា លោកស្រី អ៊ឺហ្គូណា ដូប្រាចា បានថ្លែងថា ក្នុងរយៈពេលពីរទសវត្សរ៍មកនេះ កម្ពុជាបានពង្រីកការទទួលបានការសិក្សានៅកម្រិតបឋមសិក្សា និងអនុវិទ្យាល័យយ៉ាងធំធេង ។ គម្រោងនេះនឹងជួយកម្ពុជាមានលទ្ធភាពថែមទៀត ក្នុងការលើកកម្ពស់ការទទួលបានគុណភាពអប់រំនៅអនុវិទ្យាល័យ ។ លោកស្រីបន្តថា ការធ្វើឲ្យប្រសើរឡើងនូវផ្លូវជនបទ គឺជាស្នូលនៃការកាត់បន្ថយភាពក្រីក្រនៅកម្ពុជា ដោយសារថា ប្រជាជននៅជនបទ និងប្រជាជនក្រីក្រ៩១ភាគរយនៃប្រជាជនកម្ពុជាទាំងអស់រស់នៅទីជនបទ។
លោកស្រីបន្តថា ៖ « ផ្លូវជនបទប្រសើរ និងធន់នឹងអាកាសធាតុអាក្រក់ នឹងជួយសិស្សបានទៅសាលារៀន គ្រួសារបានទៅកាន់មណ្ឌលសុខភាព ហើយកសិករទូទាំងប្រទេសអាចនាំផលិតផលរបស់ខ្លួនទៅកាន់ទីផ្សារបាន »។
លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដែលត្រូវបានស្រង់សម្តី យកមកចុះផ្សាយក្នុងសេចក្តីប្រកាសព័ត៌មាន បានបញ្ជាក់ថា រាជរដ្ឋាភិបាលសូមស្វាគមន៍ចំពោះការគាំទ្ររបស់ធនាគារពិភពលោក ក្នុងវិស័យអប់រំ និងដឹកជញ្ជូនដែលវិស័យនេះស្របទៅតាមអាទិភាពនៃផែនការយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាលក្នុងការលើកកម្ពស់គុណភាពអប់រំ និងទំនាក់ទំនងផ្នែកដឹកជញ្ជូន ជាពិសេសការពង្រីកការទទួលបានសេវានិងទីផ្សារនៅតំបន់ជនបទ ៕
ចែករំលែកព័តមាននេះ