ខេត្តសៀមរាប ៖ រថយន្ត៣គ្រឿងបានបុកបន្តកន្ទុយគ្នា បណ្តាលឱ្យរងរបួសស្រាលម្នាក់ ខាងរថយន្ត តាកូម៉ាពណ៌ខ្មៅ បង្កឱ្យមានការភ្ញាក់ផ្អើល និងកកស្ទះចរាចរណ៍មួយសន្ទុះធំនៅលើផ្លូវជាតិលេខ៦
ខេត្តសៀមរាប ៖ រថយន្ត៣គ្រឿងបានបុកបន្តកន្ទុយគ្នា បណ្តាលឱ្យរងរបួសស្រាលម្នាក់ ខាងរថយន្ត តាកូម៉ាពណ៌ខ្មៅ បង្កឱ្យមានការភ្ញាក់ផ្អើល និងកកស្ទះចរាចរណ៍មួយសន្ទុះធំនៅលើផ្លូវជាតិលេខ៦ បន្ទាប់មកបានប្រហែលកន្លះម៉ោង ឃើញសមត្ថកិច្ចចរាចរណ៍មកដល់ ដើម្បីធ្វើការវាស់វែង យករថយន្តទាំង៣គ្រឿងចេញ កុំឱ្យកកស្ទះចរាចរណ៍។ ខណៈនោះអ្នកបើកបររថយន្តបង្ករបស់ក្រុមហ៊ុនមេគង្គអ៊ិចប្រេសដឹកអ្នកដំណើរ(ពីភ្នំពេញ) ពីទិសខាងកើតទៅទិសខាងលិចបានចុះ(គេចខ្លួនបាត់) បន្សល់ទុករថយន្ត និងអ្នកដំណើរ។
ហេតុការគ្រោះថ្នាក់ចរាចរណ៍នោះបានកើតឡើងនៅវេលាម៉ោង៧និង៣០នាទីយប់ ថ្ងៃទី១៧ ខែមេសា ឆ្នាំ២០១៧ ស្ថិតនៅលើផ្លូវជាតិលេខ៦ ត្រង់ចំណុចភូមិពោធិសិរី ឃុំកំពង់ក្តី ស្រុកជីក្រែង ខេត្តសៀមរាប។ លោកវរសេនីយ៍ទោ សុខ សុទ្ធាវុធ អធិការដ្ឋាននគរបាលស្រុកជីក្រែង បានប្រាប់ឱ្យដឹងនៅរសៀលថ្ងៃទី១៨ ខែមេសា ឆ្នាំ២០១៧នេះថា បន្ទាប់ពីមានករណីគ្រោះថ្នាក់ចរាចរណ៍រវាងរថយន្ត៣គ្រឿង បានបុកបន្តកន្ទុយគ្នា បណ្តាលឱ្យរងរបួសស្រាលម្នាក់ ខាងរថយន្ត តាកូម៉ាពណ៌ខ្មៅ បង្កឡើងដោយរថយន្តក្រុងរបស់ក្រុមហ៊ុនមេគង្គអ៊ិចប្រេសដឹកអ្នកដំណើរ(ពីភ្នំពេញ)ក្នុងទិសដៅពីកើតទៅទិសលិច បានចុះ(គេចខ្លួនបាត់)បន្សល់ទុករថយន្ត នiងអ្នកដំណើរ ព្រមទាំងធ្វើឱ្យមានការភ្ញាក់ផ្អើល និងកកស្ទះចរាចរណ៍មួយសន្ទុះផងដែរ។
លោកបានបន្តថា រថយន្តក្រុង៤៥កៅអី របស់ក្រុមហ៊ុនមេគង្គអ៊ិចប្រេសដឹកអ្នកដំណើរ មានម៉ាក ហ្វុយសូ ពាក់ស្លាកលេខភ្នំពេញ 3A-1927 ដឹកអ្នកដំណើរ(ពីភ្នំពេញ)ក្នុងទិសដៅពីទិសខាងកើតទៅទិសលិច រួចគេចខ្លួនបាត់ បានជ្រុលទៅបុករថយន្ត តាកូម៉ាពណ៌ខ្មៅ បើកបរដោយឈ្មោះ អ៊ាន គឹមអេង ភេទប្រុស អាយុ៣៨ឆ្នាំ រស់នៅភូមិសំរោងធំ ឃុំអន្លង់សំណរ ស្រុកជីក្រែង ខេត្តសៀមរាប របួសស្រាល ខណៈកំពុងបើកឆ្លងផ្លូវពីត្បូងទៅជើង ហើយក៏ជ្រុលទៅបុករថយន្ត សាំយ៉ុង១៥កៅអី ពណ៌ខៀវ ពាក់ស្លាកលេខភ្នំពេញ 2T-1813 បើកបរដោយឈ្មោះ ខន សុខុន ភេទប្រុស រស់នៅភូមិរលួស ឃុំបន្ទាយស្ទោង ស្រុកស្ទោង ខេត្តកំពង់ធំ បើកបរទិសដៅពីលិចទៅកើត។ ក្នុងហេតុការគ្រោះថ្នាក់ចរាចរណ៍នោះខូចខាតរថយន្ត ទាំង៣គ្រឿង។
ក្រោយពេលកើតហេតុកម្លាំងនគរបាលសណ្តាប់ធ្នាប់របស់អធិការនគរបាលស្រុកបានចុះវាស់វែងរួចយករថយន្តទាំង៣គ្រឿងចេញ ដើម្បីកុំឱ្យកកស្ទះចរាចរណ៍ផងដែរ។ បន្ទាប់មកកម្លាំងជំនាញបានយករថយន្តទាំង៣គ្រឿងមករក្សាទុកនៅអធិការដ្ឋាន នគរបាលស្រុកជីក្រែង ដើម្បីចាត់ការទៅតាមផ្លូវច្បាប់៕
ចែករំលែកព័តមាននេះ