ខេត្តសៀមរាប៖ តាមប្រភពព័ត៌មានបានរាយការណ៍មកថា មានក្រុមចោរប្រុស-ស្រី៣នាក់ ជាជនជាតិវៀតណាម ដែលល្បីខាងលូកហោប៉ៅយកទ្រព្យសម្បត្តិពីភ្ញៀវជាតិ និងអន្តរជាតិ
ខេត្តសៀមរាប៖ តាមប្រភពព័ត៌មានបានរាយការណ៍មកថា មានក្រុមចោរប្រុស-ស្រី៣នាក់ ជាជនជាតិវៀតណាម ដែលល្បីខាងលូកហោប៉ៅយកទ្រព្យសម្បត្តិពីភ្ញៀវជាតិ និងអន្តរជាតិ ក្នុងពិធីព្រឹត្តិការណ៍អង្គរសង្គ្រាន្តឆ្នាំថ្មី និងក្នុងកម្មពិធីធំៗនោះ ខណៈពេលនេះត្រូវបានសមត្ថកិច្ចនៃនាយកដ្ឋានព្រហ្មទណ្ឌក្របួចជាប់ បន្ទាប់ពីធ្វើសកម្មភាពលូកហោប៉ៅភ្ញៀវទេសចរដែលនាំគ្នាមកលេងអង្គរសង្គ្រាន្តនៅខេត្តសៀមរាប ។
ហេតុការឃាត់ខ្លួនជនជាតិវៀតណាមនេះបានធ្វើឡើងកាលពីថ្ងៃទី១៣ ខែមេសា ឆ្នាំ២០១៧ ស្ថិតនៅក្នុងក្រុងសៀមរាប ខណៈជនសង្ស័យប្រុស-ស្រីទាំងបីនាក់នេះបាននាំគ្នាធ្វើសកម្មភាពជាក់ស្តែងដោយលូកហោប៉ៅពីជនបរទេសដែលបានអញ្ជើញចូលរួមក្នុងពិធីអង្គរសង្គ្រាន្តឆ្នាំថ្មីនៅក្នុងទឹកដីប្រវត្តិសាស្ត្រនៃខេត្តសៀមរាប ។
ប្រភពបានបន្តថា ជនសង្ស័យប្រុស-ស្រីទាំង៣នាក់នោះមាន ទី១-ឈ្មោះ LAM THI HUE ភេទស្រី កើតឆ្នាំ១៩៥៨ ជាជនជាតិវៀតណាម កាន់លិខិតឆ្លងដែន VNM C 2423173, ទី២-ឈ្មោះ LE THANH BINH កើតឆ្នាំ១៩៧៦ ជនជាតិវៀតណាម កាន់លិខិតឆ្លងដែន VNM B 9637527 និងទី៣-ឈ្មោះ HOANG MINH PHUONG ភេទប្រុស កើតឆ្នាំ១៩៦០ ជនជាតិវៀតណាម កាន់លិខិតឆ្លងដែន VNM B 1691776 ។
តាមប្រភពបានបញ្ជាក់ថា ជនសង្ស័យទាំង៣នាក់បានសារភាពនៅចំពោះសមត្ថកិច្ចបានឲ្យដឹងថា ពួកគេតែងតែធ្វើសកម្មភាពលូកហោប៉ៅលួចទ្រព្យសម្បតិ្តពីប្រជាពលរដ្ឋក៏ដូចជាភ្ញៀវបរទេសដែលបានចូលរួមក្នុងពិធីបុណ្យធំៗតាមបណ្តាប្រទេសនានាក្នុងអាស៊ាន ដូចជា ឡាវ និងប្រទេសថៃ ជាដើម ។ បច្ចុប្បន្នសមត្ថកិច្ចកម្ពុជាបានរៀបចំកសាងសំណុំរឿងបញ្ជូនទៅតុលាការខេត្តសៀមរាបដើម្បីផ្តន្ទាទោសតាមច្បាប់ ៕
ចែករំលែកព័តមាននេះ